.jpg)
ដំណាំកញ្ឆាដែលពលរដ្ឋដាំត្រូវបានសមត្ថកិច្ចបំផ្លាញថ្ងៃទី ២៤ មីនា នៅខេត្តតាកែវ។ រូបថត នគរបាល
តាកែវៈ សមត្ថកិច្ចជំនាញខេត្តតាកែវបាននិងកំពុងស្រាវជ្រាវរកជនដែលលួចដាំដំណាំកញ្ឆាស្ថិតនៅក្នុងឃុំព្រះបាទជាន់ជុំ ឃុំសោម និងឃុំតាអូរ ស្រុកគិរីវង់ ខេត្តតាកែវ បន្ទាប់ពីដំណាំកញ្ឆាចំនួន ១៤ ទីតាំងដាំដុះលើផ្ទៃដីសរុប ៩៩៧១ ម៉ែត្រការ៉េ ត្រូវបានបង្ក្រាប និងកាប់ដុតបំផ្លាញចោលនៅនឹងកន្លែង ខណៈម្ចាស់កញ្ឆាកំពុងរត់គេចខ្លួន។
លោក សៅ សារុន ស្នងការរងនគរបាលខេត្តតាកែវប្រាប់ភ្នំពេញប៉ុស្ដិ៍នាថ្ងៃទី ២៥ មីនា ថាកាលពីថ្ងៃទី ២៤ ខែមីនាសមត្ថកិច្ចបានបង្ក្រាប និងកាប់កម្ទេចដុតបំផ្លាញចោលដំណាំកញ្ឆានៅនឹងកន្លែងត្រង់ចំណុចខ្នងភ្នំបាយ៉ងកោស្ថិតក្នុងភូមិសាស្ត្រ ឃុំព្រះបាទជាន់ជុំ ឃុំសោម និងឃុំតាអូរ ស្រុកគិរីវង់ចំនួន ១៤ ទីតាំង។ ដាំលើផ្ទៃដីដាំដុះសរុប ៩៩៧១ ម៉ែត្រការ៉េដោយបានបំផ្លាញអាងទឹកចំនួន ១០ អាងបំផ្លាញទុយោទឹកសម្រាប់ស្រោចស្រពកញ្ឆាចំនួន ១៥០០ ម៉ែត្រ និងដុតបំផ្លាញកញ្ឆាក្រៀមចំនួន ៨ គីឡូក្រាមផងដែរ។
លោកឲ្យដឹងថាក្នុងប្រតិបត្តិការនេះមានកម្លាំងនគរបាលខេត្តសហការជាមួយនគរបាលស្រុក និងទាហានវរសេនាតូចលេខ ៦០៣ សរុបចំនួន ១៥០ នាក់។
លោកបញ្ជាក់ថា៖ «ប្រតិបត្តិការនេះយើងអត់បានរាប់ចំនួនដើមកញ្ឆាទាំងអស់ហ្នឹងទេ ព្រោះវាមានចំនួនច្រើនពេកដោយយើងគ្រាន់តែទៅដល់ទីតាំងដំណាំហ្នឹង យើងចាប់ផ្ដើមដក កាប់ជាកំណាត់ៗ ហើយដុតបំផ្លាញចោលនៅនឹងកន្លែងតែម្ដង។ ប៉ុន្ដែចំពោះកញ្ឆាក្រៀមយើងបានថ្លឹងវាឃើញចំនួន ៨ គីឡូក្រាមហើយយើងក៏ដុតចោលនៅពេលហ្នឹងដែរ។ រីឯម្ចាស់ដំណាំបានរត់គេចខ្លួនបាត់អស់ ហើយសមត្ថកិច្ចយើងក៏កំពុងស្រាវជ្រាវឃាត់ខ្លួនដែរ»។
បើតាមមន្ត្រីនគរបាលរូបនេះថា សមត្ថកិច្ចជំនាញបានធ្វើការផ្សព្វផ្សាយ អប់រំ ណែនាំដល់លោកមេភូមិ មេឃុំ ជាអាជ្ញាធរនៅមូលដ្ឋានឲ្យជួយពន្យល់ទៅដល់ប្រជាពលរដ្ឋកុំឲ្យដាំដំណាំកញ្ឆាបន្តទៀត។ ព្រោះវាជាដំណាំខុសច្បាប់ និងបន្តស្រាវជ្រាវស្វែងរកចាប់ខ្លួនជនល្មើសដែលលួចដាំដើម្បីយកមកផ្តន្ទាទោសតាមច្បាប់។
លោក ហៀម ស្រ៊ីម អធិការរងនគរបាលស្រុកគិរីវង់ទទួលបន្ទុកផ្នែកគ្រឿងញៀនថ្លែងថា ករណីលួចដាំកញ្ឆានេះសមត្ថកិច្ចជំនាញបាននិងកំពុងតាមដានរកមុខសញ្ញាដែលលួចដាំ ដោយបានដាក់ការសង្ស័យលើពលរដ្ឋមួយចំនួនក្នុងមូលដ្ឋាននោះ។
លោកបានបន្តថា ដំណាំកញ្ឆាប្រើពេលដាំត្រឹមតែ ២ ឬ ៣ ខែប៉ុណ្ណោះ ហើយដោយសារលក់បានថ្លៃផងនោះទើបមានជនខិលខូចឆក់ឱកាសលួចដាំទាំងដឹងថា វាជាដំណាំខុសច្បាប់។ ទោះជាយ៉ាងណាសមត្ថកិច្ចជំនាញបានសហការជាមួយសមត្ថកិច្ចមូលដ្ឋានចុះបង្ក្រាបជាហូរហែ ព្រមទាំងធ្លាប់បានឃាត់ខ្លួនអ្នកដាំដំណាំកញ្ឆានេះទៀតផង។
លោកអធិការរងបញ្ជាក់ថា៖ «ពលរដ្ឋយើងមួយចំនួនបង្ខំចិត្តលួចដាំ បើទោះបីដឹងថាច្បាប់បានហាមក៏ដោយ ព្រោះលក់ទៅបានថ្លៃ។ យើងនៅតែបន្តចុះបង្ក្រាបដោយដក និងដុតបំផ្លាញចោល។ រីឯមនុស្សគឺយើងនឹងកសាងសំណុំរឿងបញ្ជូនទៅតុលាការដែរ»។
នាយប៉ុស្ដិ៍នគរបាលឃុំព្រះបាទជាន់ជុំលោក អិន វុធ ថ្លែងកាលពីថ្ងៃទី ២៥ មីនាថា សមត្ថកិច្ចលោកបានសហការជាមួយមន្ត្រីជំនាញស្រុកគិរីវង់ និងមន្ត្រីខេត្តក្នុងការបង្ក្រាប ប៉ុន្ដែលោកមិនមានរបាយការណ៍ទាក់ទងនឹងការងារនេះទេ។ លោកថាកន្លងមកសមត្ថកិច្ចលោកតែងតែសហការជាមួយមន្ត្រីជំនាញ ដើម្បីស្វែងរកជនសង្ស័យដែលដាំដំណាំកញ្ឆានេះ។
លោកបន្តថា ទីតាំងភូមិសាស្ត្រនៅចំណុចខ្នងភ្នំបាយ៉ងកោស្ថិតក្នុងភូមិសាស្ត្រឃុំព្រះបាទជាន់ជុំនេះជាកន្លែងមានអំណោយផលល្អក្នុងការលួចដាំកញ្ឆា ព្រោះមានព្រៃស្រោងក្រាស់ៗ ហើយមិនសូវមានថ្មធំៗដែលជាឧបសគ្គក្នុងការកាប់គាស់ដីដាំកញ្ឆាទេ។
លោក អិន វុធ បានបញ្ជាក់ថា៖ «ជនល្មើសតែងតែលួចដាំកញ្ឆានេះ យើងបង្ក្រាបជាហូរហែ គឺសមត្ថកិច្ចដកចោលផង និងដុតចោលផង ហើយខែមុននោះចាប់បានអ្នកដាំម្នាក់។ ប៉ុន្ដែអ្នកផ្សេងទៀតនៅតែមិនព្រមរាងចាលសោះ ព្រោះដាំដំណាំកញ្ឆានេះ គឺលក់ទៅបានតម្លៃថ្លៃជាងស្រូវប្រាំងគាត់។ អ៊ីចឹងបើទោះបីជាខុសច្បាប់ក៏គាត់នៅតែលួចដាំដែរ»៕
