មណ្ឌលគិរីៈ បុរសសង្ស័យ ២ នាក់ត្រូវតុលាការខេត្តមណ្ឌលគិរីឃុំខ្លួនកាលពីថ្ងៃទី ២៣ មីនា បន្ទាប់ពីមន្ត្រីការពារក្នុងតំបន់នោះចាប់ខ្លួនកាលពីថ្ងៃទី ២២ មីនា នៅពេលដែលក្រុមជនសង្ស័យកំពុងលួចអារដើមស្រឡៅ ៣ ដើម ដែលពួកគេលួចចូលកាប់ក្នុងតំបន់ដែនជម្រកសត្វព្រៃកែវសីមា។
លោក ព្រំ វិបុលរតនៈ ប្រធានដែនជម្រកសត្វព្រៃកែវសីមានៃខេត្តមណ្ឌលគិរី បានថ្លែងប្រាប់ ភ្នំពេញ ប៉ុស្តិ៍ ពីម្សិលមិញថា ជនសង្ស័យដែលឃុំខ្លួនឈ្មោះ ស្រឿង នីរ៉ូ ភេទប្រុស មានអាយុ ៣៦ ឆ្នាំ រស់នៅភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី និង ឈ្មោះ ជា ឬស្យា ភេទប្រុស អាយុ ២១ ឆ្នាំរស់នៅភូមិអូរអាម ឃុំស្រែខ្ទុម ស្រុកែវសីមា ខេត្តមណ្ឌលគិរី។
លោក វិបុលរតនៈ បានថ្លែងបន្តទៀតថា៖ «លោក ទៀង សុថា ចៅក្រមស៊ើបសួរចេញដីកាឃុំខ្លួន និងត្រូវចោទតាមមាត្រា ៥៦ និងមាត្រា ៦០ នៃច្បាប់ស្តីពីតំបន់ការពារធម្មជាតិ»។
លោក វិបុលរតនៈ បានឱ្យដឹងថា កម្លាំងរបស់លោកមានគ្នា ៥ នាក់បាននាំគ្នាដើរល្បាតក្នុងតំបន់ដែនជម្រកសត្វព្រៃកែវសីមារហូតដល់វេលាម៉ោងជិត ១២ យប់ថ្ងៃទី ២២ មីនា ស្រាប់តែឮសំឡេងអារឈើ។
ពេលនោះកម្លាំងរបស់លោកដែលមានកម្លាំងកងរាជអាវុធហត្ថលើផ្ទៃប្រទេសម្នាក់ចូលរួមផងនោះបានដើរសំដៅទៅប្រភពសំឡេង ហើយក៏ឃើញដើមឈើចន្លោះពី ២ ទៅ ៣ ដើមដែលមានមុខកាត់ ០,៣៥ ម៉ែត្រ និង ៣ តឹកកន្លះត្រូវបានជនសង្ស័យទាំង ២ នាក់លួចផ្តួលរំលំ អារទៅហើយ។ គ្រានោះដោយក្រុមជនសង្ស័យដឹងថា កម្លាំងសមត្ថកិច្ចរបស់លោកទៅទាន់ហើយពួកគេក៏នាំគ្នារត់គេចពីកម្លាំងរបស់លោក។
លោក វិបុលរតនៈ ថ្លែងបន្តថា ពេលនោះលោកបានបែងចែកកម្លាំង ៣ នាក់នាំគ្នាដេញចាប់ក្រុមជនសង្ស័យហើយកម្លាំងអាវុធហត្ថម្នាក់ និងមន្ត្រីរបស់លោកម្នាក់ចាំយាមរថយន្តកែច្នៃ ១ គ្រឿងរបស់ក្រុមជនសង្ស័យដែលពួកគេយកមកដឹកឈើ។
លោកថា ចំពោះវត្ថុតាងដែលរឹបអូសបានមានរថយន្តកែច្នៃ ១ គ្រឿង រីឯរណារពួកជនសង្ស័យបានគ្រវែងចោលបាត់រកមិនឃើញទេ។ លោកបញ្ជាក់ប្រាប់ថា៖ «ពីកន្លែងក្រុមយើងដើរ និងកន្លែងដែលពួកគេកាប់ឈើប្រហែលជា ១ គីឡូម៉ែត្រ។ យើងរត់ឆ្លងកាត់អូរដោយដើរនឹងជើង ហើយយើងមានការប្រុងប្រយ័ត្នមែនទែនទើបចាប់ពួកគេបាន។ គ្នាយើងមានតិចគ្នាណាស់មានតែ ២ ទៅ ៣ នាក់ទេ»៕