The Phnom Penh Post Search

Search form

Logo of Phnom Penh Post newspaper Phnom Penh Post - ប៉ូលិស​ត្រៀម​ផាក​ពិន័យ​អ្នក​ល្មើស​ច្បាប់​ចរាចរណ៍




ប៉ូលិស​ត្រៀម​ផាក​ពិន័យ​អ្នក​ល្មើស​ច្បាប់​ចរាចរណ៍

មន្ត្រី​ប៉ូលិស​ចរាចរណ៍​សម្រួល​ចរាចរណ៍​នៅ​តាម​ផ្លូវ​មួយ​ក្នុង​រាជធានី​ភ្នំពេញ​ពី​ម្សិលមិញ​។
មន្ត្រី​ប៉ូលិស​ចរាចរណ៍​សម្រួល​ចរាចរណ៍​នៅ​តាម​ផ្លូវ​មួយ​ក្នុង​រាជធានី​ភ្នំពេញ​ពី​ម្សិលមិញ​។ ផា លីណា

ប៉ូលិស​ត្រៀម​ផាក​ពិន័យ​អ្នក​ល្មើស​ច្បាប់​ចរាចរណ៍

ភ្នំពេញៈ នគរបាល​ចរាចរណ៍​ផ្លូវ​គោក​នឹង​​បើក​យុទ្ធនាការ​ត្រួតពិនិត្យ និង​ផាក​ពិន័យ​នៅ​ទូទាំង​ប្រទេស​ចំពោះ​អ្នក​ល្មើស​ច្បាប់​ចរាចរណ៍​ផ្លូវគោក​ថ្មី​ដែល​នឹង​ចាប់ផ្តើម​អនុវត្ត​​ចាប់ពី​ថ្ងៃ​ទី​ ១ ខែ​មករា ឆ្នាំ ២០១៦ តទៅ​ខណៈ​ដែល​ចំនួន​អ្នក​ស្លាប់​ដោយសារ​គ្រោះថ្នាក់​ចរាចរណ៍​ចេះ​តែ​បន្ត​កើនឡើង​ឥត​ឈប់​។

តាម​សេចក្តី​ជូន​ដំណឹង​ស្តីពី​ការ​ពង្រឹង​វិធានការ​អនុវត្ត​ច្បាប់​ចរាចរណ៍​ផ្លូវគោក​ចុះ​ថ្ងៃ​ទី ៧ ខែ​ធ្នូ ឆ្នាំ ២០១៥ អគ្គ​ស្នងការ​នគរបាល​ជាតិ​លោក នេត សារឿន បាន​ឲ្យ​ដឹង​ថា​រយៈពេល​នៃ​ការ​ផ្សព្វផ្សាយ​អប់រំ​លើក​កម្ពស់​ការ​យល់​ដឹង​ពី​ខ្លឹមសារ​ច្បាប់ និង​បទដ្ឋាន​គតិយុត្តិ​នានា​ដែល​ពាក់ព័ន្ធ​នឹង​ការ​ធ្វើ​ចរាចរណ៍​ផ្លូវគោក​សមល្មម​ឈាន​ដល់​ពេលវេលា​មួយ​តម្រូវ​ឲ្យ​អនុវត្ត​ច្បាប់​សំដៅ​ធ្វើ​ឲ្យ​សភាព​ការណ៍​សណ្តាប់​ធ្នាប់​ចរាចរណ៍​ផ្លូវគោក និង​សណ្តាប់​ធ្នាប់​មាន​ការ​វិវត្ត​ប្រែប្រួល​ថ្មី​ជាពិសេស​ការ​កាត់​បន្ថយ​គ្រោះថ្នាក់ និង​ភាព​កកស្ទះ​ចរាចរណ៍​។

បើ​តាម​សេចក្តី​ជូន​ដំណឹង​នេះ​ចាប់​ពី​ថ្ងៃ​ទី ១ ខែ​មករា ឆ្នាំ ២០១៦ កម្លាំង​នគរបាល​ចរាចរណ៍​ផ្លូវ​គោក និង​បើក​យុទ្ធនាការ​ត្រួត​ពិនិត្យ​ព្រមៗ​គ្នា​នៅ​គ្រប់​ទីកន្លែង​ទូទាំង​ប្រទេស​ជា​អាទិ៍​តាម​គោលដៅ​ដើម​ទី​ចំណត​យានយន្ត កំពង់ផែ ផែស្ងួត កំពង់ចម្លង ស្ថានីយ​ជញ្ជីង សាលា​បង្រៀន​បើកបរ យានដ្ឋាន​ជួសជុល​កែច្នៃ និង​តាម​ដង​ផ្លូវ​នានា។

សម្រាប់​ការ​ផាក​ពិន័យ​នឹង​ត្រូវ​​ធ្វើ​ឡើង​យ៉ាង​ម៉ឺងម៉ាត់​ចំពោះ​ការ​បើកបរ​ដោយ​គ្មាន​ប័ណ្ណ​បើកបរ ការ​បើកបរ​លើស​ល្បឿន​កំណត់ ការ​មិន​គោរព​ស្លាក​សញ្ញា​ចរាចរណ៍ ការ​បើកបរ​ក្រោម​ឥទ្ធិពល​ជាតិ​ស្រវឹង មិន​ពាក់​មួក​សុវត្ថិភាព ខ្សែ​ក្រវាត់​ឡាន ការ​បើកបរ​ផ្ទុក​ទំនិញ​សំពីង​សំពោង និង​យានយន្ត​មិន​គ្រប់​លក្ខណ​បច្ចេកទេស​ជាដើម។

ប្រធាន​នាយកដ្ឋាន​សណ្ដាប់​ធ្នាប់​នៃ​ក្រសួង​មហាផ្ទៃ​លោក រុន រ័ត្នវាសនា បាន​ឲ្យ​ដឹង​ថា​ទន្ទឹម​នឹង​ការ​ចាប់ផ្តើម​យុទ្ធនាការ​ត្រួតពិនិត្យ និង​ការ​ផាកពិន័យ​នេះ​ប៉ូលិស​ចរាចរណ៍​ជាច្រើន​រយ​នាក់​នឹង​ត្រូវ​ដាក់​ពង្រាយ​​តាម​ចំណុច​គោលដៅ​ក្នុង​នោះ​គោលដៅ​ផ្លូវជាតិ​តាម​បណ្តា​ខេត្ត​នីមួយៗ​ជា​មធ្យម​គឺ​មាន​ប៉ូលិស ១៨ នាក់​សម្រាប់​រាជធានី​ភ្នំពេញ​នឹង​មាន​ប៉ូលិស​ចរាចរណ៍​ពី ២ ទៅ ៣ នាក់​ដែល​បញ្ឈរ​ជើង​ត្រួត​ពិនិត្យ​តាម​ផ្លូវ​លំ​តូចៗ​សំដៅ​មើល​ការ​ប្រតិបត្តិ​របស់​អ្នក​បើកបរ។

លោក​ថ្លែង​ថា៖ «ការ​អប់រំ​ផ្សព្វផ្សាយ​បាន​ធ្វើ​ឡើង​ច្រើន​មក​ហើយ​ថ្វី​បើ​យើង​សង្ឃឹម​ថា​នឹង​មាន​លទ្ធផល​ល្អ​ច្រើន​តែ​ក៏​មិន​អាច ១០០% ដែរ។ មក​ទល់​ពេល​នេះ​យើង​សង្កេត​ឃើញ​អ្នក​ខ្លះ​បាន​ត្រៀម​ខ្លួន​តែ​ខ្លះ​ទៀត​នៅ​មិន​ទាន់​គោរព​ច្បាប់​ចរាចរណ៍​នៅ​ឡើយ»។

លោក រុន រ័ត្នវាសនា បាន​ឲ្យ​ដឹង​បន្ថែម​ទៀត​ថា៖ «ទោះ​ជា​ការ​ផាក​ពិន័យ​ត្រូវ​ពង្រឹង​តែ​បើ​សិន​ជា​មាន​កំហុស​ច្រើន​ដូចជា ៥ ករណី​ក្នុង​ពេល​តែ​មួយ​គឺ​យើង​នឹង​ពិនិត្យ​លើ​កំហុស​ដែល​អាច​លើកលែង​បាន ឬ​កាត់​បន្ថយ​មក​នៅ​ត្រឹម ៣ ករណី​ដើម្បី​ឲ្យ​អ្នក​បើកបរ​ល្មើស​នោះ​អាច​កែ​ខ្លួន​ពេល​ក្រោយ»។

ស្រប​នឹង​ការ​ពង្រឹង​ច្បាប់​ចរាចរណ៍​ផ្លូវគោក​កាលពី​ខែ​កក្កដា​ឆ្នាំ ២០១៥ រដ្ឋាភិបាល​ក៏​បាន​ចេញ​អនុក្រឹត្យ​ថ្មី​មួយ​សម្រេច​ផាក​ពិន័យ​ចំពោះ​អ្នក​ជិះ​ម៉ូតូ​ដែល​មិន​ឲ្យ​អ្នក​រួម​ដំណើរ​ពី​ខាង​ក្រោយ​ពាក់​មួក​សុវត្ថិភាព​អ្នក​បើកបរ​និយាយ​ទូរស័ព្ទ និង​អ្នក​បង្ក​ការ​រំខាន​នៅ​តាម​ផ្លូវ។

អនុក្រឹត្យ​នោះ​បាន​បញ្ជាក់​ថា ​អ្នក​រួម​ដំណើរ​ដែល​តម្រូវ​ឲ្យ​ពាក់​មួក​សុវត្ថិភាព និង​មាន​គន្លឹះ​ខ្សែ​ក្រវាត់​គឺ​រួម​បញ្ចូល​ទាំង​ក្មេង​ដែល​មាន​អាយុ​ចាប់​ពី ៣ ឆ្នាំ​ឡើង​ទៅ​ផង​ដែរ។

លោក ជា សាន អ្នក​រត់ម៉ូតូឌុប​នៅ​ម្តុំ​ផ្សារ​កណ្តាល​បាន​ឲ្យ​ដឹង​ថា​លោក​ពេញចិត្ត​ទៅ​នឹង​ការ​ពង្រឹង​ច្បាប់​ចរាចរណ៍​ថ្មី​នេះ​ដើម្បី​រួម​ចំណែក​កាត់បន្ថយ​គ្រោះថ្នាក់​ចរាចរណ៍​តែ​លោក​បាន​ត្អូញត្អែរ​ចំពោះ​ការ​ទាមទារ​ឲ្យ​អ្នក​រួម​ដំណើរ​ត្រូវ​តែ​ពាក់​មួក​សុវត្ថិភាព។

លោក​ថា៖ «រត់ម៉ូតូឌុប​មួយ​ថ្ងៃ​បាន​ត្រឹម​ពី​ ១ ទៅ ២ ម៉ឺន​រៀល​បើ​ទិញ​មួក​សុវត្ថិភាព​ថែម​ត្រូវ​ចំណាយ​លុយ​ហើយ​ភ្ញៀវ​ខ្លះ​គាត់​មិន​ព្រម​ពាក់​ទេ​ព្រោះ​គិត​ថា​ពាក់​ជាន់​គ្នា​ច្រើន​នាក់​ពេក​មិន​មាន​អនាម័យ»។

យ៉ាង​ណា​ក៏ដោយ​លោក រុន រ័ត្នវាសនា បាន​បញ្ជាក់​ថា​កត្តា​នេះ​គឺ​អាជ្ញាធរ​មិន​អាច​អធ្យាស្រ័យ​បាន​ឡើយ​ព្រោះ​ការ​ទាមទារ​ឲ្យ​អ្នក​រួម​ដំណើរ​ពាក់​មួក​សុវត្ថិភាព​គឺ​ផ្នែក​មួយ​ដែល​ខាន​មិន​បាន​សម្រាប់​បង្ការ​គ្រោះថ្នាក់​ជាយថាហេតុ។

លោក អ៊ា ចរិយា ទីប្រឹក្សា​ឯករាជ្យ​ផ្នែក​សុវត្ថិភាព​ចរាចរណ៍​បាន​ឲ្យ​ដឹង​តាម​ការ​សង្កេត​របស់​លោក​ថា​បច្ចុប្បន្ន​នេះ​ការ​ផ្សព្វផ្សាយ​ច្បាប់ និង​ការ​អប់រំ​ពាក់ព័ន្ធ​នឹង​សុវត្ថិភាព​ចរាចរណ៍​គឺ​មាន​លក្ខណៈ​ទូលំ​ទូលាយ​ក្នុង​រាជធានី​ភ្នំពេញ​ប៉ុន្តែ​នៅ​តាម​ជនបទ​ហាក់​នៅ​ខ្វះខាត​ច្រើន។

លោក​ថា៖ «ខ្ញុំ​ឃើញ​ការ​ផ្សព្វផ្សាយ​តាម​ថ្នាក់​ខេត្ត និង​ស្រុក​គឺ​មាន​តែ​តាម​សហគមន៍​តូចៗ​ហាក់​មិន​មាន​សោះ​អ៊ីចឹង​ហើយ​ពួកគាត់​នៅ​តែ​មិន​ទាន់​យល់​ច្បាស់...ខ្ញុំ​គិត​ថា​រដ្ឋាភិបាល​ក៏​គប្បី​ពិចារណា​លើ​ការ​កាត់បន្ថយ​ការ​ផ្សព្វផ្សាយ​ស្រាបៀរ​តាម​ដង​ផ្លូវ និង​ប្តូរ​មក​ជា​រូបភាព​អប់រំ​សុវត្ថិភាព​ចរាចរណ៍​វិញ​ដើម្បី​ជំរុញ​ឲ្យ​អ្នក​បើកបរ​គោរព​តាម​មិនមែន​បង្ហាញ​នូវ​ភាព​អស្ចារ្យ​នៃ​ស្រាបៀរ​ទេ«។

តាម​របាយការណ៍​ក្រសួង​មហាផ្ទៃ​រយៈពេល ៩ ខែ​ក្នុង​ឆ្នាំ ២០១៥ នេះ​អ្នក​ស្លាប់​ដោយ​គ្រោះថ្នាក់​ចរាចរណ៍​មាន​ចំនួន ១៨៣០ នាក់​ខណៈ​ដែល​រយៈពេល​ដូច​គ្នា​ក្នុង​ឆ្នាំ ២០១៤ មាន ១៧៣៤ នាក់ ចំណែក​ករណី​គ្រោះថ្នាក់​បាន​ថយ​ចុះ​មក​ត្រឹម ៣៥០៥ លើក​ធៀប​នឹង​ឆ្នាំ​មុន​មាន ៣៦៣៨ លើក។ របាយការណ៍​នេះ​បាន​បង្ហាញ​ថា ៩៣% នៃ​គ្រោះថ្នាក់​គឺ​បណ្តាល​មកពី​កត្តា​មនុស្ស​រួមមាន​ការ​មិន​គោរព​ល្បឿន ការ​បើកបរ​មិន​គោរព​សិទ្ធិ និង​ការ​ប្រើ​គ្រឿង​ស្រវឹង។

ទន្ទឹម​នឹង​ការ​ចាប់ផ្តើម​អនុវត្ត​ច្បាប់​ចរាចរណ៍​ថ្មី​នៅ​ខែ​មករា​ខាង​មុខ​នេះ​រាជរដ្ឋាភិបាល​សង្ឃឹម​ថា​នឹង​អាច​​ទប់ស្កាត់​គ្រោះថ្នាក់​ចរាចរណ៍ និង​អាច​កាត់​បន្ថយ​ការ​ស្លាប់​ដែល​កើតឡើង​នៅ​លើ​ដង​ផ្លូវ​ក្នុង​ប្រទេស​កម្ពុជា​ដែល​ជា​មធ្យម​មនុស្ស ៧ នាក់​បាន​ស្លាប់​ជា​រៀងរាល់​ថ្ងៃ៕

អត្ថបទគួរចាប់អារម្មណ៍