រតនគិរីៈ បុរសញៀនថ្នាំម្នាក់ដែលប្រចណ្ឌប្រពន្ធ និងកាប់នាងឲ្យរបួសធ្ងន់នៅភូមិធួយអំពិល ឃុំចាអ៊ុង ស្រុកអូរជុំ ខេត្តរតនគិរីកំពុងត្រូវបានអយ្យការអមសាលាដំបូងខេត្តសាកសួរពីម្សិលមិញ ក្រោយពីសមត្ថកិច្ចឃាត់ខ្លួនកាលពីថ្ងៃទី ១៣ មេសា ហើយបញ្ជូនទៅតុលាការ។
លោក នួន បុល អធិការរងទទួលផែនព្រហ្មទណ្ឌនៃអធិការដ្ឋាននគរបាលស្រុកអូរជុំ ប្រាប់ពីម្សិលមិញថា ជនសង្ស័យឈ្មោះ ផយ ស៊ន អាយុ ៣៩ ឆ្នាំ ត្រូវបានអយ្យការអមសាលាដំបូងខេត្តរតនគិរីកំពុងសាកសួរ។ ជនសង្ស័យត្រូវបានកម្លាំងសមត្ថកិច្ចរបស់លោកចាប់បញ្ជូនមកសាលាដំបូងខេត្តរតនគិរី បន្ទាប់ពីបង្កហេតុបាន ១ ថ្ងៃ ហើយជនសង្ស័យក៏ជាមនុស្សញៀនថ្នាំផងដែរ។
លោកថ្លែងថា៖ «ជនម្នាក់នោះខាងព្រះរាជអាជ្ញាកំពុងសាកសួរគាត់ ហើយខ្ញុំក៏កំពុងរង់ចាំទទួលព័ត៌មានពីការចោទប្រកាន់របស់តុលាការដែរ»។
តាមការប្រាប់ឲ្យដឹងតាមរយៈសាក្សីនៅកន្លែងកើតហេតុលោក ថាគ្រួសារខាងលើដែលមានស្ត្រីរងគ្រោះឈ្មោះ កែង ងិ អាយុ ៣៣ ឆ្នាំ ជាជនជាតិគ្រឹង និងមានកូន ៥ នាក់ជាកសិករ។ បុរសជាប្តីចេះតែបង្កហិង្សាដោយចោទប្រពន្ធរបស់ខ្លួនថាលួចមានសហាយស្មន់ជាមួយប្រុសដទៃ។ ប៉ុន្តែជនសង្ស័យមិនដែលឃើញប្រុសសហាយរបស់ប្រពន្ធផ្ទាល់ភ្នែកម្តងណាឡើយ។
លោកបន្តទៀតថា ជនសង្ស័យជាប្តីក៏ចេះតែបង្កជម្លោះនៅពេលណាដែលខ្លួនផឹកស្រាស្រវឹងរហូតដល់សមត្ថកិច្ចប៉ុស្តិ៍ឃុំអូរជុំ និងអាជ្ញាធរមូលដ្ឋានហៅធ្វើការអប់រំ និងជួយពន្យល់អំពីគ្រោះថ្នាក់ដែលកើតពីអំពើហិង្សានេះទៀត។ ប៉ុន្តែជនសង្ស័យមិនបានយកចិត្តទុកដាក់ស្តាប់ម្តងណាទេ។
លោកបន្តថា លុះនៅវេលាម៉ោងប្រមាណជា ៧ កន្លះព្រឹកនៅថ្ងៃទី ១៣ មេសា ដែលជាថ្ងៃកើតហេតុជនសង្ស័យបានស្រែកជេរស្ត្រីរងគ្រោះ។ ពេលនោះប្រជាពលរដ្ឋបានរាយការណ៍ប្រាប់នគរបាលប៉ុស្តិ៍អូរជុំ ហើយសមត្ថកិច្ចបានចុះទៅអន្តរាគមន៍ដើម្បីទប់ស្កាត់ក្រែងកើតមានអំពើហិង្សាធ្ងន់ធ្ងរព្រោះពលរដ្ឋប្រាប់ថា ជនសង្ស័យមានកាន់កាំបិតខ្វែវក្នុងដៃផង។ ចំពោះប្រវត្តិរបស់ជនសង្ស័យក៏ធ្លាប់ជាប់ពន្ធនាគារ ១ ឆ្នាំកន្លះផងដែរកាលពីឆ្នាំ ២០១៧ ពាក់ព័ន្ធការឆបោកប្រាក់គេ។
លោកថា៖ «សមត្ថកិច្ចខ្ញុំទៅដល់កន្លែងកើតហេតុហើយប្រាប់ជនសង្ស័យថា កុំប្រើហិង្សាតែជនសង្ស័យមិនស្តាប់ និងកាប់ប្រពន្ធនៅមុខខ្ញុំជាប៉ូលិសតែម្តង»។
អធិការរងរូបនេះបន្តថា៖ «ខ្ញុំសួរវាថា បើចោទប្រពន្ធថាមានប្រុសសហាយស្មន់អ៊ីចឹង មានឃើញផ្ទាល់ភ្នែកទេ វាថា អត់ឃើញទេតែវាទាក់ទងមានប្រុស ២-៣ នាក់»។
លោកប្រាប់បន្តថា ស្ត្រីរងគ្រោះត្រូវជនសង្ស័យកាប់ត្រូវចិញ្ចើមខាងឆ្វេង ១ កាំបិត កំភួនដៃឆ្វេង ១ កាំបិត និងត្រូវក្បាលផ្នែកខាងក្រោយ ១ កាំបិតផុងលលាដ៏ក្បាលចេញខួរផង។ ជនរងគ្រោះត្រូវបានកម្លាំងសមត្ថកិច្ចដឹកទៅសង្គ្រោះបន្ទាន់នៅមន្ទីរពេទ្យបង្អែកខេត្តរតនគិរី តែត្រូវខាងមន្ទីរពេទ្យប្រាប់ក្រុមគ្រួសាររបស់ស្ត្រីរងគ្រោះឲ្យយកទៅព្យាបាលនៅមន្ទីរពេទ្យរាជធានីភ្នំពេញវិញព្រោះស្ថានភាពរបួសធ្ងន់ពេក។
លោក បុល ថា៖ «ស្ត្រីរងគ្រោះត្រូវប្តីកាប់ចេញខួរទៅហើយ។ ខ្ញុំគិតថា គាត់មិនរស់ទេ»។
លោក អំ សំអាត នាយករងនៃអង្គការការពារសិទ្ធិមនុស្សលីកាដូថ្លែងថា ពាក់ព័ន្ធអំពើហិង្សាក្នុងគ្រួសាររយៈពេលចុងក្រោយនេះលោកមើលឃើញគួរឲ្យព្រួយបារម្ភ។ ព្រោះថាជនប្រព្រឹត្តចេះតែឃោរឃៅទៅៗដែលពេលខ្លះប្តីសម្លាប់ប្រពន្ធ ឬប្រពន្ធសម្លាប់ប្តី កូនប្រើហិង្សាកាប់ទៅលើឪពុក ឬម្តាយបង្កើត។ ប្រសិនបើអំពើហិង្សានេះកាន់តែកើតឡើងវាជះឥទ្ធិពលមិនល្អដល់សង្គម។
លោកនិយាយថា៖ «យើងទទួលស្គាល់ថា រាជរដ្ឋាភិបាលកម្ពុជាដែលមានក្រសួងកិច្ចការនារីខិតខំប្រឹងប្រែងធ្វើការងារនេះច្រើន។ តែទោះជាយ៉ាងណាករណីអំពើហិង្សាក្នុងគ្រួសារនេះនៅតែជាក្តីបារម្ភ»។
លោកបន្តថា ចំពោះមូលហេតុនៃអំពើហិង្សាភាគច្រើនបុរសចង់ដណ្តើមអំណាចគ្រួសារហើយកាលណាប្រពន្ធ ឬកូនមិនស្តាប់តាមគាត់គឺគាត់ប្រើឥទ្ធិពលរបស់គាត់។ បញ្ហាមួយទៀតអាចទាក់ទងនឹងការប្រើគ្រឿងស្រវឹងគ្រឿងញៀនដែលអ្នកប្រើហិង្សាតែងយកមូលហេតុនេះមកបង្កអំពើហិង្សាក្នុងគ្រួសារ៕