ភ្នំពេញៈ បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ប្រមាណជាង ១៥០ នាក់ បាននាំគ្នាមកតវ៉ានៅក្រសួងអប់រំកាលពីម្សិលមិញដើម្បីទាមទារឱ្យពិនិត្យលើលទ្ធផលប្រឡងឡើងវិញ ដោយហេតុពួកគេអះអាងថាលទ្ធផលមានបញ្ហា។
បេក្ខជនម្នាក់ៗបានដាក់ញតិ្តដល់ក្រសួងដើម្បីឲ្យត្រួតពិនិត្យ និងពិចារណាលទ្ធផលឡើងវិញ ក្រោយមកទើបរំសាយការប្រមូលផ្ដុំ។
បេក្ខជន សុខ ដានីយ៉ែល ដែលទទួលបានលទ្ធផលធា្លក់បានប្រាប់ភ្នំពេញប៉ុស្តិ៍កាលពីម្សិលមិញថា គេធ្វើបានច្រើនក្នុងពេលប្រឡង តែលទ្ធផលទទួលបាន F ជាច្រើនមុខវិជ្ជាដែលលទ្ធផលនេះមិនស័ក្តិសមទៅនឹងអ្វីដែលគេបានធ្វើ។
បេក្ខជន សុខ ដានីយ៉ែល បានថ្លែងថា៖ «អ្នកខ្លះជាប់តែ ២ មុខទេ ហើយគេជាប់។ តែអ្នកខ្លះ (ជាប់) ២ មុខធ្លាក់បាត់...។ និយាយទៅ ខ្ញុំចង់តវ៉ាទាំងអស់ ៥ មុខហ្មង គណិត រូប គីមី ជីវៈ ហើយប្រវត្តិ»។
ក្នុងលក្ខខណ្ឌសុំមិនបញ្ចេញឈ្មោះ បេក្ខនារីដែលប្រឡងធ្លាក់ដែរបានប្រាប់ភ្នំពេញប៉ុស្តិ៍កាលពីម្សិលមិញថា ការដែលនាងមកតវ៉ានេះ ព្រោះចង់ដឹងមូលហេតុដែលក្រសួងមិនបញ្ចេញលំដាប់ពិន្ទុនេះ។
បេក្ខនារីរូបនេះថ្លែងថា៖ «ការមិនបញ្ចេញលំដាប់ពិន្ទុនេះធ្វើឱ្យខ្ញុំមិនបានដឹងថា ទទួលបានពិន្ទុប៉ុន្មាននោះទេ ហើយលើសពីនេះ ខ្ញុំមិនជឿថា មុខវិជ្ជា ៣ មានរូបវិទ្យា គីមីវិទ្យា និងប្រវតិ្តវិទ្យាទទួលបានលទ្ធផលធ្លាក់នោះទេ ព្រោះខ្ញុំជឿជាក់ថា ខ្ញុំធ្វើមកបានច្រើន។ មានចម្លើយមានអីត្រឹមត្រូវអ៊ីចឹង។ ខ្ញុំចង់ឱ្យក្រសួងបញ្ចេញអត្រាកំណែ និងលំដាប់ពិន្ទុដើម្បីផ្ទៀងផ្ទាត់ចម្លើយដែលខ្ញុំបានធ្វើជាមួយនឹងការចេញពិន្ទុពីក្រសួង ថាតើពិន្ទុដែលក្រសួងបានកែត្រឹមត្រូវឬទេ?»។
បេក្ខជនមួយរូបទៀតដែលប្រឡងជាប់និទ្ទេស C ដែលសុំមិនបញ្ចេញឈ្មោះ បានប្រាប់ភ្នំពេញប៉ុស្តិ៍ថា ការមកតវ៉ានេះព្រោះមុខវិជ្ជាគណិតវិទ្យាដែលគេបានទទួលបានពិន្ទុទាបខុសពីការគិតគឺទទួលបាន D។
លោកបញ្ជាក់ថា៖ «ខ្ញុំសិស្សពូកែដែរ។ ណាមួយវិញ្ញាសាគណិតដែលខ្ញុំប្រឡងនៅថ្ងៃប្រឡងហ្នឹង ខ្ញុំធ្វើបានទាំងអស់ ៩៥ ភាគរយ។ ហើយប្រាកដត្រូវ ៨០ ភាគរយ។ គណិតខ្ញុំរំពឹងចន្លោះអត្រាពិន្ទុពី ១០០ ទៅ ១១៥ ពី B ទៅ A»។
បេក្ខនារី លិន សូលក្ខបញ្ញា ដែលទទួលបានលទ្ធផលធ្លាក់បានប្រាប់ភ្នំពេញប៉ុស្តិ៍ដោយបង្ហាញការមិនសប្បាយចិត្តនឹងលទ្ធផលប្រឡងរបស់នាងនេះទេ ពីព្រោះវាផ្ទុយពីអ្វីដែលនាងធ្លាប់រំពឹងថានឹងបានទទួលបានលទ្ធផលជាប់។
សូលក្ខបញ្ញា ថ្លែងថា៖ «ខ្ញុំទទួលមិនបានទេចំពោះលទ្ធផលនេះ ព្រោះខ្ញុំខំប្រឹងរៀនដូចសិស្សដទៃទៀតដែរ បែរជាប្រឡងធ្លាក់ រីឯសិស្សដទៃប្រឡងជាប់ទៅវិញ។ ខ្ញុំបានយកអ្វីដែលបានធ្វើនៅពេលប្រឡងមកផ្ទៀងផ្ទាត់ឡើងវិញ ហើយឃើញថាត្រូវដែលអាចទទួលបានលទ្ធផលជាប់បាន តែលទ្ធផលបែរជាធ្លាក់ទៅវិញ»។
លិន សូលក្ខបញ្ញា ថ្លែងថា៖ «ខ្ញុំរៀន ហើយនៅតែធ្លាក់។
អ៊ីចឹងខ្ញុំត្រូវការយុត្តិធម៌ដើម្បីឱ្យជួយកែឡើងវិញ»។
ការប្រកាសលទ្ធផលប្រឡងបានបញ្ចប់កាលពីថ្ងៃអង្គារដែលបេក្ខជនចំនួន ៧៩ ០៥២ នាក់ស្មើនឹង ៦៨,៦២ ភាគរយបានប្រឡងជាប់ក្នុងចំណោមបេក្ខជនសរុបចំនួន ១១៧ ០៤៣ នាក់គឺកើនឡើង ១,៥៥ ភាគរយបើធៀបនឹងឆ្នាំមុន។
លោក រស់ សុវាចា អ្នកនាំពាក្យក្រសួងអប់រំបានប្រាប់ភ្នំពេញប៉ុស្តិ៍កាលពីថ្ងៃពុធថា ក្រសួងអប់រំមិនមានគោលការណ៍បើកចំហជូនបេក្ខជនដូចកាលពីឆ្នាំមុននោះទេ។ ក្រសួងយល់ពីមនោសញ្ចេតនារបស់បេក្ខជន និងក្រុមគ្រួសារ ក្រោយពីទទួលលទ្ធផលប្រឡងបាក់ឌុបនីមួយៗ។
លោក វាចា បន្តថា ជាទូទៅក្រសួងស្វាគមន៍មតិរិះគន់ស្ថាបនា និងឆ្លើយតបតាមភាពចាំបាច់ និងតាមគោលការណ៍ ច្បាប់ យុត្តិធម៌ តម្លាភាព និងលទ្ធផលអាចទទួលយកបាន។
លោក រស់ សុវាចា បញ្ជាក់ថា៖ «សុក្រឹតភាព និងប្រសិទ្ធភាពនៃគ្រប់ដំណាក់កាលប្រឡងឆ្នាំនេះបានមកពីកិច្ចសហការរបស់គ្រប់ភាគីពាក់ព័ន្ធ ជាពិសេសក្រុមការងារកំណែក្រដាសកិច្ចការបេក្ខជន ក្រុមការងារស្រង់បូកពិន្ទុដោយកុំព្យូទ័រ និងពិនិត្យផ្ទៀងផ្ទាត់ពិន្ទុ។ ដូច ៥ ឆ្នាំកន្លងមកក្រសួងក៏បានទទួលកិច្ចសហការពីអង្គភាពប្រឆាំងអំពើពុករលួយ ក្រសួងមហាផ្ទៃ សហភាពសហព័ន្ធយុវជនកម្ពុជា និងក្រសួងស្ថាប័ននានា»។
លោកនាយករដ្ឋមន្ត្រី ហ៊ុន សែន បានបញ្ជាឱ្យទិញ IPad ដល់សិស្សជាប់និទ្ទេស A ម្នាក់ ១ គ្រឿង។ នេះបើតាមការបញ្ជាក់ពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មានដែលបានបង្ហោះតាមហ្វេសប៊ុកកាលពីថ្ងៃពុធ។
ឆ្នាំនេះបេក្ខជនដែលប្រឡងជាប់និទ្ទេស A មាន ៤៤៣ នាក់កើនឡើង ៣៥ នាក់បើធៀបនឹងឆ្នាំមុនដែលមាន ៤០៨ នាក់ មាន ២១ រាជធានី-ខេត្ត។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនឯករាជ្យកម្ពុជាបានប្រាប់ភ្នំពេញប៉ុស្តិ៍កាលពីថ្ងៃពុធថា ក្រសួងអប់រំគួរតែពិនិត្យនូវវិញ្ញាសាដែលសិស្សានុសិស្សមិនអាចទទួលយកបាន។ ក្រសួងគួរតែយកចិត្តទុកដាក់ខ្ពស់ ដើម្បីឱ្យពួកគាត់អស់ចិត្ត និងកុំឱ្យពួកគាត់មានវិប្បដិសារី ពីព្រោះរយៈពេល ១២ ឆ្នាំទម្រាំតែពួកគាត់បានប្រឡងបាក់ឌុប។
លោកស្រី អ៊ុក ឆាយ៉ាវី បញ្ជាក់ថា៖ «អ្វីដែលធ្វើឱ្យគាត់ទុកចិត្តបំផុត [គឺ] បានឃើញថា យើងទទួលខុសត្រូវខ្ពស់ចំពោះវិញ្ញាសាដែលគាត់ធ្វើ។ យើងអត់អាចធ្វេសប្រហែស ឬក៏បន្ទោសលើបច្ចេកទេសកុំព្យូទ័រ ព្រោះអីរដ្ឋមន្ត្រីក្រសួងអប់រំបានមានប្រសាសន៍ហើយថា មិនឱ្យមានការខុសឆ្គងទៀតទេ។ ដូច្នេះ បើសិនជាមានសិស្សានុសិស្សយើងចង់ឱ្យមើល [ពិនិត្យមើល] សំណៅឯកសារគាត់ម្តងទៀត គួរយើងអ្នកដែលទទួលខុសហើយនិងត្រូវ ត្រូវតែបញ្ជាក់ភាពស្មោះត្រង់»៕