.jpg)
លោកនាយករដ្ឋមន្ត្រីថ្លែងកាលពីព្រឹកមិញ។ រូបថត SPM
ភ្នំពេញ៖ ជនជាតិអាមេរិកាំង ២ នាក់ ដែលធ្លាប់រិះគន់វិធានការដាក់ឲ្យនៅដាច់ដោយឡែកនៅសណ្ឋគារមេគង្គ ខេត្តកំពង់ចាម គឺជាអ្នកដែលត្រូវបានមន្ត្រីសុខាភិបាលកម្ពុជារកឃើញមានផ្ទុកកូវីដ ១៩ ថ្មី កាលពីថ្ងៃទី ២៤ មីនា។
កាលពីព្រឹកមិញ លោកនាយករដ្ឋមន្ត្រី ហ៊ុន សែន បញ្ជាក់ថា ជនជាតិអាមេរិកាំងមួយគូដែលមកកម្ពុជាតាមកប៉ាល់ Viking Cruise Journey ដែលធ្លាប់រិះគន់កម្ពុជាពីការដាក់ឲ្យនៅដាច់ដោយឡែកនៅខេត្តកំពង់ចាម គឺជាអ្នកដែលត្រូវបានរកឃើញវិជ្ជមានកូវីដ ១៩ ក្នុងចំណោមអ្នកផ្ទុក ៤ នាក់ថ្មី។
លោកនាយករដ្ឋមន្ត្រី ហ៊ុន សែន ថ្លែងយ៉ាងដូច្នេះថា៖ «ឥឡូវនាវានេះ ក្រៅពី ៣ នាក់ ដែលបានឆ្លង ហើយម្នាក់បានជាហើយ ជនជាតិអង់គ្លេសបានជាហើយនៅសល់អង់គ្លេស ២ នាក់ទៀតនៅពេទ្យរុស្ស៊ី ហើយនឹង ៤ នាក់ទើបតែឆ្លងថ្មី។ ៤ នាក់ឆ្លងថ្មីទៀត ២ គូប្ដីប្រពន្ធ»។
លោកបន្តថា៖ «ជនជាតិអាមេរិក ២ នាក់ ជនជាតិអាមេរិកនោះហើយដែលនិយាយថា ជីងចក់ ដែលថាយើងយកទៅដាក់នៅកន្លែងជីងចក់នោះ ព្រោះអាងគាត់អ្នកមាន គាត់ចង់នៅអាសណ្ឋាគារផ្កាយ ៥ គាត់ចង់មកសម្រាកនៅសណ្ឋាគារផ្កាយ ៥។ ប៉ុន្តែបើសិនជាយើងទៅតាមគាត់ប្រហែលជាសណ្ឋាគារផ្កាយ៥នឹងរលាយហើយ។ ឥឡូវនេះជនជាតិអង់គ្លេស២នាក់ប្ដីប្រពន្ធ និងអាមេរិក ២ នាក់ប្ដីប្រពន្ធ ៤ នាក់ផ្សេងទៀត។ អាហ្នឹងជាការធ្លុះធ្លាយទី ២»។
កាលពីថ្ងៃចន្ទសប្ដាហ៍មុនគូស្រករជនជាតិអាមេរិក ២ នាក់ គឺលោក Ryan Knapp និងភរិយាអ្នកស្រី Theresa Gordon បានរិះគន់ការដាក់ពួកគាត់ឲ្យនៅដាច់ដោយឡែករយៈពេល ១៤ ថ្ងៃ នៅខេត្តកំពង់ចាមនោះថា ជា «ការឃុំឃាំង»។ ពួកគេរិះគន់ថានៅសណ្ឋាគារនោះមានជីងចក់ ហើយបន្ទប់ទឹកលិចមានការធ្លាយទឹក។ នេះបើតាមការស្រង់សម្ដីដោយកាសែត The USA Today៕
