.jpg)
ត្រាក់ទ័ររងការខូចខាត បន្ទាប់ពីភ្ជួរដីដើម្បីដាំដំឡូងមី ហើយប៉ះចំគ្រាប់មីនតោនបណ្ដាលឲ្យផ្ទុះ។ រូបថត CMAC
ឧត្ដរមានជ័យៈ មន្ត្រីនគរបាលមូលដ្ឋានបាននិយាយកាលពីម្សិលមិញថា បុរសម្នាក់បានរងរបួសយ៉ាងដំណំ បន្ទាប់ពីគាត់បើកត្រាក់ទ័រភ្ជួរដី ដើម្បីដាំដំឡូងមីហើយប៉ះចំគ្រាប់មីនតោនបណ្ដាលឲ្យផ្ទុះ។ ហេតុការណ៍នេះបានកើតឡើងកាលពីថ្ងៃទី ២៧ ខែ កុម្ភៈ ឆ្នាំ ២០២១ នៅចំណុចភូមិសាមគ្គី ឃុំត្រពាំងប្រិយ៍ស្រុកអន្លង់វែង ខេត្តឧត្តរមានជ័យ។
លោក ហ៊ីង ថឹង នាយនគរបាលប៉ុស្តិ៍ឃុំត្រពាំងប្រីយ៍បានប្រាប់ ភ្នំពេញ ប៉ុស្តិ៍ថា បុរសរងគ្រោះក្នុងហេតុការណ៍ដ៏អាក្រក់នេះ ឈ្មោះ អុង សិលា អាយុ ២៥ ឆ្នាំ មានលំនៅក្នុងភូមិអានុក ឃុំចារឈូក ស្រុកអង្គរជុំ ខេត្តសៀមរាប។ គាត់បានទិញដីស្រែគេនៅក្នុងតំបន់កើតហេតុកាលពីឆ្នាំមុន។
លោកបានថ្លែងថា៖ «នៅថ្ងៃកើតហេតុ គាត់បានយកត្រាក់ទ័រទៅភ្ជួររាស់ដីស្រែនោះ ដើម្បីដាំដំឡូងមី។ គាត់ទើបតែភ្ជួរបាន ១ គន្លងរៀបនឹងបត់ចូលគន្លងទី២ ក៏ប៉ះចំគ្រាប់មីន បណ្ដាលឲ្យផ្ទុះដាច់កង់មុខ បណ្ដាលឲ្យក្រឡាប់ត្រាក់ទ័រ បោកទៅលើដី បង្កឲ្យគាត់រងរបួសបែកច្រមុះនិងត្រូវកម្ទេចដីចូលភ្នែក ប៉ុន្តែមិនបង្កឲ្យគាត់ពិការនោះទេ»។
លោក ថឹង បានបន្តថា ក្រោយកើតហេតុជនរងគ្រោះត្រូវបានសមត្ថកិច្ចនិងក្រុមគ្រួសារដឹកតាមរថយន្តទៅកាន់មណ្ឌលសុខភាពត្រពាំងតាវ ដើម្បីជួយលាងរបួស។ បន្ទាប់មកគាត់ត្រូវបានបុគ្គលិកសុខាភិបាលនៃមណ្ឌលសុខភាពនោះជួយអន្តរាគមន៍ បញ្ជូនបន្តទៅកាន់មន្ទីរពេទ្យបង្អែកស្រុកអន្លង់វែងដើម្បីពិនិត្យព្យាបាល។
នេះជាជនរងគ្រោះទី៣ ដោយសារករណីផ្ទុះគ្រាប់មីន នៅស្រុកអន្លង់វែង ក្នុងរយៈពេល ២ ខែឆ្នាំ ២០២១។ កាលពីថ្ងៃទី ១៣ ខែ កុម្ភៈ ឆ្នាំ ២០២១ កន្លងទៅនេះ នាយកសាលាបឋមសិក្សាលំទងឈ្មោះ ស៊ុម គង់ អាយុ ៤២ ឆ្នាំ មានលំនៅក្នុងភូមិភូមិលំទងចាស់ ឃុំលំទង ស្រុកអន្លង់វេង និងអ្នកបើកបរគ្រឿងចក្រអេស្កាវ៉ាទ័រម្នាក់ឈ្មោះ លេខ ឡៃ អាយុ ១៦ ឆ្នាំ បានរងរបួសធ្ងន់និងស្រាល បន្ទាប់ពីគ្រឿងចក្របានជីកកាយប្រឡាយហ៊ុមព័ទ្ធដីចម្ការរបស់គាត់ ប៉ះចំគ្រាប់មីនបណ្ដាលឲ្យផ្ទុះ ដាច់ច្រវាក់ម្ខាងហើយបំណែកគ្រាប់បានខ្ទាតប៉ះត្រូវពួកគាត់ពិសេសលោក ស៊ុម គង់ ដែលឈរនៅជិតគ្រឿងចក្រនោះ៕
