ក្រចេះ: បុរសជាប្តីវ័យក្មេង ដែលបានប្រើអង្រែបុកគ្រឿង និងដងចប វាយសម្លាប់ប្រពន្ធវ័យចំណាស់ កាលពីថ្ងៃទី ៩ ខែកុម្ភៈ នៅភូមិសំភិន ឃុំកំពង់ចាម ស្រុកសំបូរ ដោយសារតែភ្លើងប្រចណ្ឌ ត្រូវបានសាលាដំបូងខេត្តក្រចេះ ចោទប្រកាន់ពីបទឃាតកម្ម និងបានបញ្ជូនទៅឃុំខ្លួនក្នុងពន្ធនាគារខេត្ត កាលពីម្សិលមិញ ប៉ុន្មានម៉ោង បន្ទាប់ពីសមត្ថកិច្ចចាប់បញ្ជូនដល់តុលាការ។
លោក ជា សុភ័ក្ត្រ ព្រះរាជអាជ្ញារង និងជាអ្នកនាំពាក្យនៃសាលាដំបូងខេត្តក្រចេះ បានឲ្យដឹងកាលពីម្សិលមិញថា ជនត្រូវចោទឈ្មោះ ឈិន សុឃាប អាយុ ៣៣ ឆ្នាំ ដែលបានវាយសម្លាប់ប្រពន្ធនោះ ត្រូវតុលាការចោទប្រកាន់ពីបទឃាតកម្ម ។ បទឃាតកម្មត្រង់មាត្រា ១៩៩ នៃក្រមព្រហ្មទណ្ឌនេះ ប្រសិនបើតុលាការរកឃើញថា ជនត្រូវចោទពិតជាប្រព្រឹត្តបទល្មើសមែននោះ នឹងត្រូវផ្តន្ទាទោស ដាក់ពន្ធនាគារពី ១០ ឆ្នាំ ទៅ ១៥ ឆ្នាំ។
លោក ហួត លឹមហ៊ាង នាយការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តក្រចេះ បានប្រាប់តាមសម្តីជនត្រូវចោទថា មូលហេតុដែលនាំឲ្យគាត់សម្លាប់ប្រពន្ធ ព្រោះតែមានការសង្ស័យប្រពន្ធរបស់ខ្លួន មានទំនាក់ទំនងស្នេហាជាមួយបុរសម្នាក់ដែលរស់នៅក្បែរផ្ទះរបស់គាត់ ទើបបានជាគាត់កើតរឿងប្រចណ្ឌហើយវាយសម្លាប់ប្រពន្ធគាត់ទៅ។
លោកបន្តថា៖ «ជនសង្ស័យប្រាប់ថា គាត់ឈ្លោះគ្នាជាមួយប្រពន្ធរបស់គាត់ព្រោះប្រពន្ធនិយាយថា នាងមានកូនជាមួយបុរសម្នាក់ ហើយសុំគាត់លែងលះគ្នា។ ដោយសារតែគាត់ឮសម្តីបែបនេះហើយទើបធ្វើឲ្យគាត់ខឹងខ្លាំងក៏វាយសម្លាប់ប្រពន្ធគាត់ទៅ»។
លោក ប៊ុន ឈឿន អធិការស្រុកសំបូរឲ្យដឹងដែរថា ស្ត្រីរងគ្រោះ ឈ្មោះ អែប ពៅ អាយុ ៥០ ឆ្នាំជាស្ត្រីមេម៉ាយ និងមានកូនធំៗអស់ហើយ ហើយបានយកគ្នាជាប្តីប្រពន្ធជាមួយជនត្រូវចោទឈ្មោះ សុឃាប តែគ្មានកូនទេ។
ប៉ុន្តែនៅមុនថ្ងៃកើតហេតុ ៣ ថ្ងៃ ជនជាប្តីបានសង្ស័យទៅលើប្រពន្ធរបស់ខ្លួនថា មានទំនាក់ទំនងស្នេហាជាមួយបងប្រុសជីដូនមួយ ដែលមានផ្ទះនៅក្បែរគ្នា ហើយបង្កជម្លោះជាមួយស្រ្តីរងគ្រោះ។ ខណៈដែលកំពុងឈ្លោះគ្នានោះ ជនសង្ស័យបានយកអង្រែបុកគ្រឿង វាយចំក្បាលស្រ្តីរងគ្រោះដែលកំពុងដេកនៅក្នុងអង្រឹងចំនួន ២ អង្រែ បណ្តាលឲ្យបាក់អង្រែហើយស្រ្តីរងគ្រោះបានងើបពីអង្រឹងបំណងរត់ចេញទៅក្រៅផ្ទះ។ ប៉ុន្តែពេលនោះ បុរសជាប្តី បានស្ទុះទៅយកដងចប មកវាយចំកញ្ចឹងកពីក្រោយបន្ថែមទៀត បណ្តាលឲ្យស្រ្តីរងគ្រោះដួលស្លាប់នៅនឹងកន្លែងកើតហេតុ។
លោក ប៊ុន ឈឿន ថ្លែងថា ៖ «មិនដឹងជាគិតយ៉ាងម៉េចទេ បានជាជនសង្ស័យប្រចណ្ឌប្រពន្ធទៅរួច ព្រោះស្រ្តីរងគ្រោះអាយុ ៥០ ឆ្នាំទៅហើយ ហើយវាសមតែប្រពន្ធប្រចណ្ឌប្តី ព្រោះប្តីនៅក្មេង។ រឿងនេះប្រហែលគាត់ចេះតែស្មានខ្លួនឯងហើយចោទថា ប្រពន្ធទៅស្រឡាញ់ប្រុសផ្សេងទៅវិញ»៕