.jpg)
នារីរងគ្រោះដែលបាត់ខ្លួនសង្ស័យអតីតសង្សារចាប់ពង្រត់។ រូបថត នគរបាល
បន្ទាយមានជ័យៈ មន្ត្រីប៉ូលិសកំពុងបន្តតាមដានករណីបាត់ខ្លួននារីម្នាក់ ដែលមានតួនាទីជាជំនួយការស្មៀនឃុំអូរបីជាន់ ក្នុងស្រុកអូរជ្រៅ ដែលត្រូវបានជនសង្ស័យមិនស្គាល់មុខ ២ នាក់ចាប់ខ្លួនកាលពីល្ងាចថ្ងៃទី ១៣ ខែមីនា ខណៈសមត្ថកិច្ចដាក់ការសង្ស័យជំហានដំបូងថាអាចត្រូវអតីតសង្សារចាស់របស់នារីរងគ្រោះចាប់ពង្រត់ ខណៈនាងជិតចូលរោងការជាមួយបុរសម្នាក់ផ្សេងទៀត។
លោក ណង សំរ៉ាំង នាយប៉ុស្តិ៍អូរបីជាន់បានប្រាប់ភ្នំពេញប៉ុស្តិ៍កាលពីម្សិលមិញថា នារីរងគ្រោះមានឈ្មោះ អ.ស.ន អាយុ ២៤ ឆ្នាំ ជាកូនកំព្រា បច្ចុប្បន្នរស់នៅជាមួយម្តាយមីងស្ថិតនៅក្នុងភូមិព្រៃចាន់ ឃុំអូរបីជាន់មានតួនាទីជាជំនួយការស្មៀនឃុំអូរបីជាន់ ស្រុកអូរជ្រៅ។ បើតាមលោក សំរ៉ាំង ក្រោយពីមានករណីចាប់នារីរងគ្រោះកម្លាំងនគរបាលស្រុកអូរជ្រៅ និងកម្លាំងនគរបាលប៉ុស្តិ៍រដ្ឋបាលអូរបីជាន់បានចុះធ្វើការស្រាវជ្រាវទៅដល់ផ្ទះជនសង្ស័យម្នាក់ក្នុងស្រុកសំពៅលូន ខេត្តបាត់ដំបងដែលគេស្គាល់ថាជាអតីតសង្សាររបស់នារីរងគ្រោះ។
លោកបញ្ជាក់ថា៖ «ប្រជាពលរដ្ឋនៅក្នុងភូមិបាននិយាយតៗគ្នាថា អាចជាការទៅតាមគ្នា។ ប៉ុន្តែសមត្ថកិច្ចយើង មិនទាន់ហ៊ានសនិ្នដ្ឋាននោះទេ ព្រោះរឿងជាក់ស្តែងនារីរងគ្រោះមានគេស្រឡាញ់គាត់ច្រើនកន្លងមក ហើយយើងមិនទាន់ដឹងខាងអ្នកណាចាប់នោះទេ។ គ្រាន់តែយើងកំពុងតែប្រមូលព័ត៌មាន ហើយអ្នកដែលសង្ស័យខ្លាំងនោះគឺបុគ្គលឈ្មោះ ផាន ដែលរស់នៅសំពៅលូន ប៉ុន្តែមិនទាន់រកឃើញនៅឡើយទេ»។
លោក តុល សារិន មេឃុំអូរបីជាន់ថ្លែងពីម្សិលមិញថា ក្នុងអំឡុងពេលកើតហេតុថ្ងៃទី ១៣ ខែមីនា នារីរងគ្រោះបានជិះម៉ូតូជាមួយក្មេងស្រីដែលមានឈ្មោះ លាង សុគន្ធា អាយុ ១០ ឆ្នាំ យកឡេទៅឲ្យគេនៅអូរបីជាន់។
លោកបន្តថា ពេលត្រឡប់មកវិញជិតដល់ផ្ទះ ស្រាប់តែមានជនសង្ស័យចំនួន ២ នាក់ មិនស្គាល់អត្តសញ្ញាណបានបើករថយន្តកាម៉ារីពណ៌ខ្មៅដែលមិនស្គាល់ស្លាកលេខបានហៅម៉ូតូឲ្យឈប់ ដើម្បីនិយាយគ្នា។
មេឃុំរូបនេះបន្ថែមថា៖ «រឿងនេះពិបាកធ្វើការសន្និដ្ឋានថា ជាករណីចាប់ពង្រត់ ឬក៏រត់តាមគ្នាណាស់ ព្រោះតាមការសាកសួរមកជនសង្ស័យ និងនារីរងគ្រោះមានមាឌប៉ុនៗគ្នា ហើយចាប់ដាក់ឡានក៏មិនប្រាកដថា ធ្វើឡើងស្រួលៗនោះទេ។ មិនដឹងថាក្នុងពេលនោះគាត់ព្រមឡើងឡើងតាមគេអត់?»។
តាមរបាយការណ៍របស់អធិការនគរបាលស្រុកអូរជ្រៅដែលដកស្រង់ដោយអគ្គស្នងការនគរបាលជាតិបានឲ្យដឹងថា តាមសម្តីរបស់ក្មេងស្រី លាង សុគន្ធា អាយុ ១០ ឆ្នាំ ដែលនៅកន្លែងកើតហេតុនិយាយថា៖ «ពេលនោះនារីរងគ្រោះនិយាយថា យើងមិនដែលស្គាល់គ្នាផង ហើយជនសង្ស័យម្នាក់បានចុះពីលើរថយន្តចាប់នារីរងគ្រោះដោយនិយាយថា អូនឯងធ្វើបាបចិត្តបងណាស់រួចទាញចូលក្នុងរថយន្តបើកចេញទៅបាត់»។
ចំណែកអតីតមេឃុំអូរបីជាន់លោក សួង មឿន ដែលជាចាស់ទុំនៅក្នុងភូមិ បានប្រាប់ថា នារីរងគ្រោះជាមនុស្សដែលសុភាពរាបសា និងមានសម្រស់ស្អាតដែលជាហេតុនាំឲ្យមានអ្នកស្រឡាញ់ច្រើន។ លោកបន្តថា ហើយកាលពីថ្ងៃទី ២១ ខែ តុលា ឆ្នាំ ២០១៩ នារីរងគ្រោះបានភ្ជាប់ពាក្យ និងត្រៀមចូលរោងការជាមួយបុរសម្នាក់ឈ្មោះ គុណ សារ៉ាក អាយុ ២៤ ឆ្នាំ នៅភូមិនិមិត្ត ១ សង្កាត់និមិត្ត ក្រុងប៉ោយប៉ែតដែលនឹងចូលរោងការនៅថ្ងៃទី ៨ ខែមេសាខាងមុខ។
លោកបន្តថា៖ «ករណីនេះអាចជាករណីប្រចណ្ឌ ឬជាករណីដែលស្រឡាញ់មិនបាន បានចាប់នារីរងគ្រោះហើយមើលទៅ ព្រោះនារីរងគ្រោះស្អាតហើយមានអ្នកស្រឡាញ់ច្រើន។ អ្នកស្រឡាញ់នាងមិនបានប្រាកដជាមិនសុខចិត្តទេ ព្រោះនាងជិតចូលរោងការ»។
លោក គុណ សារ៉ាក ដែលជាគូដណ្តឹងរបស់នារីរងគ្រោះបានប្រាប់ភ្នំពេញប៉ុស្តិ៍ថាក្នុងមួយរយៈចុងក្រោយនេះ ពួកគេទាំង ២ នាក់ មានបញ្ហារកាំរកូសបន្តិចបន្តួចគឺគ្រាន់តែនារីរងគ្រោះមិនពេញចិត្តនៅពេលដែលរូបលោកជួបជុំមិត្តភក្តិ។ «ខ្ញុំយំឡើងខ្សោះខ្លួនហើយគ្រាន់តែឮថា បាត់គាត់ភ្លាម ខ្ញុំទៅដល់ផ្ទះគាត់ភ្លាម។ ខ្ញុំស្រឡាញ់គាត់ខ្លាំង មិនដែលហ៊ានសម្តីធ្ងន់ដាក់គាត់ទេ។ ពួកយើងឈ្លោះគ្នាតិចតួចៗ ឈ្លោះគ្នាព្រឹក ល្ងាចត្រូវគ្នាជាធម្មតាតាំងពីស្គាល់គ្នា ១ ឆ្នាំនេះមក។ ខ្ញុំសុំឲ្យរកគាត់ឲ្យឃើញឆាប់ៗ និងកុំឲ្យគាត់មានរឿងអីឲ្យសោះ»៕
