.jpg)
សិស្សសាលាបឋមសិក្សា ស្ទឹងមានជ័យ ពាក់ម៉ាស់ការពារការរីករាលដាលជំងឺកូវីដ ១៩ នាពេលកន្លងមក។ ហុង មិនា
ភ្នំពេញៈ លោកនាយករដ្ឋមន្ដ្រី ហ៊ុន សែន ថ្លែងថាថ្វីដ្បិតឆ្នាំនេះកម្ពុជា និងពិភពលោកកំពុងប្រយុទ្ធប្រឆាំងនឹងជំងឺកូវីដ ១៩ ដែលមិនទាន់មានភាពច្បាស់លាស់ពាក់ព័ន្ធនឹងជំងឺនេះ ក៏រដ្ឋាភិបាលកម្ពុជានៅតែប្រារព្ធពិធីបើកបវេសនកាលឆ្នាំសិក្សាថ្មី ២០២០-២០២១ នៅថ្ងៃនេះ ក្រោមទស្សនទានថ្មីគឺ «គន្លងជីវិតថ្មីក្នុងវិស័យអប់រំ»។
តាមរយៈលិខិតរបស់នាយករដ្ឋមន្ត្រីថ្ងៃនេះក្នុងឱកាសបើកបវេសនកាលថ្មី លោកក៏ថ្លែងអំណរគុណចំពោះថ្នាក់ដឹកនាំគ្រប់ជាន់ថ្នាក់ ក្រសួង ស្ថាប័នពាក់ព័ន្ធ អាជ្ញាធរដែនដី មាតាបិតា អ្នកអាណាព្យាបាល សប្បុរសជន គណៈគ្រប់គ្រងសាលារៀន។ ជាពិសេសលោកគ្រូ អ្នកគ្រូ ដែលបានពុះពារឧបសគ្គគ្រប់បែបយ៉ាងក្នុងការគាំទ្រ និងផ្ដល់នូវការរៀនសូត្រដល់សិស្សានុសិស្ស និស្សិតតាមគ្រប់រូបភាពក្នុងអំឡុងពេលនៃការប្រយុទ្ធនឹងជំងឺកូវីដ ១៩។
លោក ហ៊ុន សែន ថ្លែងថា៖ «ថ្ងៃទី ១១ ខែ មករា ឆ្នាំ ២០២១ គឺជាថ្ងៃបើកទំព័រថ្មីនៃការចាប់ផ្ដើមជីវិតសិក្សាដំបូងរបស់សិស្សានុសិស្ស និស្សិត និងកុលបុត្រ កុលធីតារបស់កម្ពុជា បន្ទាប់ពីបានឆ្លងកាត់ និងទទួលនូវបទពិសោធនៃការអប់រំក្នុងសម័យកូវីដ ១៩ ក្នុងឆ្នាំសិក្សា ២០១៩-២០២០ កន្លងមកនេះ ទោះបីជាក្នុងរូបភាពខុសគ្នាយ៉ាងណាក៏ដោយ»។
លោកនាយករដ្ឋមន្ដ្រីថ្លែងថា ចាប់តាំងពីខែមីនា ឆ្នាំ ២០២០ មកទល់ពេលនេះ រាជរដ្ឋាភិបាលកម្ពុជាបានដាក់ចេញនូវវិធានការដ៏មានប្រសិទ្ធភាព ឆ្លើយតបនឹងការបង្ការនិងទប់ស្កាត់ការរីករាលដាលនៃជំងឺកូវីដ១៩។
បើតាមលិខិតរបស់លោកនាយករដ្ឋមន្ដ្រី ក្រសួងអប់រំក៏បានអនុវត្ដការផ្អាកដំណើរការគ្រឹះស្ថានសិក្សាជាបណ្ដោះអាសន្ននៅកន្លែងណាដែលមានហានិភ័យនៃការឆ្លងជំងឺកូវីដ១៩ និងអនុញ្ញាតឱ្យបើកឡើងវិញជាដំណាក់កាលៗ។ ប្រការនេះអាចធានាបានទាំងសុវត្ថិភាព សុខភាព របស់លោកគ្រូ អ្នកគ្រូ សិស្សានុសិស្ស និងធានាបាននូវការរៀនសូត្ររបស់សិស្ស និស្សិត រហូតដល់ឆ្នាំសិក្សា ២០១៩-២០២០ ត្រូវបានប្រកាសបិទបញ្ចប់នៅចុងខែវិច្ឆិកា ឆ្នាំ ២០២០។
លោក ហ៊ុន សែន បញ្ជាក់ថា រាជរដ្ឋាភិបាលនឹងផ្ដល់អាទិភាពទី ១ លើវិស័យអប់រំ និងសុខាភិបាល បន្ទាប់ពីកម្ពុជាទទួលផលពីតំណក់ប្រេងដំបូងស្របពេលនៃខួប ២២ ឆ្នាំនៃនយោបាយឈ្នះ ឈ្នះរបស់លោកក្នុងការបញ្ចប់សង្គ្រាមទាំងស្រុងនៅកម្ពុជា។
លោកថ្លែងថា៖ «ក្រសួងអប់រំត្រូវបន្តដឹកនាំ និងអនុវត្ដនូវទស្សនទាន ថ្មី “គន្លងជីវិតថ្មីក្នុងវិស័យអប់រំ” ដោយគិតគូរអំពីជម្រើសឱ្យបានច្រើនក្នុងការផ្ដល់សេវាអប់រំ។ ជាពិសេសដំណើរការបង្រៀន និងរៀន ដែលមានភាពទន់ភ្លន់ និងធ្វើវិមជ្ឈការនៃសេវាអប់រំ អាស្រ័យទៅតាមទីតាំងភូមិសាស្ដ្រ ស្ថានភាពនៃហានិភ័យឆ្លងរីករាលដាលកូវីដ១៩ និងស្ថានភាពអប់រំ»។
លោក រស់ សុវាចា អ្នកនាំពាក្យក្រសួងអប់រំថ្លែងពីម្សិលមិញថា ក្រសួងអប់រំ បើកបវេសនកាលឆ្នាំសិក្សា ២០២០-២០២១ នៅថ្ងៃ ១១ មករា ២០២១ កម្រិតទូទាំងប្រទេស។ សាលារៀនមួយនៅក្នុងរាជធានីភ្នំពេញនៅបន្តប្រើប្រាស់ជាមណ្ឌលចត្តាឡីស័កតែមិនប៉ះពាល់ដល់ដំណើរការរៀន និងបង្រៀនរបស់សិស្សទេ ដោយសារសិស្សសាលានោះត្រូវបានបង្វែរឱ្យទៅរៀននៅសាលារៀនផ្សេង ដែលមានទីតាំងនៅក្បែរនោះ។
លោកថ្លែងថា៖ «សាលារៀនមួយចំនួនតូចស្ថិតនៅតាមព្រំដែនកម្ពុជា-ថៃ ក៏នៅបន្តប្រើប្រាស់ជាមណ្ឌលចត្តាឡីស័កដែរ។ ក្រសួងអប់រំបានប្រគល់សិទ្ធិសម្រេចជូនមន្ទីរអប់រំ សហការដោះស្រាយជាមួយអាជ្ញាធរមូលដ្ឋាន ករណីសាលារៀនដែលដើរតួនាទីជាមណ្ឌលចត្តាឡីស័ក»។
លោក លី សារី អភិបាលរង និងជាអ្នកនាំពាក្យរដ្ឋបាលខេត្ដបន្ទាយមានជ័យឱ្យដឹងពីម្សិលមិញថា បច្ចុប្បន្នខេត្ដបន្ទាយមានជ័យនៅតែមានពលករចំណាកស្រុកត្រឡប់មកពីប្រទេសថៃវិញក្នុង ១ ថ្ងៃមានប្រមាណ ២០-៣០ នាក់ពលរដ្ឋ ចំណាកស្រុកកំពុងធ្វើចត្ដាឡីស័កមានចំនួនជាង ១ ពាន់នាក់។
លោកថ្លែងថា៖ «ខេត្ដយើងបានយកសាលារៀននៅតាមស្រុកជាប់ព្រំដែនប្រហែល ៧ សាលា សម្រាប់ធ្វើចត្ដាឡីស័កពលករចំណាកស្រុកមកពីប្រទេសថៃ។ យើងប្រាកដជាត្រូវពន្យារពេលឱ្យសិស្សចូលរៀនសិនហើយ»។
លោក ប៉ិច បូឡែន ប្រធានក្រុមប្រឹក្សាភិបាលសហព័ន្ធសេវាអប់រំនៅកម្ពុជា ថ្លែងថា៖ «សាលារៀននៅវិស័យឯកជនយើងក៏បានអនុវត្ដតាមការណែនាំស្ដង់ដាសុខភាពរបស់ក្រសួងអប់រំ និងក្រសួងសុខាភិបាលបានល្អដែរ។ សាលារៀនរដ្ឋបានអនុវត្ដស្ដង់ដាការបង្រៀនបែបគន្លងជីវិតថ្មីក្នុងវិស័យអប់រំបានល្អ»៕
