ភ្នំពេញៈ តំណាងអយ្យការអមសាលាដំបូងរាជធានីភ្នំពេញកាលពីថ្ងៃអាទិត្យបានបង្គាប់ឲ្យនាំជនសង្ស័យ ២ នាក់ក្នុងករណីជួញដូរគ្រឿងញៀនជាង ១៦ គីឡូក្រាមមកឃុំខ្លួនជាបណ្ដោះអាសន្ននៅមន្ទីរប្រឆាំងគ្រឿងញៀនវិញ ដើម្បីរង់ចាំដំណើរការនីតិវិធីសាកសួរជាបន្តទៀតនៅព្រឹកថ្ងៃចន្ទនេះ។
លោក ឡឹក វណ្ណៈ នាយកមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានប្រាប់ភ្នំពេញប៉ុស្តិ៍នៅថ្ងៃអាទិត្យថា ជនសង្ស័យឈ្មោះ សឿង ធាវ៉ា អាយុ ៣៧ ឆ្នាំ និងម្នាក់ទៀតឈ្មោះ អឿង ឌីចាន់ណា អាយុ ៣៧ ឆ្នាំ ត្រូវបានកម្លាំងនគរបាលមន្ទីរប្រឆាំងគ្រឿងញៀនចាប់ឃាត់ខ្លួនជាមួយនឹងថ្នាំញៀនសរុប ១៦,៥ គីឡូក្រាម។ ប្រតិបត្តិការបង្ក្រាបជនសង្ស័យទាំង ២ នេះបានធ្វើឡើងក្នុងរយៈពេល ២ ថ្ងៃ ដោយចាប់ផ្ដើមពីថ្ងៃទី ២ ដល់ថ្ងៃទី ៣ ខែ មេសា ឆ្នាំ ២០២០។
លោក វណ្ណៈ បានបន្តថានៅយប់ថ្ងៃទី ២ ខែ មេសា ឆ្នាំ ២០២០ កម្លាំងនគរបាលមន្ទីរប្រឆាំងគ្រឿងញៀនបានចាប់ឃាត់ខ្លួន ជនសង្ស័យឈ្មោះ សឿង ធាវ៉ា នៅចំណុចផ្លូវលេខ ១៦៣ ស្ថិតក្នុងសង្កាត់ បឹងកេងកង ២ ខណ្ឌបឹងកេងកង រាជធានីភ្នំពេញ ដោយរឹបអូសគ្រឿងញៀនប្រភេទអៃស៍មេតំហ្វេតាមីនទម្ងន់កន្លះគីឡូក្រាម។
ក្រោយការសាកសួរជនសង្ស័យខាងលើនេះនៅថ្ងៃទី ៣ ខែ មេសា ឆ្នាំ ២០២០ កម្លាំងសមត្ថកិច្ចជំនាញនៃមន្ទីរប្រឆាំងគ្រឿងញៀនបានបន្តធ្វើការឆែកឆេរ និងចាប់ខ្លួនជនសង្ស័យម្នាក់ទៀតឈ្មោះ អឿង ឌីចាន់ណា នៅចំណុចផ្ទះជួលមួយកន្លែងស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ ដោយបានរឹបអូសគ្រឿងញៀនប្រភេទអៃស៍មេតំហ្វេតាមីន ១៦ ដុំស្មើ ១៦ គីឡូក្រាម។
លោកថា៖ «ជនសង្ស័យទាំង ២ នាក់ និងវត្ថុតាងត្រូវបានមន្ត្រីជំនាញយើង កសាងសំណុំរឿងបញ្ជូនទៅកាន់តុលាការរាជធានីភ្នំពេញនៅរសៀលថ្ងៃអាទិត្យ [ម្សិលមិញ] នេះ ប៉ុន្តែតំណាងអយ្យការអមសាលាដំបូងរាជធានីភ្នំពេញបានបង្គាប់ឲ្យនាំយកជនសង្ស័យទាំង ២ មកឃុំខ្លួនជាបណ្ដោះអាសន្ននៅមន្ទីរប្រឆាំងគ្រឿងញៀនវិញដើម្បីរង់ចាំដំណើរការនីតិវិធីសាកសួរជាបន្តទៀតនៅព្រឹកថ្ងៃចន្ទនេះ»។
ករណីដោយឡែក កម្លាំងកងរាជអាវុធហត្ថខេត្តស្វាយរៀងកាលពីថ្ងៃទី ៣ ខែ មេសា ឆ្នាំ ២០២០ បានចាប់ឃាត់ខ្លួនមន្ត្រីយោធាម្នាក់ឈ្មោះ ងួន ប្រុស អាយុ ៣៧ ឆ្នាំ ស្នាក់នៅភូមិតាតិប សង្កាត់ក្រុងបាវិតតាមដីកាឲ្យនាំខ្លួនរបស់តុលាការខេត្តស្វាយរៀងពាក់ព័ន្ធករណីជួញដូរថ្នាំញៀន។ នេះបើតាមលោក ស្រី វុត្ថា មេបញ្ជាការរងកងរាជអាវុធហត្ថខេត្តស្វាយរៀង។
លោក វុត្ថា បានបញ្ជាក់ថាជនសង្ស័យត្រូវបានកម្លាំងនគរបាលប្រឆាំងគ្រឿងញៀនខេត្តស្វាយរៀងបញ្ជូនទៅឲ្យខាងសមត្ថកិច្ចជំនាញជាអ្នកអនុវត្តនីតិវិធីបន្ត។
លោក កឹង ឃន ស្នងការនគរបាលខេត្តស្វាយរៀងបានថ្លែងថា ជនសង្ស័យកំពុងស្ថិតក្រោមនីតិវិធីនៃការស៊ើបសួររបស់មន្ត្រីជំនាញ៕