បាត់ដំបងៈ បុរសម្នាក់គាំងបេះដូងស្លាប់ ខណៈបញ្ជូនដល់មន្ទីរពេទ្យស្រុកសង្កែ កាលពីថ្ងៃទី ៣ មេសា បន្ទាប់ពីរាយខ្សែភ្លើងឆក់ប្រពន្ធខ្លួនឯងស្លាប់នៅក្នុងផ្ទះបានប៉ុន្មានម៉ោងក្នុងរឿងប្រចណ្ឌប្រព្រឹត្តនៅភូមិបោះពោធិ៍ ឃុំអូរដំបង១ ស្រុកសង្កែខេត្តបាត់ដំបង។
លោក លឹម ពុទ្ធីឡា ស្នងការរងទទួលផែនការងារព្រហ្មទណ្ឌនៃស្នងការដ្ឋាននគរបាលខេត្តបាត់ដំបងប្រាប់ពីម្សិលមិញថា ជនសង្ស័យឈ្មោះ ពេជ្រ ធារ៉េត អាយុ ៣១ ឆ្នាំ និងប្រពន្ធ ឈ្មោះ ជា ច័ន្ទរចនា អាយុ ៣០ ឆ្នាំរស់នៅភូមិបោះពោធិ៍ ឃុំអូរដំបង ១ ស្រុកសង្កែ ខេត្តបាត់ដំបង និងមានកូនចំនួន ២ នាក់ក្នុងបន្ទុក។
លោកថ្លែងថា៖ «ជនសង្ស័យគាត់ សម្លាប់ប្រពន្ធដោយវិធីរាយខ្សែភ្លើងបណ្តាលឱ្យឆក់ស្លាប់។ រីឯជនសង្ស័យក៏ស្លាប់ដែរក្រោយពីគាត់សម្លាប់ប្រពន្ធរួច។ ដោយជនសង្ស័យមិនស្រួលខ្លួនមន្ត្រីយើងបានដឹកទៅមន្ទីរពេទ្យតែក៏ស្លាប់ទៅដោយជំងឺគាំងបេះដូង»។
បើតាមលោក ស៊ុន សុវណ្ណ អធិការនគរបាលស្រុកសង្កែឱ្យដឹងតាម សាក្សីថាកន្លងមក ២ នាក់ប្តីប្រពន្ធនេះរស់នៅមិនសូវចុះសម្រុងនឹងគ្នា ហើយក៏ធ្លាប់ប្តឹងលែងលះគ្នាទៅអាជ្ញាធរឃុំផងដែរ។ ប៉ុន្តែនៅពេលអាជ្ញាធរឃុំអូរដំបងកោះហៅ ជនសង្ស័យចូលខ្លួនដើម្បីសម្រុះសម្រួលគ្នាជាមួយស្ត្រីជាប្រពន្ធ គឺជនសង្ស័យមិនចូលខ្លួនតាមការកោះហៅរបស់អាជ្ញាធរទេ។
លោក សុវណ្ណ រៀបរាប់តាមចម្លើយរបស់ជនសង្ស័យកាលពីមិនទាន់ស្លាប់ ដែលបានសារភាពប្រាប់សមត្ថកិច្ចថា មូលហេតុដែលរូបគេដាច់ចិត្តរាយខ្សែភ្លើងឆក់សម្លាប់ប្រពន្ធ គឺដោយសារតែរូបគេប្រចណ្ឌនឹងប្រពន្ធ ព្រោះសង្ស័យថា ប្រពន្ធមានលួចលាក់ស្នេហាជាមួយប្រុសផ្សេង។ ប៉ុន្តែរូបគេក៏មិនបានឃើញផ្ទាល់នឹងភ្នែកថាប្រពន្ធពិតជាមានប្រុសផ្សេងផងដែរទេ។ លុះនៅមុនពេលកើតហេតុវេលាម៉ោងជាង ២ រសៀល ថ្ងៃទី ៣ មេសា រូបគេក៏បានពង្រាយខ្សែភ្លើងនៅក្នុងផ្ទះដើម្បីឆក់ប្រពន្ធរបស់គេស្លាប់ពិតមែន។
លោកបញ្ជាក់ថា៖ «ខាងសមត្ថកិច្ចខ្ញុំឃាត់ខ្លួនជនសង្ស័យ ក្រោយសម្លាប់ប្រពន្ធគាត់។ ពេលនោះយើងបានសួរចម្លើយជនសង្ស័យទើបតែបានខ្លះទេ។ ពេលនោះគាត់ យំរៀបរាប់ថាគាត់មានការសោកស្តាយ និងរន្ធត់ចិត្តមិនគួរសម្លាប់ប្រពន្ធគាត់ទេ ប៉ុន្តែពេលនោះគាត់ទំនាស់គ្នាជាមួយប្រពន្ធព្រោះគាត់ខឹងប្រពន្ធគាត់ខ្លាំងពេក»។
បើតាមអធិការរូបនេះ មុនបង្កហេតុប៉ុន្មានថ្ងៃ ជនសង្ស័យធ្លាប់មានជំងឺបេះដូង។ ជនសង្ស័យត្រូវជំងឺបេះដូងរើ និងធ្វើទុក្ខក្នុងខ្លួនចំនួន ២ ដងរួចមកហើយដែរ។ រីឯគ្រូពេទ្យនៅមន្ទីរសុខាភិបាលខេត្តបាត់ដំបងពីម្សិលមិញ ក្រោយធ្វើកោសល្យវិច័យលើសាកសពជនសង្ស័យក៏បានប្រាប់សមត្ថកិច្ចថា ការស្លាប់របស់ជនសង្ស័យ គឺបណ្តាលមកពីជំងឺគាំងបេះដូង។
លោកអធិការប្រាប់ថា កាលពីព្រឹកថ្ងៃទី ៤ មេសា កូនស្រីទាំង ២ នាក់របស់ជនសង្ស័យ និងរបស់ស្ត្រីរងគ្រោះដែរនោះ (កូនច្បងអាយុ ៦ ឆ្នាំ) ត្រូវបានកាកបាទក្រហមជួយទំនុកបម្រុងនូវអំណោយមួយចំនួនមាន អង្ករ មី ទឹកក្រូច ទឹកសុទ្ធ និងថវិកាចំនួន ១០ លានរៀល៕