.jpg)
សមត្ថកិច្ចនិងអ្នកភូមិកំពុងជួយលើកសាកសពជនរងគ្រោះចេញពីអណ្តូងកាលពីថ្ងៃទី២៥ខែមេសា។ រូបថត នគរបាល
សៀមរាប៖ បុរស ២ នាក់ ក្នុងចំណោមគ្នា ៣ នាក់ បានថប់ដង្ហើមស្លាប់នៅក្នុងអណ្ដូង បន្ទាប់ពីពួកគេបាននាំគ្នាចុះស្ដារអណ្ដូងនោះ ដើម្បីយកទឹកប្រើប្រាស់។ ករណីនេះបានកើតឡើង កាលពីព្រឹកថ្ងៃសៅរិ៍ ទី២៥ ខែ មេសា ឆ្នាំ ២០២០ នៅចំណុច ភូមិឪឡោក ឃុំបាគង ស្រុកប្រាសាទបាគង ខេត្តសៀមរាប។
លោក វៃ សាវឿន នាយនគរបាលប៉ុស្តិ៍ឃុំបាគង បាននិយាយថា ជនរងគ្រោះដែលបានស្លាប់នៅក្នុងករណីខាងលើនេះ រួមមានឈ្មោះ ឈុត ស៊ាន អាយុ ៣៩ ឆ្នាំ មានទីលំនៅភូមិឪឡោក ឃុំបាគង និងម្នាក់ទៀតឈ្មោះ យឿម រ៉ាត់ អាយុ៤៧ឆ្នាំ មានទីលំនៅភូមិស្ទឹង ឃុំបាគង។ អ្នកទាំង ២ មានមុខរបរ ដើរស៊ីឈ្នួលជីកស្ដារអណ្ដូងនៅក្នុងភូមិ។
លោក សាវឿន បន្តថា បើតាមការរៀបរាប់របស់ស្ត្រីជាម្ចាស់អណ្ដូង ឈ្មោះ ធិត សួន អាយុ ៤៥ ឆ្នាំ ដែលជាបងថ្លៃស្រីរបស់ជនរងគ្រោះឈ្មោះ ឈុត ស៊ាន នៅរសៀលថ្ងៃ ២៤ ខែ មេសា ឆ្នាំ ២០២០ ជនរងគ្រោះនិងក្រុមការងារ មានគ្នា ៣ នាក់ រួមមានឈ្មោះ(ឈុត ស៊ាន, យឿម រ៉ាត់ និង សោម រ៉ុង ) បានមកម៉ៅការស្ដារអណ្ដូងទឹករបស់គាត់ ដែលបានគោករីងនិងឈប់ប្រើប្រាស់រយៈពេល៣ឆ្នាំមកហើយ ក្នុងតម្លៃ ១០ ម៉ឺនរៀល ហើយគាត់ក៏យល់ព្រម។
លោកបានថ្លែងដោយលើកយកសម្ដីរបស់អ្នកស្រី សួន មកបញ្ជាក់ថា៖ «បន្ទាប់ពីខ្ញុំបានយល់ព្រមឲ្យពួកគេជីកស្ដារក្នុងតម្លៃ ១០ ម៉ឺនរៀលនោះ ពួកគេបានប្រាប់ថា ពួកគេនឹងចាប់ផ្ដើមការងារនៅព្រឹកស្អែក [ព្រឹកថ្ងៃសៅរិ៍] ហើយពួកគេបានទារលុយពីខ្ញុំមុន ៣ ម៉ឺនរៀល ទៅទិញស្រាផឹក។
លុះព្រឹកឡើង ពួកគេទាំង ៣ នាក់ ក៏បានមកបើកគម្របអណ្ដូងនោះ ហើយបានរៀបចំចងខ្សែ ចុះទៅក្នុងអណ្ដូងនោះ ដើម្បីស្ដារវា ហើយក៏ជួបគ្រោះថ្នាក់ស្លាប់ក្នុងអណ្ដូងនោះអស់ ២ នាក់ ក្នុងនោះ មានទាំងប្អូនថ្លៃខ្ញុំម្នាក់ផង
ដែរ»។
បើតាមលោក សាវឿន ការយកសពជនរងគ្រោះទាំង ២ នាក់ ចេញពីអណ្ដូងនោះ គឺអ្នកភូមិបានប្រើវិធីសាស្ត្រ តបំពង់ទុយោ ចូលទៅក្នុងអណ្ដូងនោះ ហើយប្រើខ្សែពួរចងទាក់ជើងនិងយោងឡើងមក។ អ្នកដែលបានស្ម័គ្រចិត្តចុះទៅក្នុងអណ្ដូងនោះ ដើម្បីទាក់ជើងសពជនរងគ្រោះនោះ គឺ លោក សោម រ៉ុង ដែលជាក្រុមការងារម៉ៅការជីកស្ដារអណ្ដូងនោះ។
នៅថ្ងៃម្សិលមិញ លោក សោម រ៉ុង បានប្រាប់ភ្នំពេញប៉ុស្តិ៍ថា មុនស្ដារអណ្ដូងនេះ ពួកគាត់ទាំង៣នាក់ បានស្ដារអណ្ដូងនៅក្នុងភូមិនេះចំនួន២រួចមកហើយ ដោយក្នុងអណ្ដូងនីមួយៗ ពួកគាត់យកថ្លៃឈ្នួល១៥ម៉ឺនរៀល។ ប៉ុន្តែអណ្ដូងទី៣នេះ គឺជាបងប្អូននឹងគ្នា ហើយជាគ្រួសារក្រីក្រទៀត ទើបពួកគាត់យកថ្លៃឈ្នួលត្រឹមតែ១០ម៉ឺនរៀល។
លោករ៉ុងនិយាយថា៖ «មុនដំបូងបង រ៉ាត់ បានចុះទៅក្នុងអណ្ដូងនោះមុនគេ ដើម្បីជីកកាយដីល្បាប់ ដែលបានបង្កការស្ទះដង្ហើមទឹក ប្រមាណ ១០ នាទី មិនឮសំឡេងគាត់ស្រែកឲ្យយោងដីចេញពីក្នុងអណ្ដូង ប្អូន ស៊ាង ក៏បានចុះទៅតាម។ បន្ទាប់មកខ្ញុំឮប្អូនស៊ាងស្រែកថា ជួយផងបងរ៉ាត់សន្លប់បាត់ហើយ ភ្លាមនោះខ្ញុំក៏ស្រែកប្រាប់បងសួនម្ចាស់អណ្ដូង ឲ្យជួយស្រែកហៅអ្នកភូមិមកជួយគ្នា ហើយខ្ញុំប្រាប់ឲ្យប្អូនស៊ាងឡើងមកលើវិញ តែមិនឮសំឡេងប្អូនស៊ាងតបវិញទេ។ លុះអ្នកភូមិមកដល់ ក៏នាំគ្នាយកបំពង់ទុយោមកតដាក់ចូលក្នុងអណ្ដូងនោះ ដើម្បីឲ្យមានខ្យល់បឺតចេញចូលក្នុងអណ្ដូងនោះ»។
លោករ៉ុងបន្ថែមថា៖«ទម្រាំខ្ញុំចុះទៅជួយពួកគាត់ចេញពីក្នុងអណ្ដូងបាន គឺ ពួកគាត់ដាច់ខ្យល់ស្លាប់បាត់ទៅហើយ»។
លោក លឹម សម្បត្តិ អធិការស្រុកប្រាសាទបាគង ដែលបានដឹកនាំមន្ត្រីជំនាញ ផ្នែកកោសល្យវិច័យវិទ្យាសាស្ត្រចុះទៅពិនិត្យសាកសពជនរងគ្រោះទាំង២នោះបានបញ្ជាក់ថា ការស្លាប់របស់ជនរងគ្រោះទាំង២នោះ គឺដោយសារតែក្នុងអណ្ដូងនោះ «គ្មានខ្យល់អុកស៊ីសែន»។
ជាមួយគ្នានេះលោក បានអំពាវនាវដល់អ្នកភូមិឲ្យបញ្ឈប់ការជីកស្ដារអណ្ដូង ដែលមានជម្រៅជ្រៅ និងបានខកខានការប្រើប្រាស់យូរឆ្នាំ ពិសេសការជីកស្ដារនៅក្នុងរដូវក្ដៅបែបនេះ ដោយលោកពន្យល់ថា៖ «អណ្ដូងចាស់ៗ ដែលឈប់ប្រើប្រាស់យូរឆ្នាំ ភាគច្រើនគ្មានខ្យល់អុកស៊ីសែនគ្រប់គ្រាន់នោះទេ វាអាចបង្កគ្រោះថ្នាក់ដល់ជីវិត»៕
