កំពង់ចាមៈ នគរបាលខេត្តកំពង់ចាមបន្តស្រាវជ្រាវរកចាប់ខ្លួនជនសង្ស័យម្នាក់បន្ទាប់ពីសម្លាប់ស្ត្រីម្នាក់នៅក្នុងចម្ការស្វាយចន្ទីរបស់ជនរងគ្រោះក្នុងភូមិតាម៉ៅ ឃុំស្រក ស្រុកកំពង់សៀមកាលពីថ្ងៃទី ១៦ ខែ មករា ឆ្នាំ ២០២០ ដែលសមត្ថកិច្ចអះអាងថា មិនមែនជាករណីរំលោភទេ។
លោក ហេង ប៊ុនធី ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តកំពង់ចាមប្រាប់ពីម្សិលមិញថា ករណីស្ត្រីម្នាក់ដែលស្លាប់នោះតាមការពិនិត្យ និងធ្វើកោសល្យវិច័យរបស់សមត្ថកិច្ចជំនាញបញ្ជាក់ថា ជនរងគ្រោះឈ្មោះ គិន យ៉េន អាយុ ២៧ ឆ្នាំត្រូវឃាតករវាយសម្លាប់។ រហូតដល់ពេលនេះសមត្ថកិច្ចកំពុងស្រាវជ្រាវរកជនល្មើស។ «គាត់មិនមែនស្លាប់ដោយគេរំលោភសេពសន្ថវៈទេ»។
លោក ចាន់ ហោ អនុប្រធានការិយាល័យព្រហ្មទណ្ឌកម្រិតធ្ងន់បានឲ្យដឹងពីម្សិលមិញដែរថា អំពើឃាតកម្មនេះ សមត្ថកិច្ចកំពុងស្វែងរកចាប់ខ្លួនជនល្មើស ប៉ុន្តែសមត្ថកិច្ចនៅមិនទាន់កំណត់អត្តសញ្ញាណរបស់គេបាននៅឡើយទេ។
រីឯការស្លាប់របស់ជនរងគ្រោះត្រូវបានសមត្ថកិច្ចជំនាញកោសល្យវិច័យសន្និដ្ឋានបឋមថាមិនមែនត្រូវគេរំលោភសម្លាប់ទេ ប៉ុន្តែការសម្លាប់នេះដោយសារគំនុំ។ ដោយសារចំណុចកើតហេតុនៅកណ្តាលព្រៃស្វាយចន្ទីដូច្នេះកម្លាំងសមត្ថកិច្ចកំពុងតែរុករកក្នុងព្រៃនោះ។
ការកំណត់ទីតាំងរបស់ជនល្មើសវិញក៏សមត្ថកិច្ចមិនទាន់កំណត់បានដែរព្រោះថា ទីកន្លែងកើតហេតុនោះស្ថិតនៅក្នុងព្រៃ ចម្ការស្វាយចន្ទីហើយក៏គ្មានភូមិនៅជិតកន្លែងកើតហេតុនោះដែរ។ «ចាប់តាំងពីថ្ងៃកើតហេតុថ្ងៃទី ១៦ មករាមកសមត្ថកិច្ចរបស់ខ្ញុំតាមរុករកជនល្មើសរហូតគឺមកដល់ថ្ងៃនេះ (ថ្ងៃទី ២៣ មករា) មានរយៈពេល ៧ ថ្ងៃហើយ»។
លោកប្រាប់ថា តាមការសួរព័ត៌មានពីក្រុមគ្រួសារស្ត្រីរងគ្រោះបានឲ្យដឹងថា ស្ត្រីរងគ្រោះឈ្មោះ គិន យ៉េន រូបនេះជាស្ត្រីក្រមុំចាស់ហើយគាត់មានចម្ការស្វាយចន្ទីផ្ទាល់ខ្លួនហើយគាត់ត្រូវគេសម្លាប់ក្នុងចម្ការរបស់គាត់។ តាមការធ្វើកោសល្យវិច័យនៅកន្លែងកើតហេតុលើសាកសពឃើញថា ស្ត្រីរងគ្រោះត្រូវបានជនល្មើសយកព្រនង់កំណាត់ឈើស្វាយចន្ទីវាយបែកក្បាលស្លាប់ និងបន្សល់ទុកនៅទីនោះ ហើយសម្ភារៈមានកងជើងប្លាទីន និងម៉ូតូសង់ផលិតនៅឆ្នាំ ២០១០ ក៏ឃើញនៅមិនឆ្ងាយប៉ុន្មានពីសាកសពដែរ។ ដូច្នេះសមត្ថកិច្ចសន្និដ្ឋានថា អំពើឃាតកម្មនេះអាចបណ្តាលមកពីរឿងគំនុំមិនមែនជាអំពើរំលោភសម្លាប់ទេ។
លោក ឯក ប៉ាន់ដន អធិការស្រុក កំពង់សៀមប្រាប់ឲ្យដឹងដែរថា មានសារព័ត៌មានក្នុងស្រុកមួយចំនួនបានចុះផ្សាយដោយសរសេរថា ស្ត្រីរងគ្រោះត្រូវបានគេរំលោភសេពសន្ថវៈហើយសម្លាប់ចោល។ ប៉ុន្តែការចុះផ្សាយនោះគឺខុសពីការពិតទាំងស្រុងដែលមិនមែនជាអំពើរំលោភសម្លាប់ទេតែជាអំពើឃាតកម្ម។
សារព័ត៌មាននោះបានយករូបថតខោក្នុង និងខោជើងវែងរបស់ស្ត្រីរងគ្រោះដាក់អមនឹងអត្ថបទសរសេររបស់គាត់ដែលករណីនេះធ្វើឲ្យមហាជនយល់ច្រឡំ។ ព្រោះធម្មតាពេលធ្វើកោសល្យវិច័យគឺសមត្ថកិច្ចត្រូវតែត្រួតពិនិត្យលើសម្លៀកបំពាក់ និងសម្ភាររបស់ជនរងគ្រោះ។ ដូច្នេះរូបថតខោក្នុងរបស់ជនរងគ្រោះនោះមិនមែនបញ្ជាក់ថាជាវត្ថុតាងនៃការធ្វើកោសល្យវិច័យនៃអំពើរំលោភសេពសន្ថវៈទេ។ «អ្នកចុះផ្សាយនោះចេះតែចុះផ្សាយផ្តេសផ្តាសមិនសួរសមត្ថកិច្ចមូលដ្ឋានទេ»។
តាមសម្តីម្តាយមីងស្ត្រីរងគ្រោះមុនកើតហេតុ ស្ត្រីឈ្មោះ ឃួន ឃឿន អាយុ ៤៩ ឆ្នាំ និងក្មួយស្រីបង្កើតរបស់គាត់ឈ្មោះ គិន យ៉េន អាយុ ២៧ ឆ្នាំបានជិះម៉ូតូ ម៉ាកហុងដា សេ ១២៥ ស៊េរីឆ្នាំ ២០១០ ពណ៌ខ្មៅចេញពីភូមិដូនទ ឃុំសូភាស ស្រុកស្ទឹងត្រង់ទៅចម្ការស្វាយចន្ទីរបស់ក្មួយគាត់នៅភ្នំក្រហមស្ថិតក្នុងភូមិតាម៉ៅ ឃុំស្រក ស្រុកកំពង់សៀម។
ពេលទៅដល់ចម្ការ ក្មួយស្រីរបស់គាត់ក៏នៅប្រមូលស្លឹកស្វាយចន្ទី ចំណែកគាត់បានទៅចម្ការស្វាយចន្ទីរបស់គាត់ ដែលជាប់នឹងព្រំប្រទល់ចម្ការស្វាយចន្ទី ក្មួយស្រីចម្ងាយប្រហែល ៣០០ ម៉ែត្រ។ រហូតដល់ម៉ោង ២ រសៀលថ្ងៃទី ១៦ មករា ក្រោយពីគាត់ត្រឡប់មកផ្ទះរកក្មួយមិនឃើញ គាត់បានដើរទៅចម្ការរបស់ក្មួយស្រីគាត់ម្តងទៀតក៏ឃើញឈាមលើដី និងឃើញក្មួយស្រីដេកស្លាប់ក្នុងចម្ការហើយបានរាយការណ៍ប្រាប់សមត្ថកិច្ចតែម្តង៕