តាកែវ: មន្ត្រីនគរបាលមូលដ្ឋាន បានបញ្ជូនជនសង្ស័យចំនួន ២ នាក់ ទៅស្នងការដ្ឋាននគរបាលខេត្តតាកែវ នៅថ្ងៃទី៣ ខែធ្នូ បន្ទាប់ពីសមត្ថកិច្ចឃាត់ខ្លួននៅភូមិចំបក់ ឃុំគោកព្រេច ស្រុកគិរីវង់ ខេត្តតាកែវ ខណៈដែលពួកគេកំពុងជិះម៉ូតូមួយគ្រឿងឌុបគ្នាដឹកជញ្ជូនដើមកញ្ឆាស្រស់ចំនួនជាង ៣គីឡូក្រាមនៅតាមផ្លូវ។
លោក ហៀម ស្រ៊ីម អធិការរងនគរបាលស្រុកគីរីវង់ទទួលផែនគ្រឿងញៀនបានឲ្យដឹងនៅថ្ងៃទី៣ ខែធ្នូ ថា សមត្ថកិច្ចមិនទាន់អាចបញ្ជាក់ពីគោលដៅនៃការដឹកញ្ឆាពីទីតាំងណា ហើយចល័តទៅទីតាំងណាទេ។
លោកបញ្ជាក់ថា៖«យើងបញ្ជូនទៅស្នងការដ្ឋាននគរបាលខេត្ត ដើម្បីឱ្យមន្ត្រីជំនាញគាត់សាកសួរបន្តទៀត»។
លោក ហៀម ស្រ៊ីម បានបន្ថែមថា ជនសង្ស័យដែលត្រូវបានឃាត់ខ្លួននេះជាមុខសញ្ញាសង្ស័យ ត្រូវបានសមត្ថកិច្ចតាមដានយ៉ាងយកចិត្តទុកដាក់។ ជនល្មើសទី១-ឈ្មោះ អិន ឡង់ឌីវិថេន ភេទប្រុស អាយុ២៤ឆ្នាំ រស់នៅភូមិក្បាលដំរី ឃុំគោកព្រេច ស្រុកគិរីវង់ ខេត្តតាកែវ និងទី២-ឈ្មោះ ផល ភេន ភេទប្រុស អាយុ២៤ឆ្នាំ នៅភូមិដើមរំដេង ឃុំសោម ស្រុកគិរីវង់ ខេត្តតាកែវ។
លោក សុខ សំណាង ស្នងការនគរបាលខេត្តតាកែវ មិនទាន់អាចទាក់ទងសុំការបញ្ជាក់បន្ថែមជុំវិញករណីនេះទេ កាលពីថ្ងៃទី៣ ខែធ្នូ។
តាមរបាយការណ៍របស់អធិការដ្ឋាននគរបាលស្រុកគិរីវង់បានឱ្យដឹងថា វត្ថុតាងក្រៅពីកញ្ឆាសមត្ថកិច្ចបានឆែកឆេរនិងរឹបអូសម៉ូតូមួយគ្រឿង ដាវសាមូរ៉ៃមួយដើម និងកាំភ្លើងកែច្នៃមួយដើម៕