.jpg)
កំពង់ធំ: សមត្ថកិច្ចកំពុងស្វែងរកចាប់ខ្លួនបុរសម្នាក់ជាមន្ត្រីកងរាជអាវុធហត្ថក្នុងខេត្តកំពង់ធំក្រោយពីបើករថយន្តបុកយុវជន ២ នាក់ស្លាប់កាលពីថ្ងៃទី ២៥ ខែសីហា ហើយបានគេចខ្លួនពីការទទួលខុសត្រូវនៅចំពោះមុខច្បាប់។
មន្ដ្រីអាវុធហត្ថមានតួនាទីជាប្រធានសន្តិសុខស្នាក់ការ ៦០១ មានលំនៅស្ថិតក្នុងភូមិកំពង់ធំ សង្កាត់រទេះ ក្រុងស្ទឹងសែន ខេត្តកំពង់ធំដែលជាប់ចោទក្នុងករណីគ្រោះថ្នាក់ចរាចរណ៍នៅចំណុចទឹកវិល ស្រុកសន្ទុក ខេត្ដកំពង់ធំ បង្កឲ្យយុវជន ២ នាក់ស្លាប់បាត់បង់ជីវិតកាលពីថ្ងៃទី ២៥ ខែសីហា ឆ្នាំ ២០១៨ កំពុងរត់គេចខ្លួន ខណៈសមត្ថកិច្ចបានកំណត់មុខសញ្ញារួចរាល់។
លោក រុំ សុវិជ្ជា ប្រធានការិយាល័យចរាចរណ៍ផ្លូវគោក ខេត្ដកំពង់ធំបានថ្លែងប្រាប់ភ្នំពេញប៉ុស្ដិ៍ម្សិលមិញថា សមត្ថកិច្ចកំពុងតាមឃ្លាំមើលតាមគោលដៅនានាដើម្បីចាប់ជនសង្ស័យកំពុងរត់គេច។
លោកបន្ដ៖ «ជនសង្ស័យនេះជាមន្រីអាវុធហត្ថ ប្រធានសន្ដិសុខ ៦០១។ ប៉ុន្មានថ្ងៃនេះយើងកំពុងញាប់ដៃដាក់កម្លាំងតាមជនសង្ស័យនេះនៅគ្រប់គោលដៅទាំងអស់ដែលមានការសង្ស័យថា ជនល្មើសកំពុងគេចខ្លួន ប៉ុន្ដែនៅមិនទាន់ជួបជនសង្ស័យសោះ»។
លោក សុវិជ្ជា ថ្លែងឲ្យដឹងថាតំណាងជនបង្កគ្រោះថ្នាក់បានចូលខ្លួនមកដោះស្រាយចំពោះករណីនេះជាមួយគ្រួសារជនរងគ្រោះហើយ ប៉ុន្ដែនីតិវិធីនៅមិនទាន់ចប់នៅឡើយទេ។
គួរបញ្ជាក់ថាកាលពីថ្ងៃទី ២៥ ខែសីហា ឆ្នាំ ២០១៨ ស្ថិតនៅចំណុចទឹកវិល ភូមិផ្លុង ឃុំពោធិ៍ ស្រុកសន្ទុក ខេត្តកំពង់ធំមានគ្រោះថ្នាក់ចរាចរណ៍មួយបានកើតឡើងរវាងរថយន្ត ឡិចស៊ីស ៤៧០ មួយគ្រឿងបានបើកបុកម៉ូតូមួយគ្រឿងបណ្តាលឲ្យមនុស្សចំនួន ២ នាក់ស្លាប់ភ្លាមៗនៅនឹងកន្លែងកើតហេតុ។
សមត្ថកិច្ចបានឲ្យដឹងថានៅមុនពេលកើតហេតុ គេឃើញម៉ូតូដែលបើកបរដោយមនុស្ស ២ នាក់នោះដួលនៅលើទ្រូងផ្លូវ ដោយសាររថយន្តបើកបរក្នុងល្បឿនលឿនផងក៏បានកិនពីលើ បណ្តាលឲ្យអ្នកបើកបរម៉ូតូទាំង ២ នាក់ស្លាប់ភ្លាមៗនៅនឹងកន្លែងកើតហេតុតែម្តង។
សមត្ថកិច្ចបានបន្តឲ្យដឹងទៀតថា រថយន្តបង្កហេតុត្រូវបានគេដឹងថា ធ្វើការបើកបរដោយបុរសម្នាក់ដែលគេស្គាល់ថាឈ្មោះ សួស សុវណ្ណា ភេទប្រុស អាយុ ៤៩ ឆ្នាំជាប្រធានសន្តិសុខស្នាក់ការ ៦០១ មានទីលំនៅស្ថិតនៅភូមិកំពង់ធំ សង្កាត់រទេះ ក្រុងស្ទឹងសែន ខេត្តកំពង់ធំ។
សមត្ថកិច្ចដដែលនេះបានឲ្យដឹងផងដែរថាចំណែកអ្នកបើកបរម៉ូតូវិញមានឈ្មោះ គង់ មករា ភេទប្រុស អាយុ ១៨ ឆ្នាំ និងម្នាក់ទៀតមានឈ្មោះ ហេង គឹមហាន ភេទប្រុស អាយុ ១៩ ឆ្នាំ។ អ្នកទាំង ២ មានលំនៅក្នុង ឃុំតាំងក្រសាំង ស្រុកសន្ទុក ខេត្តកំពង់ធំ៕
