ភ្នំពេញៈ ក្រសួងអប់រំ យុវជន និងកីឡា បានប្រកាសពីការកម្រិតវិន័យរហូតដល់មានការបណ្តេញចេញមិនឲ្យប្រឡងសញ្ញាបត្រមធ្យមសិក្សាទុតិយភូមិបាក់ឌុប សម្រាប់ការប្រឡងនៅឆ្នាំនេះប្រសិនបើរកឃើញថា បេក្ខជនមានបំណងលួចចម្លង។
យោងតាមប្រកាសដែលក្រសួងអប់រំ បានផ្សព្វផ្សាយតាមរយៈហ្វេសប៊ុកកាលពីថ្ងៃពុធ បានឱ្យដឹងថា បេក្ខជនដែលបានប្រព្រឹត្តនូវអ្វីដែលចាត់ទុកថា មានបំណងលួចចម្លង នឹងមិនអនុញ្ញាតឱ្យចូលប្រឡងនោះទេ ហើយត្រូវបានកំណត់ឱ្យធ្លាក់ លើកលែងតែបេក្ខជនប្រគល់រាល់សៀវភៅឯកសារឬសំណៅឯកសារឱ្យគណៈមេប្រយោគមុនចូលមណ្ឌលប្រឡងឬបន្ទប់ប្រឡង។
អ្វីដែលក្រសួងកំណត់ថា មានបំណងលួចចម្លង នៅពេលដែលបេក្ខជនយកជាប់ ឬលាក់ជាប់នឹងខ្លួននូវឯកសារផ្សេងៗឬឧបករណ៍អេឡិចត្រូនិកជាដើម។ ប្រកាសរបស់ក្រសួងបន្តថា បេក្ខជនដែលធ្វើឱ្យខូចសណ្តាប់ធ្នាប់របៀបរៀបរយ នៃការប្រឡង និងប៉ះពាល់ដល់កិត្តិយសគណៈមេប្រយោគ នឹងមិនអនុញ្ញាតឱ្យចូលប្រឡង ហើយនឹងត្រូវឱ្យធ្លាក់ដោយស្វ័យប្រវត្តិ។
ក្នុងករណីខ្លះទៀត ដែលធ្វើខូចសណ្តាប់ធ្នាប់ប្រឡងបេក្ខជននឹងត្រូវបានផ្អាកមិនឱ្យប្រឡង ១ ឬ ២ ឆ្នាំបន្ទាប់។ ករណីចាំបាច់បេក្ខជននឹងត្រូវបញ្ជូនទៅកាន់ស្ថាប័នមានសមត្ថកិច្ចដើម្បីដោះស្រាយ។
លោក រស់ សុវាចា អ្នកនាំពាក្យក្រសួងអប់រំ បានប្រាប់ភ្នំពេញប៉ុស្តិ៍ ពីថ្ងៃព្រហស្បតិ៍ថា នៅមុនពេលប្រឡង គណ:គ្រប់គ្រងសាលារៀនផ្សព្វផ្សាយជូនបេក្ខជនប្រឡង ដោយបិទផ្សាយប្រកាសស្តីពីបទប្បញ្ញត្តិ និងកម្រិតវិន័យចំពោះបេក្ខជន ក្នុងការប្រឡងតាមសាលា និងមានប្រជុំរៀនសូត្រតាមសាលារួចហើយ។
លោកបញ្ជាក់ថា៖ «ក្រសួងផ្សព្វផ្សាយតាម Facebook របស់ក្រសួង។ ពេលប្រឡង (ក្រសួង) បិទផ្សាយប្រកាសខាងលើតាមមណ្ឌលប្រឡង»។
មាត្រា ៤៩ នៃច្បាប់ស្តីពីការអប់រំចែងថា ជនណាដែលប្រឡងជំនួស ឬបន្លំការប្រឡងត្រូវពិន័យអន្តរកាលពី ១ លានរៀន ទៅ ៥ លានរៀល។ ករណីមិនរាងចាល ជននោះ ត្រូវពិន័យអន្តរកាលជាប្រាក់ទ្វេដង ហើយត្រូវព្យួរការប្រឡង ២ ឆ្នាំ ឬហាមមិនឱ្យចុះឈ្មោះប្រឡងជាស្ថាពរ។ មាត្រា ៦០៥ នៃក្រមព្រហ្មទណ្ឌ ចែងថា ការសូកប៉ាន់ ត្រូវផ្តន្ទាទោសដាក់ពន្ធនាគារពី ៥ ទៅ ១០ ឆ្នាំ។
លោក អុឹម សុធី នាយកប្រតិបត្តិក្រុមប្រឹក្សាយុវជនកម្ពុជា បានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ប្រសិនបើក្រសួងបានធ្វើការណែនាំអំពីវិធានការប្រឡងដល់សិស្សតាំងពីដំណាក់កាលដំបូងគឺជាការល្អ។
លោកបញ្ជាក់ថា៖ «តែបើជិតដល់ថ្ងៃប្រឡង គាត់ចេញវិធានការ វាធ្វើឱ្យសិស្សទាំងអស់ជួនកាលយល់អត់ទាន់ច្បាស់ ក៏ជាបញ្ហាមួយដែរ ធ្វើឱ្យគាត់មានកំហុសអីដែរ»។
ការប្រឡងបាក់ឌុបឆ្នាំ ២០១៩ នេះនឹងមានរយៈពេល ២ ថ្ងៃ ចាប់ពីថ្ងៃទី ១៩ ដល់ ២០ ខែសីហា។ បេក្ខជនដែលបានដាក់ពាក្យប្រឡងមានចំនួន ១១៩ ២១៧ នាក់ ស្រី ៦១ ០៣១ នាក់ កើនឡើង ៥ ៨៥២ នាក់ បើធៀបនឹងការប្រឡងឆ្នាំមុន។ មណ្ឌលប្រឡងមានចំនួន ២០២ កើនឡើង ៦ មណ្ឌលបើធៀបនឹងឆ្នាំមុន។ សិស្សនឹងត្រូវប្រឡង ៧ មុខវិជ្ជា ខណៈដែលពួកគេរៀនមាន ១០ មុខវិជ្ជា។
ការប្រឡងបាក់ឌុបឆ្នាំនេះ អង្គភាពប្រឆាំងអំពើពុករលួយ (ACU) នឹងមិនដាក់ពង្រាយអ្នកសង្កេតការណ៍ប្រឡងដូចកាលពី ៥ ឆ្នាំមុននោះទេ តែស្នើឱ្យក្រសួងអប់រំពង្រឹងយន្តការប្រឡងគឺយន្តការអប្បមាទ (អ្នកចុះត្រួតពិនិត្យមណ្ឌលប្រឡង និងបន្ទប់ប្រឡង) ដោយមើលឃើញ សមាជិកគណៈកម្មការនៅមណ្ឌលកំណែប្រឡងមួយចំនួនពុំទាន់បានអនុវត្តតាមបទប្បញ្ញត្តិនៃការប្រឡងដូចជាការនាំយកទូរស័ព្ទដៃឧបករណ៍អេឡិចត្រូនិក កាបូប សម្ពៀត និងមានការធ្វេសប្រហែសក្នុងការបំពេញភារកិច្ច ក្រសួងក៏បានចេញនីតិវិធី និងយន្តការទប់ស្កាត់ និងគ្រប់គ្រងភាពមិនប្រក្រតី ដើម្បីជំរុញការអនុវត្តការងារឱ្យមានប្រសិទ្ធភាព និងបានផ្សព្វផ្សាយតាមហ្វេសប៊ុកកាលពីថ្ងៃពុធ។
លោក អុឹម សុធី បញ្ជាក់ថា កាលពីកន្លងទៅ លោកធ្លាប់ឃើញក្រសួងអប់រំមានកំហុសមួយចំនួន ទាក់ទងនឹងការកែវិញ្ញាសា ដែលធ្វើឱ្យសិស្សានុសិស្សតវ៉ា។ នេះជាមេរៀនមួយដែលក្រសួងគួរតែយកចិត្តទុកដាក់លើកិច្ចការនេះមែនទែន ព្រោះវាជាកិត្តិយសរបស់ក្រសួង។
លោក អុឹម សុធី បញ្ជាក់ថា៖ «ប្រសិនជាក្រសួងមិនបានត្រួតពិនិត្យ និងយកចិត្តទុកដាក់ទេ ប្រហែលជាអាចធ្វើឱ្យប្រជាពលរដ្ឋបាក់ទឹកចិត្តលើប្រព័ន្ធអប់រំ»៕