ស្ទឹងត្រែង: បុរស ២ នាក់ រួចផុតពីសេចក្ដីស្លាប់ ក្រោយពីរងការវាយប្រហារដោយសត្វខ្លាឃ្មុំព្រៃដែលជាខ្លាញីកាលស្ថិតក្នុងតំបន់ខ្នងភ្នំមួយដែលអ្នកភូមិហៅថាភ្នំការនូម ចម្ងាយប្រមាណ ៣ គីឡូម៉ែត្រពីភូមិគិរីវង្សាលើ ឃុំសន្តិភាព ស្រុកសៀមប៉ាង ខេត្តស្ទឹងត្រែង។
លោក ឃុន ដាវី អធិការរងនគរបាលស្រុកសៀមប៉ាងបានថ្លែងប្រាប់ភ្នំពេញប៉ុស្ដិ៍ពីម្សិលមិញថា ជនរងគ្រោះទាំង ២ នាក់នេះម្នាក់ឈ្មោះ អើយ រ៉េ ភេទប្រុស អាយុ ២៩ ឆ្នាំ និងឈ្មោះ អេន ញ៉ាំ ភេទប្រុសអាយុ ២៩ ឆ្នាំទាំង ២ នាក់ជាជនជាតិភាគតិចកាវែត។ ពួកគេរងរបួសធ្ងន់ធ្ងរដោយសារសត្វខ្លាំឃ្មុំដេញខាំទាំងកំរោលក្នុងអំឡុងពេលកំពុងដើររើសផ្លែសំរងនៅលើខ្នងភ្នំកាលពីថ្ងៃទី ៧ ខែមេសា។
លោក ដាវី ថ្លែងថា៖ «ពួកគាត់បានរួចផុតពីការស្លាប់ហើយបន្ទាប់ពីក្រុមគ្រូពេទ្យនៃមន្ទីរពេទ្យបង្អែកខេត្តស្ទឹងត្រែងបានជួយសង្គ្រោះ និងព្យាបាលជូនពួកគាត់ ក្រោយពីសាច់ញាតិបញ្ជូនមកមន្ទីរពេទ្យទាន់ពេលវេលា»។
លោកថា ពួកគេទាំង ២ នាក់បានរងរបួសធ្ងន់ធ្ងរលើផ្ទៃមុខ និងម្នាក់បាត់បង់ភ្នែកម្ខាងដោយសារសត្វខ្លាឃ្មុំញី ១ ក្បាលបានរត់មកដេញខាំជនរងគ្រោះទាំង ២ នាក់ ខណៈពួកគេចូលព្រៃដើររើសផ្លែសំរងនៅលើខ្នងភ្នំមួយដែលអ្នកភូមិហៅថាភ្នំការនូមស្ថិតនៅប្រមាណ ៣ គីឡូម៉ែត្រពីភូមិប្រជាពលរដ្ឋ។
លោក ដាវី ថ្លែងថា៖ «ពេលសមត្ថកិច្ចទៅដល់កន្លែងកើតហេតុហ្នឹងគឺសាច់ញាតិជនរងគ្រោះបានបញ្ជូនទៅមន្ទីរពេទ្យបង្អែកខេត្តស្ទឹងត្រែងរួចរាល់ហើយដោយយើងបានទៅពិនិត្យដល់កន្លែងកើតហេតុ និងសាកសួរអ្នកភូមិគឺពិតជាមានសត្វខ្លាឃ្មុំខាំមែន។ ក្រោយមកសមត្ថកិច្ចបានទៅជួបជនរងគ្រោះនៅមន្ទីរពេទ្យទៀតដើម្បីសាកសួរពីរឿងហេតុនេះហើយយើងឃើញថា ស្ថានភាពជំងឺគាត់លែងគ្រោះថ្នាក់ដល់ជីវិតហើយ»។
លោក ស៊ីន សុវណ្ណារី នាយប៉ុស្ដិ៍នគរបាលរដ្ឋបាលឃុំសន្ដិភាពបានថ្លែងពីម្សិលមិញថា រហូតមកដល់ថ្ងៃទី ៩ ខែមេសា គឺពួកគាត់បានធូរច្រើនហើយនិយាយរួមគឺគាត់ផុតពីការស្លាប់។
លោកថ្លែងថា៖ «ខ្ញុំបានរាយការណ៍ទៅថ្នាក់លើអស់ហើយបើអ៊ីចឹងខ្ញុំអត់និយាយអ្វីច្រើនលើសពីនេះទេ»។
លោក អើយ រ៉េ និងលោក អេន ញ៉ាំ អ្នកទាំង ២ ជាជនជាតិដើមភាគតិចកាវែត និងជាជនរងគ្រោះក្នុងករណីនេះពីម្សិលមិញមិនអាចស្វែងរកប្រភពទាក់ទងសុំការបញ្ជាក់បន្ថែមជុំវិញករណីនេះបានទេ។
ប៉ុន្ដែលោក ឃុន ដាវី អធិការរងនគរបាលស្រុកសៀមប៉ាងបានដកស្រង់សម្តីជនរងគ្រោះឈ្មោះ អេន ញ៉ាំ ជាអ្នករងគ្រោះម្នាក់ក្នុងចំណោម ២ នាក់បាននិយាយរៀបរាប់ពីដើមហេតុថាពួកគាត់ទាំង ២ នាក់បាននាំគ្នាឡើងទៅលើភ្នំការនូមដែលនៅជិតភូមិដើម្បីដើររើសផ្លែសំរងយកមកលក់នៅឯផ្សារដូចសព្វមួយដង ប៉ុន្ដែនៅពេលឡើងមកដល់ចង្កេះភ្នំ ស្រាប់តែពួកគាត់ប្រទះឃើញសត្វខ្លាឃ្មុំញី ១ ក្បាលកំពុងបណ្ដើរកូន ២ ក្បាលទៀត។
លោក ដាវី បានឲ្យដឹងបន្តថាភ្លាមៗនោះពួកគាត់មិនបាននិយាយ ឬធ្វើសកម្មភាពអ្វីជាមួយសត្វខ្លាឃ្មុំនោះទេដោយនាំគ្នាដើរវាងសំដៅទៅរើសផ្លែសំរងដែលនៅក្បែរនោះពេលជនរងគ្រោះឈ្មោះ អើយ រ៉េ បានឱនរើសផ្លែសំរងស្រាប់តែមេខ្លាឃ្មុំញីរត់សំដៅមកពួកគាត់ទាំង ២ នាក់តែម្ដង។
អំឡុងពេលនោះពួកគាត់ព្យាយាមរត់គេចពីខ្លាឃ្មុំនោះ ប៉ុន្ដែរត់មិនរួចហើយក៏នៅតតាំងជាមួយសត្វខ្លាឃ្មុំ។ ខណៈតតាំងគ្នានោះឈ្មោះ អើយ រ៉េ ត្រូវបានសត្វខ្លាឃ្មុំខ្វេះភ្នែកម្ខាង និងខាំលើផ្ទៃមុខស្ទើរតែមើលមិនស្គាល់រីឯឈ្មោះ អេន ញ៉ាំ ក៏រងរបួសលើផ្ទៃមុខដែរ ប៉ុន្ដែមិនធ្ងន់ធ្ងរខ្លាំងពេកទេ។ បន្ទាប់មក អេន ញ៉ាំ បានទូរស័ព្ទហៅអ្នកភូមិនៅទីនោះមកជួយយកទៅមន្ទីរពេទ្យ៕