The Phnom Penh Post Search

Search form




Logo of Phnom Penh Post newspaper Phnom Penh Post - បេក្ខជនម្នាក់ឆ្លងទន្លេពេលប្រឡង ខណៈរដ្ឋមន្ត្រីសរសើរពីដំណើរការ

បេក្ខជនម្នាក់ឆ្លងទន្លេពេលប្រឡង ខណៈរដ្ឋមន្ត្រីសរសើរពីដំណើរការ

Content image - Phnom Penh Post
មន្ត្រី​អប់រំ​កំពុង​ឆែកឆេរ​បេក្ខជ​នចូល​ប្រឡង ក្រែង​មាន​សំណៅ​ឯកសារ នៅវិទ្យាល័យស៊ីសុវត្ថិ។ ហេង ជីវ័ន

បេក្ខជនម្នាក់ឆ្លងទន្លេពេលប្រឡង ខណៈរដ្ឋមន្ត្រីសរសើរពីដំណើរការ

ភ្នំពេញៈ បេក្ខជនប្រឡងបាក់ឌុបម្នាក់បានឆ្លងទន្លេចំពេលប្រឡង ខណៈជាង ១៥០ នាក់ បន្ថែមទៀត បានបោះបង់ការប្រឡងពីម្សិលមិញ រីឯបេក្ខជន ៦ នាក់ ត្រូវបានរកឃើញជាប់ពាក់ព័ន្ធនឹងគ្រឿងញៀនមុនពេលប្រឡង ហើយក្នុងនោះ ៣ នាក់ត្រូវបានសមត្ថកិច្ចឃុំខ្លួន មិនអនុញ្ញាតឲ្យចូលប្រឡង។

ក្រោយការប្រឡងបាក់ឌុបបានបញ្ចប់រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានឲ្យដឹងថា តួលេខនៃអ្នកបោះបង់ការប្រឡងបានកើនពី ១៤៣១ នាក់ នៅថ្ងៃទី ១ ដល់ ១៥៨៩ នាក់នៅថ្ងៃទី ២ ពោលគឺកើន ១៥៨ នាក់ ប៉ុន្តែតិចជាងឆ្នាំ ២០១៤ ដែលជាឆ្នាំដំបូងនៃការធ្វើកំណែទម្រង់ប្រព័ន្ធអប់រំនាពេលប្រឡង។

លោកថា៖ «តួលេខនេះតិចជាងឆ្នាំទៅ ដែលឆ្នាំនេះ អ្នកបោះបង់ភាគច្រើនជាបេក្ខជនស្វ័យរិន និងខ្លះជាសិស្សធម្មតា។ ខ្ញុំគិតថា ធម្មតា សិស្សដែលអវត្តមាន គឺបណ្តាលមកពីមិនមានទំនុកចិត្តចំពោះថ្ងៃដំបូង គាត់អត់ពូកែ ហើយគាត់គិតថា មិនអាចធ្វើបានទៀត ទើបថ្ងៃទី ២ នេះ គាត់បោះបង់បន្ថែមទៀត»។

អ្នកនាំពាក្យក្រសួងអប់រំ លោក រស់ សាលីន បានឲ្យដឹងថា តួលេខនៃបេក្ខជនប្រឡងដែលមានអាការខ្យល់គរ និងសន្លប់នៅថ្ងៃប្រឡងទី ២ មានសរុប ៤៤ នាក់ ក្នុងនោះ ២ នាក់ មិនអាចបន្តការប្រឡងនិងត្រូវបានបញ្ជូនទៅសង្គ្រោះនៅមន្ទីរពេទ្យ។ ក្រៅពីនោះ ក៏មានបេក្ខនារីស្វ័យរិនម្នាក់នៅមណ្ឌលប្រឡងអនុវិទ្យាល័យ ជាស៊ីម ស្មាច់មានជ័យ ខេត្តកោះកុង ដែលឈឺពោះឆ្លងទន្លេអំឡុងពេលប្រឡងនិងត្រូវបានបញ្ជូនទៅពេទ្យផងដែរ។

លោកថា៖ «ដោយសារគាត់ជាបេក្ខជនស្វ័យរិន មានន័យថា មកប្រឡងបំពេញវិជ្ជា អ៊ីចឹងជាគោលការណ៍គឺក្រសួងមិនអនុញ្ញាតឲ្យប្រឡងម្តងទៀតនោះទេតែអាចប្រឡងឆ្នាំក្រោយបាន»។

ទាក់​ទិន​នឹង​ការប្រឡង​បាក់​ឌុប​ឆ្នាំនេះ ប្រធាន​អង្គភាព​ប្រឆាំង​អំពើ​ពុក​រលួយ លោក ឱម យ៉ិនទៀង បាន​ឲ្យ​ដឹង​ពី​ម្សិល​មិញ​នេះ​ថា បេក្ខជន​សរុប ៦នាក់ ត្រូវបាន​សមត្ថកិច្ចរ​ក​ឃើញ​មាន​ជាប់​ពាក់ព័ន្ធ​នឹង​គ្រឿង​ញៀន ក្នុងនោះ ៣ នាក់ ត្រូវ​សមត្ថ​កិច្ច​បង្ក្រាបបាន​នៅ​ខេត្ត​កំពង់ចាម និង ៣ នាក់​ទៀត ត្រូវបាន​សមត្ថកិច្ច​ឃាត់​ខ្លួន ខណៈ​បង្ក​ហឹ​ង្សា​វាយតប់​​គ្នា នៅ​ថ្ងៃ​ពិនិត្យ​ឈ្មោះ​ប្រឡង​នៅ​មណ្ឌល​ប្រឡង​មួយ​ក្នុង​ខេត្ត​ត្បូងឃ្មុំ។

លោក​ថា៖ «សម្រាប់​បេក្ខជន​ ៣ ​នាក់ នៅ​ខេត្ត​កំពង់ចាម គឺ​សមត្ថកិច្ច បាន​អនុគ្រោះ​ឲ្យ​ចូល​ប្រឡង​ក្រោយ​ការអប់រំ និង​បាន​តាម​ដាន​ពីរ​ថ្ងៃ​ពេញ អំឡុង​ពេល​ប្រឡង ប៉ុន្តែ ៣ នាក់​ទៀត ដែល​បង្ក​ហិង្សា គឺ​បទល្មើស​ជាក់ស្តែង គឺ​សមត្ថកិច្ច បាន​ឃាត់​ខ្លួន​ឃុំ និង​កសាង​សំណុំ​រឿង​បញ្ជូនទៅ​តុលាការ ពួកគេ​មិនត្រូវ​បានអនុញ្ញាត​ឲ្យ​មក​ប្រឡង​នោះទេ»។

គួររ​ម្លឹក​ថា ក្នុង​ដំណើរ​ការប្រឡង​ថ្ងៃ​ដំបូង យុវជន​ម្នាក់ ត្រូវបាន​អង្គភាព​ប្រឆាំង​អំពើពុករលួយ ឃាត់ខ្លួន​សួរនាំ ក្រោយ​រក​ឃើញ​ថា បាន​ក្លែង​អត្តសញ្ញាណ​ចូលទៅ​ប្រឡង​ជំនួស​បងប្រុស ប៉ុន្តែ​ត្រូវបាន​ដោះលែង​វិញ បន្ទាប់ពី​ពិនិត្យឃើញថា មិន​មាន​ឆន្ទៈ​ប្រព្រឹត្តល្មើស។

ក្រោយ​បញ្ចប់​ការ​ប្រឡង កាល​ពី​ល្ងាច​ម្សិល​មិញ​នេះ បេក្ខជន​ប្រឡង​ភាគច្រើន ហាក់​មាន​សុទិដ្ឋិនិយម​ចំពោះ​លទ្ធផល​ប្រឡង​ក្នុង​រយៈ​ពេល​ពីរ​ថ្ងៃ​នេះ ដោយ​អះ​អាង​ស្រដៀង​គ្នា​ថា សំណួរ​ប្រឡង​ហាក់​ងាយស្រួល​ក្នុងការ​ឆ្លើយ។

យ៉ាងណាក៏ដោយ លោករដ្ឋមន្ត្រីក្រសួងអប់រំ ក៏​បានវាយតម្លៃថា ដំណើរការប្រឡងបាក់ឌុបឆ្នាំនេះ គឺមានលក្ខណៈល្អប្រសើរ ខណៈអង្គការសង្គមស៊ីវិលចំនួនបី រួមមាន វិទ្យាស្ថានខ្មែរសម្រាប់អភិវឌ្ឍន៍ជាតិ (Kind) សម្ព័ន្ធគណនេយ្យភាពសង្គមអាស៊ីបូព៌ា (ANSA-EAP) និងសម្ព័ន្ធដើម្បីសុចរិតភាព និងគណនេយ្យភាពសង្គម (CISA) ចេញសេចក្តីថ្លែងការណ៍ពីម្សិលមិញក្រោយការប្រឡងបានបញ្ចប់ ដោយថា ការប្រឡងមានភាពល្អប្រសើរ។

តាមគម្រោង​ ក្រសួងអប់រំ លទ្ធផលប្រឡងបាក់ឌុបនឹងប្រកាសនៅថ្ងៃ ១៥ កញ្ញា ក្នុងរាជធានីភ្នំពេញនិងខេត្តកណ្តាល និងតាមបណ្តាខេត្តផ្សេងៗនៅថ្ងៃទី ១៦ ខែ កញ្ញា ហើយគ្មានការប្រឡងលើកទី ២ ទេ៕

អត្ថបទគួរចាប់អារម្មណ៍