.jpg)
បេសកជនចិន ១ ក្រុម ថតរូបនៅខាងក្រៅពិធីនៅកោះពេជ្រកាលពីម្សិលមិញ។ សហការី
ភ្នំពេញ: បេសកជនចិនប្រមាណជាង ២ ពាន់នាក់ បាននិងកំពុងធ្វើដំណើរមកកាន់ប្រទេសកម្ពុជាជាបន្ដបន្ទាប់ចាប់ពីថ្ងៃទី ២ ដល់ថ្ងៃទី ៨ ខែ មិថុនា ដើម្បីមកចូលរួមពិធីអបអរសាទរ «ឆ្នាំនៃវប្បធម៌ និងទេសចរណ៍កម្ពុជា-ចិន ២០១៩» ដែលរៀបចំឡើងរួមគ្នាជាលើកដំបូងនៅរាជធានីភ្នំពេញ ព្រមទាំងមានដំណើរទស្សនកិច្ចតាមរមណីយដ្ឋាននានា ខណៈមន្ត្រីកម្ពុជារំពឹងទទួលផលប្រយោជន៍ច្រើនពីកម្មវិធីនេះ។
លោក ជុក ជំនោរ ប្រធាននាយកដ្ឋានអភិវឌ្ឍន៍ និងផលិតផលទេសចរណ៍ នៃក្រសួងទេសចរណ៍ បានប្រាប់ភ្នំពេញប៉ុស្ដិ៍ កាលពីម្សិលមិញថា គណៈប្រតិភូក្រសួងវប្បធម៌ និងទេសចរណ៍ នៃសាធារណរដ្ឋប្រជាមានិតចិនដឹកនាំដោយលោក ចាង ស៊ុ អនុរដ្ឋមន្ត្រីក្រសួងវប្បធម៌ និងទេសចរណ៍ រួមជាមួយបេសកជនចិនប្រមាណជាង ២ ពាន់នាក់ បាននឹងកំពុងធ្វើដំណើរមកទស្សនកិច្ចនៅកម្ពុជា ចាប់ពីថ្ងៃទី ២ ដល់ថ្ងៃទី ៨ ខែ មិថុនា ដើម្បីអបអរសាទរ «ឆ្នាំនៃវប្បធម៌ និងទេសចរណ៍កម្ពុជា-ចិន ២០១៩» ដែលធ្វើឡើងរួមគ្នាជាលើកដំបូង ព្រមទាំងមានបង្កើតឲ្យមានព្រឹត្តិការណ៍ និងកម្មវិធីនានាជាច្រើនទៀត។
លោកបន្តថា បេសកជនចិនមួយចំនួន បានធ្វើដំណើរមកដល់កម្ពុជាជាបណ្ដើរៗហើយ តាមច្រកទ្វារអាកាសយានដ្ឋានអន្តរជាតិភ្នំពេញ និងសៀមរាប ដើម្បីចាប់ផ្ដើមដំណើរទស្សនកិច្ច នៅតាមតំបន់ទេសចរណ៍នានារបស់កម្ពុជា ដូចជារមណីយដ្ឋានអង្គរ និងរាជធានីភ្នំពេញ។
លោកបន្តថា នៅយប់ថ្ងៃទី ៤ ខែ មិថុនា គណៈប្រតិភូចិនទាំងនោះនឹងជួបពិភាក្សាជាមួយលោក ថោង ខុន រដ្ឋមន្ត្រីក្រសួងទេសចរណ៍ និងលោក អ៊ុក សុជាតិ រដ្ឋលេខាធិការក្រសួងវប្បធម៌ តំណាងលោកស្រីរដ្ឋមន្ត្រី ភឿង សកុណា នៅទីស្ដីការក្រសួងទេសចរណ៍។
លោកបន្តថា លុះដល់ល្ងាចថ្ងៃទី ៥ ខែ មិថុនា ក្រសួងទេសចរណ៍ និងក្រសួងវប្បធម៌ និងវិចិត្រសិល្បៈកម្ពុជា សហការជាមួយភាគីចិន នឹងរៀបចំការសម្ដែងសិល្បៈរួមគ្នាកម្ពុជា-ចិន នៅសាលមហោស្រពកោះពេជ្រ ដែលមានការអញ្ជើញលោក ប៊ិន ឈិន ឧបនាយករដ្ឋមន្ត្រីប្រចាំការ និងរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីតំណាងលោកនាយករដ្ឋមន្ត្រី ហ៊ុន សែន និងមានពិធីលៀងសាយភោជន៍ ស្វាគមន៍ជូនបេសកជនចិនទាំងអស់នាល្ងាចដដែលនោះ។
លោក ជំនោរ បញ្ជាក់ថា៖ «កិច្ចសហប្រតិបត្តិការរវាងក្រសួងវប្បធម៌ និងទេសចរណ៍ចិន និងក្រសួងទេសចរណ៍កម្ពុជា ស្របនឹងការកំណត់យកឆ្នាំ ២០១៩ ជាឆ្នាំវប្បធម៌ និងទេសចរណ៍កម្ពុជា-ចិន ដើម្បីជំរុញការផ្លាស់ប្ដូរវប្បធម៌ និងទេសចរណ៍រវាងប្រជាជាតិទាំង ២ កាន់តែខ្លាំងថែមមួយកម្រិតទៀត»។
លោក ហូ វណ្ឌី ទីប្រឹក្សាសភាពាណិជ្ជកម្មកម្ពុជា និងជាទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងថា វាជាការឆ្លើយតបរវាងទំនាក់ទំនងការទូតរដ្ឋាភិបាលកម្ពុជា និងចិន ដើម្បីទាញយកផលប្រយោជន៍រៀងៗខ្លួន។ ចំពោះភ្ញៀវចិនជាង ២ ពាន់នាក់នេះ គឺជាការរៀបចំដ៏ធំមួយប្រចាំឆ្នាំ។
លោកបន្តថា ព្រឹតិ្តការណ៍នេះ នឹងផ្ដល់ការចំណេញដល់កម្ពុជាច្រើន ចំពោះទំនាក់ទំនងការទូត ការផ្លាស់ប្ដូរវិស័យវប្បធម៌ សិល្បៈ និងការវិនិយោគលើវិស័យទេសចរណ៍។
លោកបញ្ជាក់ថា៖ «យើងទទួលបានការចំណេញច្រើនជាងផលប៉ះពាល់ បើមានប៉ះពាល់គឺ តិចតួចទេ ខ្ញុំឧទាហរណ៍មួយថាបើយើងទៅលេងសមុទ្រ គឺចំណេញអ្នកលក់ដូររកស៊ីនៅតំបន់ហ្នឹង ប៉ុន្ដែមានភ្ញៀវខ្លះក៏បន្ទោបង់ចូលសមុទ្រ ឬគាត់ចោលសំរាមនៅទីកន្លែងនានា។ អ៊ីចឹងគឺវាប៉ះពាល់តែប៉ុណ្ណឹងទេ»។
គួររំឭកថា កម្មវិធី «ឆ្នាំនៃវប្បធម៌ និងទេសចរណ៍កម្ពុជា-ចិន» នេះត្រូវបានផ្តួចផ្តើមឡើង ដោយក្រសួងវប្បធម៌ និងទេសចរណ៍ចិនសហការជាមួយក្រសួងទេសចរណ៍កម្ពុជា ដើម្បីពង្រឹង និងពង្រីកកិច្ចសហប្រតិបត្តិការរួមគ្នាលើផ្នែកទេសចរណ៍ និងវប្បធម៌រវាងប្រទេសទាំង ២ បន្ថែមទៀត មានដូចជា ការជំរុញការផ្សព្វផ្សាយទេសចរណ៍រួមគ្នា ការផ្លាស់ប្ដូរទស្សនកិច្ចសិក្សា ការបណ្ដុះបណ្ដាលធនធានមនុស្ស និងការសម្ដែងសិល្បៈរួមគ្នាជាដើម៕
