.jpg)
ជនសង្ស័យម្នាក់ក្នុងចំណោម ២ នាក់ និងវត្ថុតាង។ នគរបាលជាតិ
ភ្នំពេញៈ បុរស ២ នាក់ ត្រូវបានចាប់ខ្លួនកាលពីថ្ងៃសុក្រសប្ដាហ៍មុនពាក់ព័ន្ធក្នុងករណីចោទប្រកាន់ពីបទលួចលុយចំនួន ២ លានដុល្លារសហរដ្ឋអាមេរិក ពីក្រុមហ៊ុនមួយក្នុងអំឡុងពេលដែលម្ចាស់ក្រុមហ៊ុនមួយនេះប្រើឲ្យទៅបើកលុយ។
លោក ស ថេត ស្នងការរាជធានីភ្នំពេញបានឲ្យដឹងកាលពីម្សិលមិញថា ជនសង្ស័យដែលត្រូវឃាត់ខ្លួននោះឈ្មោះ អៀម សំអន ភេទប្រុស អាយុ ៣៧ ឆ្នាំមានមុខរបរជាយោធាបម្រើការងារនៅនាយកដ្ឋានកងអង្គរក្សមានឋានៈអនុសេនីយ៍ឯក និងបក្ខពួកម្នាក់ទៀត ដែលត្រូវបានចោទប្រកាន់លួចលុយ ២ លានដុល្លារសហរដ្ឋអាមេរិក។
លោក ថេត បានថ្លែងថា សមត្ថកិច្ចកំពុងស្រាវជ្រាវស្វែងរកអ្នកជាប់ពាក់ព័ន្ធបន្ថែម ប៉ុន្តែបដិសេធមិនផ្ដល់ព័ត៌មានលម្អិតខណៈការស៊ើបអង្កេតកំពុងតែដំណើរការ។
លោក ឆាយ គីមខឿន អ្នកនាំពាក្យនគរបាលជាតិ បានមានប្រសាសន៍ថា កម្លាំងនគរបាល ព្រហ្មទណ្ឌក្រសួង បានសហការជាមួយនគរបាលខណ្ឌសែនសុខ បានចាប់ខ្លួនមន្ត្រីបម្រើការងារនៅនាយកដ្ឋានកងអង្គរក្សម្នាក់ និងជនសង្ស័យម្នាក់ទៀតបន្ទាប់ពីពួកគេបានលួចលុយជាង ២ លានដុល្លារអាមេរិក ពីក្រុមហ៊ុនឯកជនមួយ។
លោកបញ្ជាក់ថា៖ «គាត់ពាក់ព័ន្ធលួចលុយរបស់ក្រុមហ៊ុន។ ថៅកែ (ក្រុមហ៊ុន) បានឲ្យអ្នកបើកបរទៅបើកលុយហើយអ្នកបើកបរបានយកលុយរត់។ យើងបានចាប់ម្នាក់នៅស្វាយរៀង ហើយគាត់បានឆ្លើយថាគាត់ (អៀម សំអន)។ គាត់គឺជាមន្ត្រីនៅបញ្ជាការដ្ឋានអង្គរក្សដែលមានឋានៈអនុសេនីយ៍ឯកហើយឥឡូវនេះ យើងបានបញ្ជូនទៅខាងស្នងការរាជធានីភ្នំពេញដើម្បីធ្វើការបន្ត។ហើយពេលចាប់បានអ្នកបើកបរ ហើយអ្នកបើកបរបានឆ្លើយថាគាត់ (អៀម សំអន) បានជាប់ពាក់ព័ន្ធ»។
លោក គីមខឿន ថ្លែងថា ជនសង្ស័យត្រូវបានចាប់ខ្លួននៅភូមិបាយ៉ាប សង្កាត់ភ្នំពេញថ្មី៕
