កណ្តាលៈ ជនត្រូវចោទប្រើប្រាស់គ្រឿងញៀន ២ នាក់ត្រូវបានចៅក្រមស៊ើបសួរនៃសាលាដំបូងខេត្តកណ្តាលចោទប្រកាន់ និងឃុំខ្លួននៅពន្ធនាគារខេត្តពីម្សិលមិញ ពាក់ព័ន្ធការដណ្តើមគ្រឿងញៀនគ្នាជក់ហើយសម្លាប់មិត្តភក្តិរបស់ខ្លួនម្នាក់ប្រព្រឹត្តនៅភូមិ-ឃុំព្រែកថ្មីស្រុកកោះធំកាលពីខែកុម្ភៈ ឆ្នាំ ២០២០ ប៉ុន្តែសមត្ថកិច្ចទើបចាប់បានកាលពីថ្ងៃទី ៨ តុលា។
លោក ទិន សុចិត្រា អ្នកនាំពាក្យសាលាដំបូងខេត្តកណ្តាលប្រាប់ពីម្សិលមិញថា ជនត្រូវចោទឈ្មោះ ដូយ ផែ ហៅ និល និងម្នាក់ទៀត ឈ្មោះ រិច ឆៃ ត្រូវបានចៅក្រមស៊ើបសួរសម្រេចចោទប្រកាន់ និងបញ្ជូនពួកគេទៅឃុំខ្លួនក្នុងពន្ធនាគារហើយនៅរសៀលថ្ងៃទី ១២ តុលា។
លោកថ្លែងថា៖ «ជនត្រូវចោទត្រូវបានចៅក្រមស៊ើបសួរលោក អាត ច័ន្ទតារា ចោទពីបទឃាតកម្មតាមបញ្ញត្តិមាត្រា ១៩៩ នៃក្រមព្រហ្មទណ្ឌ»។
តាមបញ្ញត្តិមាត្រា ១៩៩ នៃក្រមព្រហ្មទណ្ឌនេះជនត្រូវចោទទាំង ២ នាក់ បើសិនជាតុលាការរកឃើញថាពួកគេពិតជាបានវាយសម្លាប់ជនរងគ្រោះមែននោះ ត្រូវផន្ទាទោសដាក់ពន្ធនាគារពី ១០ ទៅ ១៥ ឆ្នាំ។
តាមមន្ត្រីនៃស្នងការដ្ឋាននគរបាលខេត្តកណ្តាល ១ រូបសុំមិនឱ្យបញ្ចេញឈ្មោះប្រាប់ពីម្សិលមិញថា កាលពីថ្ងៃទី ៨ ខែតុលា ឆ្នាំ ២០២០ សមត្ថកិច្ចនៃស្នងការដ្ឋាននគរបាលខេត្តតាកែវបានធ្វើការឃាត់ខ្លួនជនសង្ស័យម្នាក់ឈ្មោះ វិច ឆៃ ភេទប្រុសអាយុ ២៣ ឆ្នាំនៅចំណុច ភូមិសែនបន ឃុំលាយបូរ ស្រុកត្រាំកក់ ខេត្តតាកែវដែលជនសង្ស័យបានគេចខ្លួនពីភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្ដាលទៅលាក់ខ្លួននៅទីនោះ។ ការឃាត់ខ្លួនជនសង្ស័យខាងលើ គឺធ្វើឡើងតាមការស្នើសុំសហការរបស់ស្នងការដ្ឋាននគរបាលខេត្តកណ្តាល។
មន្ត្រីដដែលបន្តថា ក្រោយពីឃាត់ខ្លួនសមត្ថកិច្ចខេត្តតាកែវបានប្រគល់ជនសង្ស័យឈ្មោះ វិច ឆៃ មកស្នងការដ្ឋាននគរបាលខេត្តកណ្តាលវិញ។ បន្ទាប់មកសមត្ថកិច្ចបានសួរចម្លើយជនសង្ស័យឈ្មោះ វិច ឆៃ និងស្រាវជ្រាវរហូតចាប់ឈ្មោះ ដូយ ផៃ អាយុ ២៥ ឆ្នាំបានម្នាក់ទៀតនៅថ្ងៃដដែល។
យោងតាមមន្ត្រីរូបនោះ គឺនៅស្នងការដ្ឋាននគរបាលខេត្តកណ្តាលជនសង្ស័យឈ្មោះ វិច ឆៃ បានសារភាពប្រាប់សមត្ថកិច្ចថា កាលពីថ្ងៃទី ១៧ ខែកុម្ភៈ ឆ្នាំ ២០២០ ពួកគេមានគ្នា ៣ នាក់ក្នុងនោះជនរងគ្រោះឈ្មោះ ផន សុខខន ហៅ អឹប ភេទប្រុស អាយុ ២៧ ឆ្នាំមានលំនៅភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្ដាល បាននាំគ្នាជក់គ្រឿងញៀននៅក្នុងចម្ការស្វាយ ១ កន្លែង។ ខណៈកំពុងជក់គ្រឿងញៀននោះ ជនរងគ្រោះឈ្មោះ ផន សុខខន បានជក់គ្រឿងញៀនយូរមិនព្រមចែកពួកគេជក់ធ្វើឱ្យឈ្មោះ ដូយ ផៃ ខឹងជនរងគ្រោះឈ្មោះ ផន សុខខន ហើយបានចាប់សក់ក្បាលជនរងគ្រោះបោកទៅក្រោយអុកនឹងគល់ស្វាយបណ្ដាលឱ្យស្លាប់តែម្តង។
មន្ត្រីបន្តទៀតថា ក្រោយពីដឹងថា ជនរងគ្រោះស្លាប់ហើយនោះពួកគេបានអូសសពជនរងគ្រោះយកទៅកប់នៅក្នុងចម្ការស្វាយ ត្រង់ព្រំប្រទល់ដីរបស់ឈ្មោះ សល់ និងឈ្មោះ ប្រុស ស្ថិតនៅខាងកើតទំនប់ទទឹងថ្ងៃក្នុងភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្ដាល ដើម្បីបំបាត់ដាន។ បន្ទាប់ពីពួកគេកប់សាកសពជនរងគ្រោះរួចប្រហែលម៉ោងជាង ១១ យប់ថ្ងៃទី ១៧ កុម្ភៈដដែល ពួកគេបានត្រឡប់ទៅផ្ទះវិញរៀងៗខ្លួន។ ប៉ុន្តែជនឈ្មោះ រិច ឆែ ខ្លាចសមត្ថកិច្ចចាប់ខ្លួនក៏រត់ទៅសំងំលាក់ខ្លួននៅផ្ទះមីងរបស់គេតែដោយសមត្ថកិច្ចស្រាវជ្រាវដឹងថាជនម្នាក់នេះមានសាច់ញាតិនៅស្រុកត្រាំកក់ក៏ស្នើសុំទៅស្នងការដ្ឋាននគរបាលខេត្តតាកែវឱ្យជួយស្រាវជ្រាវរហូតចាប់ខ្លួនបានតែម្តង៕