បន្ទាយមានជ័យៈ សាលាដំបូងខេត្តបន្ទាយមានជ័យកាលពីម្សិលមិញ បានធ្វើការចោទប្រកាន់បុរស ៣ នាក់ពីបទ «ចោរកម្ម» និង «ទទួលផលចោរកម្ម» បន្ទាប់ពីត្រូវបានកម្លាំងកងរាជអាវុធហត្ថក្រុងប៉ោយប៉ែតចាប់ឃាត់ខ្លួននៅមុនពេល និងក្នុងពេលចុះបង្ក្រាបទីតាំងទទួលផលចោរកម្ម ១ កន្លែងក្នុងសង្កាត់ប៉ោយប៉ែត ដោយរឹបអូសវត្ថុតាងម៉ូតូចម្រុះប្រភេទចំនួន ៤១ គ្រឿង និងម៉ូតូរ៉ឺម៉កកង់ ៣ ចំនួន ៧ គ្រឿង។
លោក នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ភ្នំពេញប៉ុស្តិ៍ពីម្សិលមិញថា ការចុះបង្ក្រាបទីតាំងទទួលផលចោរកម្មខាងលើនេះបានធ្វើឡើង បន្ទាប់ពីក្រុមសមត្ថកិច្ចជំនាញបានចាប់ឃាត់ខ្លួនយុវជនម្នាក់ឈ្មោះ កែវ កុសល អាយុ ១៨ ឆ្នាំដែលបានធ្វើសកម្មភាពលួចម៉ូតូរបស់ប្រជាពលរដ្ឋម្នាក់ក្នុងសង្កាត់ប៉ោយប៉ែតកាលពីយប់ថ្ងៃទី ២៦ ខែ មីនា ឆ្នាំ ២០២១ តែមិនបានសម្រេច។
លោក នីណារ៉ូ បានបញ្ជាក់ថា៖ «បន្ទាប់ពីសារភាពជនសង្ស័យបាននាំកម្លាំងសមត្ថកិច្ចទៅចាប់ឃាត់ខ្លួនមុខសញ្ញាជនសង្ស័យ ២ នាក់ទៀតដែលជាអ្នកប្រមូលទិញផលចោរកម្មមកកែច្នៃ ដើម្បីលក់បន្ត»។ លោកបានបន្ថែមថា ជនសង្ស័យក្នុងអំពើទទួលផលចោរកម្មទាំង ២ នាក់នោះ រួមមានឈ្មោះ ឡាយ សាន អាយុ ៤៩ ឆ្នាំ និង ឈ្មោះ ពេញ វាសនា អាយុ ២៥ ឆ្នាំ។ អ្នកទាំង ២ មានទីលំនៅក្នុងសង្កាត់ប៉ោយប៉ែត ក្រុងប៉ោយប៉ែត។
បើតាមលោក នីណារ៉ូ បន្ទាប់ពីសាកសួរ ជនសង្ស័យទាំង ៣ នាក់ត្រូវបានបញ្ជូនទៅកាន់បញ្ជាការដ្ឋានកងរាជអាវុធហត្ថខេត្តបន្ទាយមានជ័យ ដើម្បីចំណាត់ការបន្តតាមនីតិវិធី។ ដោយឡែកវត្ថុតាង ម៉ូតូចម្រុះប្រភេទចំនួន ៤១ គ្រឿង និង ម៉ូតូរ៉ឺម៉កកង់៣ ចំនួន ៧ គ្រឿងត្រូវបានប្រមូលដឹកយកទៅរក្សាទុកនៅបញ្ជាការដ្ឋានកងរាជអាវុធហត្ថក្រុងប៉ោយប៉ែតជាបណ្ដោះអាសន្ន។
ជុំវិញករណីនេះលោក បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា ជនសង្ស័យទាំង ៣ នាក់ ត្រូវបានមន្ត្រីនៃមន្ទីរយុត្តិធម៌កងរាជអាវុធហត្ថខេត្តកសាងសំណុំរឿង ចោទប្រកាន់ចំនួន ២ បទល្មើសផ្សេងគ្នាក្នុងនោះជនសង្ស័យឈ្មោះ កែវ កុសល ត្រូវបានចោទប្រកាន់ពីបទ «ចោរកម្ម» ចំណែកឈ្មោះ ឡាយសាន និងឈ្មោះ ពេញ វាសានា ត្រូវបានចោទពីបទ «ទទួលផលចោរកម្ម» ហើយពួកគេទាំង ៣ ត្រូវបានបញ្ជូនទៅកាន់សាលាដំបូងខេត្តបន្ទាយមានជ័យដើម្បីចំណាត់ការបន្តតាមនីតិវិធីច្បាប់។
លោក តេង សាម៉ៃ អ្នកនាំពាក្យអយ្យការអមសាលាដំបូងខេត្តបន្ទាយមានជ័យ ថ្លែងពីល្ងាចម្សិលមិញថា៖ «ជនសង្ស័យត្រូវបានតុលាការសម្រេចឃុំខ្លួនបណ្ដោះអាសន្ននៅពន្ធនាគារខេត្តបន្ទាយមានជ័យក្នុងនោះជនសង្ស័យម្នាក់ត្រូវចោទពីបទចោរកម្ម តាមបញ្ញត្តិមាត្រា ៣៥៦ នៃក្រមព្រហ្មទណ្ឌ និង ២ នាក់ទៀតត្រូវចោទពីបទទទួលផលចោរកម្មតាមបញ្ញត្តិមាត្រា ៤០០ នៃក្រមព្រហ្មទណ្ឌ»៕