ភ្នំពេញៈ អយ្យការសាលាដំបូងរាជធានីភ្នំពេញ នៅថ្ងៃទី១១ ខែមករានេះ បានសម្រេចចោទប្រកាន់ លោកប៉ូលិសសក្តិបួន ប្រើហិង្សា ដោយធាក់លើមន្ត្រីនគរបាលចរាចរ ពីបទប្រើហិង្សាដោយចេតនា ដែលអាចប្រឈមដល់ដាក់ពន្ធនាគារពី២ដល់៥ឆ្នាំ។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ ឲ្យដឹងថា ក្រោយពីបានសាកសួរចម្លើយលើឈ្មោះ សៅ បញ្ញា និងពិនិត្យឯកសារសំណុំរឿងតាមនីតិវិធី តំណាងអយ្យការបានសម្រេចបើកការស៊ើបសួរដោយចោទប្រកាន់ពី «បទហិង្សាដោយចេតនាមានស្ថានទម្ងន់ទោស និងបទប្រើប្រាស់ដោយគ្មានសិទ្ធិនូវសញ្ញាសំគាល់ដែលកំណត់ដោយអាជ្ញាធរសាធារណៈ តាមមាត្រា ២១៨ និងមាត្រា ៦១៤ នៃក្រមព្រហ្មទណ្ឌ ហើយបញ្ជូនទៅចៅក្រមស៊ើបសួរដើម្បីចាត់ការបន្ត»។
ហេតុការណ៍នៃការបង្កហិង្សានេះ កើតឡើងនៅម្តុំស្តុបត្រឡោកបែក នៅថ្ងៃទី ៩ ខែមករា នៅពេលដែលជនរងគ្រោះ ឈ្មោះ អឿន ចំណាន ជាមន្ត្រីនគរបាលចរាចរណ៍ ជាប់កិច្ចសន្យា បានបញ្ឈប់រថយន្តជនសង្ស័យជា មន្ត្រីនគរបាលសក្តិបួនឈ្មោះ សៅ បញ្ញា ធ្វើការនៅនាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការនគរបាលជាតិ។ នេះបើយោងតាម វីដេអូឃ្លីប ដែលបង្ហោះតាមបណ្តាញសង្គមហ្វេសប៊ុក។
ពួកគេ បានការជជែកគ្នាទៅវិញទៅមក និងក្រោយមក ក៏ឃើញជនរងគ្រោះ លុតជង្គង់សុំទោស ហើយក៏ឃើញជនសង្ស័យដើរមកធាក់ជនរងគ្រោះមួយជើងផ្ងារក្រោយ និងបន្ទាប់មកជនរងគ្រោះ ក៏បានងើបឈរឡើង យកដៃគោរពជនសង្ស័យថែមទៀត។
មកទល់រសៀលនេះ ចៅក្រមស៊ើបអង្កេត កំពុងធ្វើការសាកសួរជនសង្ស័យជាបន្តទៀត។
ចំណែកជនរងគ្រោះ ឃើញមានការឧបត្ថម្ភថវិកា ១ លានរៀល ពីលោក ហ៊ុន ជា ដែលត្រូវជាក្មួយប្រុសលោកនាយករដ្ឋមន្ត្រី និងថវិកាមួយចំនួនពីលោក ស សុខា ជាតំណាងរាស្ត្រផងដែរខេត្តព្រៃវែង៕