ក្រចេះ: បុរស ៤ នាក់ត្រូវបាននគរបាលយុត្តិធម៌ខេត្តក្រចេះនាំខ្លួនមកសាកសួរ ដោយសង្ស័យពាក់ព័ន្ធនឹងករណីឃាតកម្មបាញ់សម្លាប់មនុស្សមួយគ្រួសារមានគ្នា ៤ នាក់រួចដុតផ្ទះរំលាយសាកសពដើម្បីបំបាត់ភ័ស្ដុតាង។ នេះបើតាមមន្ត្រីនគរបាលម្នាក់ដែលកំពុងចាត់ការតាមនីតិវិធីលើសំណុំរឿងនេះ។
លោក អ៊ុំ ភី ស្នងការរងខេត្តក្រចេះទទួលបន្ទុកផ្នែកព្រហ្មទណ្ឌបានប្រាប់ភ្នំពេញប៉ុស្តិ៍កាលពីម្សិលមិញថា បុរសសង្ស័យទាំង ៤ នាក់រួមមានឈ្មោះ ចឹក ណូ អាយុ ៥០ ឆ្នាំ, ចឹក ម៉ៅ អាយុ ៤៦ ឆ្នាំ, ចឹក លឹមស្រេង អាយុ ២០ ឆ្នាំ (អ្នកទាំង ៣ រស់នៅភូមិប្អៀរ ឃុំថ្មី ស្រុកចិត្របុរី ខេត្តក្រចេះ) ចំណែកបុរសម្នាក់ទៀតឈ្មោះ ម៉ៅ ញ៉ាញ់ អាយុ ១៧ ឆ្នាំរស់នៅរាជធានីភ្នំពេញ ជាសន្តិសុខ ក្រុមហ៊ុនហនុមានមានប្ញទ្ធិ។
លោក ភី បានបញ្ជាក់ថា៖ «ក្រុមមន្ត្រីនគរបាលយុត្តិធម៌កំពុងដំណើរការនីតិវិធីសាកសួរបុរសទាំង ៤ នាក់ ហើយមកទល់ពេលនេះនៅពុំទាន់ទទួលបានចម្លើយសារភាព ឬចម្លើយគួរឲ្យសង្ស័យណាមួយពាក់ព័ន្ធនឹងអំពើឃាតកម្មនេះនៅឡើយទេ»។
លោក ភី បន្តថាទោះជាបែបណាក្រុមមន្ត្រីនគរបាលជំនាញកំពុងបន្តសួរតាមនីតិវិធីច្បាប់។
យោងតាមរបាយការណ៍បឋមរបស់នគរបាលមូលដ្ឋានដែលបានចុះទៅពិនិត្យដល់ទីកន្លែងកើតហេតុនៅចំណុចកោះប្រឹម ភូមិប្អៀរ ឃុំថ្មី ស្រុកចិត្របុរី ខេត្តក្រចេះកាលពីថ្ងៃទី ១១ ខែសីហា បានបង្ហាញថា ជនរងគ្រោះមួយគ្រួសារមានគ្នា ៤ នាក់គឺឪពុក-ម្ដាយ និងកូនតូចៗប្រុស-ស្រី ២ នាក់ត្រូវបានគេបាញ់សម្លាប់កាលពីយប់ថ្ងៃទី ៩ ខែសីហារួចដុតផ្ទះបំផ្លាញសាកសពដើម្បីបំបាត់ភ័ស្ដុតាង ឬបំភាន់ភ្នែកសមត្ថកិច្ចឲ្យយល់ច្រឡំថា ជាករណីភ្លើងឆេះផ្ទះ ប៉ុន្តែដោយមានការពិនិត្យល្អិតល្អន់ និងបានរកឃើញសម្បកកាទូសគ្រាប់កាំភ្លើង AK-47 មួយចំនួននៅកន្លែងកើតហេតុទើបសមត្ថកិច្ចចាត់ទុកករណីនេះថាជាអំពើ «ឃាតកម្មគិតទុកជាមុន»។
បើតាមរបាយការណ៍ដដែលជនរងគ្រោះក្នុងអំពើឃាតកម្មនេះរួមមានឈ្មោះ ឆុំ ឈាន អាយុ ៤៣ ឆ្នាំ និងភរិយាឈ្មោះ ជួន សុខនាង អាយុ ៣៨ ឆ្នាំព្រមទាំងកូនប្រុស ឈ្មោះ ឈាន ឈី អាយុ ១១ ឆ្នាំ និងកូនស្រី ឈ្មោះ ឈាន វណ្ណី អាយុ ៩ ឆ្នាំ ។
ចំពោះសំណាកសាកសពជនរងគ្រោះដែលមិនទាន់ឆេះអស់ត្រូវបានសមត្ថកិច្ចកប់ទុកនៅលើដីនៃទីតាំងផ្ទះរបស់ជនរងគ្រោះរីឯកម្ទេចឆ្អឹងមួយចំនួនត្រូវបានវេចខ្ចប់ទុកប្រគល់ជូនសាច់ញាតិ ដើម្បីនាំយកទៅធ្វើបុណ្យតាមប្រពៃណី។
ទាក់ទិននឹងបញ្ហានេះអ្នកនាំពាក្យសមាគមសិទ្ធិមនុស្សអាដហុកលោក ស៊ឹង សែនករុណា បានចាត់ទុកថាជាសញ្ញាបង្ហាញឲ្យឃើញពីការរីកសាយនៃអំពើហិង្សាក្នុងសង្គម និងការធ្លាក់ចុះនូវសីលធម៌ដែលទាមទារឲ្យអាជ្ញាធរពាក់ព័ន្ធបង្កើនការយកចិត្តទុកដាក់ និងផ្សព្វផ្សាយការអប់រំអំពីសីលធម៌ និងច្បាប់ឲ្យបានទូលំទូលាយ។
លោកបានបញ្ជាក់ថា៖ «ករណីឃាតកម្មសម្លាប់មនុស្សមួយគ្រួសារ និងដុតផ្ទះចោលបំបាត់ភ័ស្ដុតាងនេះបង្ហាញថាជនល្មើសមានចរិតឃោរឃៅព្រៃផ្សៃ មិនខ្លាចច្បាប់»។
ក្រៅពីនោះលោកក៏បានអំពាវនាវសុំឲ្យអាជ្ញាធរចាត់វិធានការឲ្យបានត្រឹមត្រូវតាមនីតិវិធីច្បាប់ប្រឆាំងទៅលើក្រុមជនដៃដល់ដើម្បីផ្ដល់យុត្តិធម៌ដល់ជនរងគ្រោះផងដែរ៕