The Phnom Penh Post Search

Search form




Logo of Phnom Penh Post newspaper Phnom Penh Post - ប័ណ្ណ​បើកបរ​អចិន្ត្រៃយ៍​អាច​ប្រើប្រាស់​បាន​ ១០ ឆ្នាំ​ទៀត

ប័ណ្ណ​បើកបរ​អចិន្ត្រៃយ៍​អាច​ប្រើប្រាស់​បាន​ ១០ ឆ្នាំ​ទៀត

បុរស​ម្នាក់​កំពុង​ពិនិត្យ​ប័ណ្ណ​បើកបរ​របស់​ខ្លួន​។
បុរស​ម្នាក់​កំពុង​ពិនិត្យ​ប័ណ្ណ​បើកបរ​របស់​ខ្លួន​។ ហេង ជីវ័ន

ប័ណ្ណ​បើកបរ​អចិន្ត្រៃយ៍​អាច​ប្រើប្រាស់​បាន​ ១០ ឆ្នាំ​ទៀត

ភ្នំពេញៈ ក្រោយ​ពី​មាន​ការ​ណែនាំ​ច្រើន​លើក​ច្រើន​សា​មក​ក្រសួង​សាធារណ​ការ និង​ដឹក​ជញ្ជូន​អនុញ្ញាត​ឱ្យ​អ្នក​​កាន់​ប័ណ្ណ​បើកបរ​មាន​សុពលភាព​អចិន្ដ្រៃយ៍​អាច​ប្រើប្រាស់​បាន​ ១០ ឆ្នាំ​បន្ថែម​ទៀត​ដោយ​មិន​បាច់​​ទៅ​ប្តូរ​ថ្មី​ឡើយ​ ​ខណៈ​អ្នក​កាន់​ប័ណ្ណ​បើកបរ​មាន​សុពលភាព ៦០ ឆ្នាំ​អាច​​បន្ត​ប្រើប្រាស់​រហូត​​អស់​សុពលភាព​ផង​ដែរ។

សេចក្តី​ជូន​ដំណឹង​របស់​ក្រសួង​សាធារណការ និង​ដឹកជញ្ជូន​ចេញ​ផ្សាយ​កាលពី​ថ្ងៃ​ទី ១៥ ខែ​មិនា​ឱ្យ​ដឹង​ថា «អ្នក​​ដែល​កាន់​បណ្ណ​បើកបរ​មាន​សុពលភាព​អចិន្ដ្រៃយ៍​អាច​ប្រើប្រាស់​បាន ១០ ឆ្នាំ​បន្ថែម​ទៀត​រហូត​មាន​ការ​ជូន​ដំណឹង​ជាថ្មី​ចំពោះ​ប័ណ្ណ​បើកបរ​មាន​សុពលភាព​រហូត​ដល់​​អាយុ ៦០ ឆ្នាំ​គិត​ពី​ឆ្នាំ​កំណើត​អាច​ប្រើប្រាស់​បាន​រហូត​ដល់​អស់​សុពលភាព»។

ក្រសួង​បញ្ជាក់​ថា​ការ​សម្រេច​នេះ​ធ្វើ​ឡើង​​តាម​ស្មារតី​កិច្ចប្រជុំ​បូក​សរុប​លទ្ធផល​ត្រួតពិនិត្យ​ការ​អនុវត្ត​ច្បាប់​ស្តីពី​ចរាចណ៍​ផ្លូវ​គោក​ថ្មី​កាលពី​ថ្ងៃ​ទី ១០ ខែ​មិនា​ឆ្នាំ ២០១៦ របស់​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវគោក និង​ក្រសួង​សាធារណការ និង​ដឹក​ជញ្ជូន។

ក្រសួង​​បញ្ជាក់​ថា​ ចំពោះ​សាធារណជន​​ដែល​កំពុង​កាន់​ប័ណ្ណ​បើកបរ​ទាំង​ពីរ​ប្រភេទ​នេះ​ហើយ​មាន​បំណង​ចង់​ប្តូរ​យក​ប័ណ្ណ​បើកបរ​ប្រភេទ​ថ្មី​មាន​សុពលភាព​​ ១០ ​ឆ្នាំ​ក្រសួង​នឹង​រៀបចំ​ប្តូរ​ជូន​។

អ្នក​នាំ​ពាក្យ​ក្រសួង​សាធារណការ​លោក ម៉ា សេងហួត ប្រាប់ ​ភ្នំពេញ ​ប៉ុស្តិ៍ ​ថា ​រហូត​មក​ទល់​​ពេល​​នេះ​ប័ណ្ណ​បើកបរ​មាន​បី​ដំណាក់កាល​ដោយ​ដំណាក់កាល​ទី ១ ប័ណ្ណ​បើកបរ​មាន​សុពលភាព​អចិន្ដ្រៃយ៍​ទី ២ ប័ណ្ណ​បើកបរ​មាន​សុពលភាព​រហូត​ដល់​អាយុ ៦០ ឆ្នាំ​គិត​ពី​ឆ្នាំ​កំណើត និង​ប្រភេទ​ថ្មី​ទី​បី​ប័ណ្ណ​បើកបរ​ដែល​មាន​សុពលភាព​រយៈពេល​​ ១០ ឆ្នាំ​ត្រូវ​ប្តូរ​ម្តង។

លោក​ថា ​ការ​ពន្យារ​សុពលភាព​ដល់​អ្នក​កាន់​ប័ណ្ណ​បើកបរ​សេរី​ចាស់​ទាំង​ពីរ​នោះ​ដោយសារ​ពួក​គាត់​មួយ​ចំនួន​ទើប​តែ​​ធ្វើ​ហើយ និង​មិន​ទាន់​ដល់​​អាយុ​របស់​គាត់​ដែល​ត្រូវ​ឈប់​បើកបរ។ តែ​លោក​ថា​ការ​ធ្វើ​ប័ណ្ណ​បើកបរ​មាន​សុពលភាព​ត្រឹម ១០ ឆ្នាំ​ធ្វើ​ឡើង​តាម​ស្តង់ដារ​ និង​ដើម្បី​តាមដាន​សុខភាព​ប្រជាពលរដ្ឋ​ថា​តើ​អាច​បន្ត​បើកបរ​បាន​ឬ​អត់?

លោក​ថា៖ ​«កាលពី​ ១០ ឆ្នាំ​មុន​យើង​មាន​ច្បាប់​ចាស់​យើង​ចេញ​ប័ណ្ណ​បើកបរ​អចិន្ត្រៃយ៍​ហើយ​ប័ណ្ណ​​នេះ​​អាច​ប្រើ​បាន​ដល់​អាយុ ៧០ ឬ ៨០ ឆ្នាំ​ក្រោយ​មក​មាន​ច្បាប់​មួយ​ទៀត​​កំណត់​​ត្រឹម ៦០ ឆ្នាំ​ទេ​តែ​អាច​ប្តូរ​បន្ថែម​ត្រឹម ២ ឬ ៣ ឆ្នាំ​បាន​ប៉ុន្តែ​ត្រូវ​ពិនិត្យ​សុខភាព»។

លោក​ឲ្យ​ដឹង​ដែរ​ថា «ការ​ផ្លាស់ប្តូរ​លើក​​ក្រោយ​ដើម្បី​ពិនិត្យ​មើល​ឡើង​វិញ​ពេល​ដែល​បាន ១០ ឆ្នាំ​យក​ទៅ​ប្រើ​ហើយ​គាត់​អាច​មាន​បញ្ហា​អី​អត់? ឧទាហរណ៍​ថា​ពេល​មក​ធ្វើ​ប័ណ្ណ​បើកបរ​មាន​សុខភាព​ល្អ​តែ​ដល់​ឆ្នាំ​ក្រោយ​មក​គាត់​អាច​ពិការ​ភ្នែក ពិការ​ដៃជើង​អ៊ីចឹង​ជា​បញ្ហា​ហើយ​ត្រូវ​ឱ្យ​គាត់​ពិនិត្យ​សុខភាព​ឡើង​វិញ»។

បើ​តាម​លោក សេង ហួត សម្រាប់​ការ​ពន្យារ​ប័ណ្ណ​បើកបរ​ទាំង​ពីរ​ប្រភេទ​គឺ​អនុវត្ត​លើ​គ្រប់​ប្រភេទ​នៃ​ប័ណ្ណ​បើកបរ​ទាំងអស់​ប្រភេទ​រថយន្ត​ធំ និង​តូច។

នាយក​ប្រតិបត្តិ​សម្ព័ន្ធ​គណនេយ្យភាព​សង្គម​កម្ពុជា​លោក សន ជ័យ ថ្លែង​ថា​ការ​ពន្យារ​ប័ណ្ណ​បើកបរ​ពី​សុពលភាព​អចិន្ត្រៃយ៍ និង​ពី​សុពលភាព ៦០ ឆ្នាំ​មក​នៅ​ត្រឹម ១០ ឆ្នាំ​ជា​រឿង​ល្អ​មួយ​ដើម្បី​ឱ្យ​ពួកគាត់​ទៅ​ពិនិត្យ​សុខភាព​ម្តង​ទៀត។

ប៉ុន្តែ​ លោក​ថា ​ចំណែក​ការ​ពន្យារ​សុពលភាព​ប័ណ្ណ​បើកបរ​អចិន្ត្រៃយ៍​ទៅ ១០ ​ឆ្នាំ​ទៀត​អាច​មាន​ភាព​មិន​ប្រក្រតី​ណា​មួយ​ដែល​តម្រូវ​ឱ្យ​ក្រសួង​សម្រេច​បែប​នេះ។

លោក​ថា៖ «​អ្វី​ដែល​គេ​ពន្យារ​សុពលភាព​នេះ​អាច​មាន​បញ្ហា​ស្មុគស្មាញ​ផ្នែក​ផ្តល់​សេវា។ បើ​តាម​ខ្ញុំ​ដឹង​អ្នក​ប្តូរ​ប័ណ្ណ​បើកបរ​អចិន្រៃ្តយ៍​ឆ្លង​ខេត្ត​មក​ធម្មតា​ត្រូវ​បង់​លុយ​អស់ ៥០ ដុល្លារ​ក្នុង​ម្នាក់​ខណៈ​ដែល​​តម្លៃ​ប្តូរ​ប័ណ្ណ​បើកបរ​បច្ចុប្បន្ន​មាន​តម្លៃ​តែ ៣ ម៉ឺន​រៀល​»។

បច្ចុប្បន្ន​ចំពោះ​ការ​ប្រឡង​យក​ប័ណ្ណ​បើក​រថយន្ត​ប្រភេទ (ខ) រថយន្ត​ ៤ កៅអី​ជា​លក្ខណៈ​​គ្រួសារ​​មាន​តម្លៃ ៩ ម៉ឺន​រៀល​មាន​​សុពលភាព ១០ ឆ្នាំ​រយៈពេល​ផ្តល់​សេវា ១០ ថ្ងៃ (គិត​តែ​ថ្ងៃ​ធ្វើការ)។ ចំណែកឯ​ការ​ប្រឡង​យក​ប័ណ្ណ​បើកបរ​រថយន្ត​ប្រភេទ (គ) រថយន្ត​ដឹក​ទំនិញ​ធុន​ធំ និង​ (ឃ) រថយន្ត​ដឹក​អ្នក​ដំណើរ​ធុន​ធំ ២០ កៅអី​ឡើង​តម្លៃ ៩៥០០០ រៀល​រយៈពេល​នៃ​ការ​ផ្ដល់​សេវា​ ១០ ថ្ងៃ​ និង​សុពលភាព ៥ ឆ្នាំ​។

ដោយឡែក​ក្រោម​ជំនួយ​ឥត​សំណង​ពី​ប្រទេស​ជប៉ុន​សាលា​រាជធានី​ភ្នំពេញ​នឹង​អនុវត្ត​គម្រោង​អភិវឌ្ឍន៍​ប្រព័ន្ធ​គ្រប់គ្រង​ចរាចរណ៍​សំដៅ​កាត់​បន្ថយ​​ការ​កកស្ទះ​ចរាចរណ៍​ក្នុង​ទីក្រុង​ជាពិសេស​ក្នុង​ភូមិសាស្ត្រ​ខណ្ឌ​ចំនួន ៤ ក្នុង​រាជធានី​គឺ​ខណ្ឌ​ដូនពេញ ខណ្ឌ​៧​មករា ខណ្ឌ​ចំការមន និង​ខណ្ឌ​ទួលគោក។

ការ​អនុវត្ត​គម្រោង​នេះ​បាន​ចាប់ផ្តើម​ការ​ពី​ថ្ងៃ​ទី ១៥ ខែ​មីនា ឆ្នាំ ២០១៦ រហូត​ដល់​ដំណាច់​ខែ​មេសា​ឆ្នាំ ២០១៧ ក្នុង​នោះ​ការងារ​សំខាន់ៗ​រួម​មាន​ការ​ផ្លាស់ប្តូរ​សញ្ញា​ចរាចរណ៍​ចាស់​បំពាក់​ភ្លើង​ចរាចរណ៍​ថ្មី​សរុប​ចំនួន ១០០ ទីតាំង​បំពាក់​កាមេរ៉ា​វីដេអូ​ចាប់​រូបភាព​ចលនា​យានយន្ត​ចំនួន ១៨០ គ្រឿង​និង CCTV កាមេរ៉ា​ចំនួន ២៦ គ្រឿង​៕

អត្ថបទគួរចាប់អារម្មណ៍