ព្រះសីហនុៈ បុរសម្នាក់របួសធ្ងន់ដោយគ្រាប់កាំភ្លើងដឹកទៅសង្គ្រោះនៅភ្នំពេញ និងម្នាក់ទៀតជាក្មេងប្រុសរងរបួសស្រាល ខណៈពលរដ្ឋ ៤ នាក់ផ្សេងទៀត ត្រូវបានឃាត់ខ្លួន កាលពីម្សិលមិញ ក្នុងការប៉ះទង្គិចគ្នារវាងពលរដ្ឋមានទំនាស់ដីធ្លីជិត ៣០០ នាក់ ជាមួយសមត្ថកិច្ចចម្រុះប្រមាណ ២០០ នាក់ ក្នុងពេលចុះអនុវត្តតាមដីការបស់តុលាការកំពូល។
ហេតុការណ៍ប៉ះទង្គិចគ្នា រហូតមានការចាប់ខ្លួន និងរបួសធ្ងន់នេះបានកើតឡើងនៅភូមិគគីរ ឃុំបិតត្រាង ស្រុកព្រៃនប់ ខេត្តព្រះសីហនុ បន្ទាប់ពីពលរដ្ឋជិត ៣០០ នាក់ បាននាំគ្នាតវ៉ាដោយដុតកង់ឡាននិងបិទផ្លូវ ជំទាស់នឹងសមត្ថកិច្ចចម្រុះចុះទៅរុះរើផ្ទះពួកគេតាមសាលដីកាតុលាការកំពូល។ នេះបើតាមលោកស្រី ជាប សុធារី មន្ត្រីសម្របសម្រួលសមាគមអាដហុកប្រចាំខេត្តព្រះសីហនុ។
លោកស្រី ជាប សុធារី អះអាងថា សមត្ថកិច្ចប្រមាណ ២០០ នាក់ប្រដាប់ដោយកាំភ្លើង ខែលនិងគ្រឿងចក្រ ៤ គ្រឿង ឡានទឹកនិងសម្ភារជាច្រើនទៀតបានព្យាយាមចូលទៅក្នុងដីទំនាស់ ខណៈពលរដ្ឋរារាំងដោយការដុតកង់ឡាន និងគប់ដុំថ្មតបតវិញ។
លោកស្រីថា៖ «គេអនុវត្តហ្នឹងប្រហែលជាម៉ោង ១០ ព្រឹក ពេលហ្នឹងកម្លាំងគេចូលអត់បានទេ ប្រជាពលរដ្ឋបានគប់ដុំថ្ម ដបសាំង រារាំងមិនឲ្យចូលទេព្រោះពួកគាត់ចង់ជជែកគ្នាសិន។ ដល់ពេលគេបំបែកកម្លាំងតាមយុទ្ធសាស្ត្រគេទៅរហូតដល់ម៉ោងប្រហែល ១២ (ថ្ងៃត្រង់) មានការផ្ទុះអាវុធដូចក្នុងសមរភូមិអ៊ឹចឹង។ ពេលចូលបានក៏មានការឃាត់ខ្លួនពលរដ្ឋ ៦ នាក់ប្រុសទាំងអស់ ក្នុងហ្នឹងរបួស ២ នាក់ម្នាក់របួសធ្ងន់ត្រូវគ្រាប់កាំភ្លើងចូលពីស្មាឆ្វេងមកខាងស្តាំមកនៅនឹងសន្ទះទ្រូងក្បែរសួតហើយម្នាក់ទៀតកូនក្មេងអាយុប្រហែលជាង ១០ ឆ្នាំ ត្រូវរបួសដោយសារវ៉ៃ»។
មន្ត្រីសម្របសម្រួលដែលនៅមិនឆ្ងាយពីហេតុការណ៍នេះ បានបញ្ជាក់ទៀតថា ក្រោយចាប់ខ្លួន និងផ្ទុះអាវុធ ពលរដ្ឋទាំងអស់បានគេចខ្លួនដោយភ័យខ្លាចចាប់ខ្លួន ខណៈសមត្ថកិច្ចចម្រុះបានចូលដល់ដីទំនាស់ វាស់វែង និងបោះបង្គោលព្រំ ព័ទ្ធដីទំហំ ៧១ ហិកតា។
លោក អ៊ី ធារិន ប្រធានចាត់ចែងអន្តរវិស័យខេត្តព្រះសីហនុ បានប្រាប់ដែរថាការប៉ះទង្គិចនោះ សមត្ថកិច្ចបានចាប់ខ្លួនពលរដ្ឋ ៤ នាក់បញ្ជូនទៅស្នងការដ្ឋាននគរបាលខេត្ត រីឯអ្នករងរបួសធ្ងន់ម្នាក់ត្រូវបានបញ្ចូនមកមន្ទីរពេទ្យភ្នំពេញដើម្បីសង្គ្រោះ ខណៈអ្នករបួសស្រាលម្នាក់ទៀត ត្រូវបានដោះលែងវិញក្រោយព្យាបាល ហើយមានលក្ខណៈធូរស្រាលវិញ។
លោកថា៖«តាមដឹង ដូចជារងរបួសស្រាលម្នាក់របួសធ្ងន់ម្នាក់ ហើយស្រាលហ្នឹងចេញពីមន្ទីរពេទ្យបាត់ហើយ របួសធ្ងន់បញ្ជូនទៅមន្ទីរពេទ្យនៅភ្នំពេញ។ ៤ នាក់ (ចាប់ខ្លួន) ហ្នឹងនៅប៉ូលិស ខ្ញុំមិនច្បាស់រឿងហ្នឹងដែរ តែអាចទាក់ទងទៅព្រះរាជអាជ្ញាចុះអនុវត្តនោះផ្ទាល់ទៅ»។
លោក ហួត វិចិត្រ ព្រះរាជអាជ្ញាអមសាលាដំបូងខេត្តព្រះសីហនុបានបញ្ជាក់ថា ការដែលសមត្ថកិច្ចចុះទៅគឺដើម្បីអនុវត្តសាលដីការតុលាការកំពូល ដែលចូលជាស្ថាពរ តែលោកមិនបានបញ្ជាក់ឲ្យច្បាស់ទេ ជុំវិញសាលដីកានេះ ដោយគ្រាន់តែថា ការរារាំងដំណើរសមត្ថកិច្ចក្នុងការអនុវត្តសាលដីកានេះ គឺត្រូវតែមានការឃាត់ខ្លួនហើយ។
លោកបញ្ជាក់ថា៖ «ការអនុវត្តខាងក្នុងហ្នឹងអត់មានអ្នកប្រឆាំងទេតែពួកប្រជាជននាំគ្នាដុតកង់ឡាន គប់ដបសាំង លើសមត្ថកិច្ចហ្នឹង ពួកគាត់អត់ដឹងមកពីណាផង អត់មាននៅលើដីហ្នឹងផង អត់ដឹងថា អ្នកណាគេបំផុសឲ្យពួកគាត់មកយល់ច្រឡំមកលើពួកខ្ញុំហ្នឹង។ជាក់ស្តែងរហូតមកទល់ពេលនេះដីវាវាលច្រើន វាអត់មានឃើញសំណង់រឹងមាំច្រើនខ្ញុំឆ្ងល់ដែរ ស្មានតែទីតាំងដីអនុវត្តហ្នឹងមានផ្ទះពលរដ្ឋច្រើន មានតែប៉ុន្មាន ១០ ខ្នងប៉ុន្តែពួកគាត់ព្យាយាមរារាំងសមត្ថកិច្ច»។
បើតាមពលរដ្ឋមានជម្លោះដីធ្លីដែលបញ្ជាក់ប្រាប់មន្ត្រីសង្គមស៊ីវិលបានឲ្យដឹងថា ដីដែលមានជម្លោះនោះគឺអ្នកខ្លះបានរស់នៅយូរឆ្នាំមកហើយ ចំណែកអ្នកខ្លះទៀតថា បានទិញដីនោះពីគេក្នុងតម្លៃ ៤ ទៅ ៥ ពាន់ដុល្លារ។
យ៉ាងណាក្ដី លោកស្រី ជាប សុធារី មន្ត្រីសម្របសម្រួលសមាគមអាដហុកប្រចាំខេត្តព្រះសីហនុដែលឃ្លាំមើលករណីនេះសោកស្តាយដែលអាជ្ញាធរមានសមត្ថកិច្ចបណ្តោយឲ្យមានការប៉ះទង្គិច និងធ្វើឲ្យពលរដ្ឋរងគ្រោះ ខណៈប្រទេសកម្ពុជា ស្ថិតក្នុងសន្តិភាព៕