ភ្នំពេញៈ ក្រសួងអប់រំ យុវជន និងកីឡាប្រកាសពន្យារពេល ឬប្តូរការប្រឡងបាក់ឌុបនៅតាមគ្រឹះស្ថានសិក្សាឯកជនពីថ្ងៃទី ១៧-១៨ ខែសីហា ប្តូរទៅប្រឡងនៅថ្ងៃទី ២៧-២៨ សីហា ឆ្នាំនេះវិញ ដើម្បីអនុវត្ដតាមសេចក្ដីណែនាំរបស់រាជរដ្ឋាភិបាលដែលបានកំណត់ឲ្យឈប់សម្រាករយៈពេល ៥ ថ្ងៃចាប់ពីថ្ងៃទី ១៧ ដល់ ថ្ងៃទី ២១ សីហា ដែលរដ្ឋាភិបាលសងជំនួសថ្ងៃសម្រាកចូលឆ្នាំថ្មី។
បើយោងតាមសេចក្ដីណែនាំបន្ថែមស្ដីពីការរៀបចំ និងការប្រព្រឹត្តទៅនៃការប្រឡងសញ្ញាបត្រមធ្យមសិក្សាទុតិយភូមិនៅតាមគ្រឹះស្ថានសិក្សាឯកជនសម្រាប់ឆ្នាំសិក្សា ២០១៩-២០២០ របស់លោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡាប្រាប់ទៅនាយក នាយិកា គ្រឹះស្ថានសិក្សាឯកជន និងលោក លោកស្រីប្រធានមន្ទីរ អប់រំ យុវជន និងកីឡា រាជធានីខេត្ដ ត្រូវអនុវត្ដឲ្យមានប្រសិទ្ធភាពខ្ពស់។
លោករដ្ឋមន្ដ្រីលើកឡើងតាមរយៈសេចក្ដីណែនាំនេះថា កន្លងមកក្រសួងអប់រំ យុវជន និងកីឡាបានចេញសេចក្តីណែនាំលិខិតលេខ ៣៣ ស្តីពីការប្រឡងបាក់ឌុបនៅតាមគ្រឹះស្ថានសិក្សាឯកជនឆ្នាំសិក្សា ២០១៩-២០២០។ សេចក្ដីណែនាំនេះបានកំណត់យកថ្ងៃទី ១៧ សីហា ឆ្នាំ ២០២០ ជាសម័យប្រឡងសញ្ញាបត្រមធ្យមសិក្សាទុតិយភូមិ។
លោករដ្ឋមន្ដ្រីបានបញ្ជាក់ថា៖ «ដោយសាររាជរដ្ឋាភិបាលបានចេញអនុក្រឹត្យលេខ ១០១ អនក្រ.បក ចុះថ្ងៃទី ១៥ កក្កដា ឆ្នាំ ២០២០ ស្ដីពីការអនុញ្ញាតឲ្យមន្ដ្រីរាជការ និយោជិត កម្មករ ឈប់សម្រាកការងារនៅថ្ងៃទី ១៧ ដល់ ២១ ខែសីហា ឆ្នាំ ២០២០ ចំថ្ងៃប្រឡង ក្រសួងសូមកែសម្រួលសម័យប្រឡងសញ្ញាបត្រមធ្យមសិក្សាទុតិយភូមិនៅតាមគ្រឹះស្ថានសិក្សាឯកជនសម្រាប់ឆ្នាំសិក្សា ២០១៩-២០២០ ទៅថ្ងៃទី ២៧ ខែ សីហា ឆ្នាំ ២០២០ វិញ»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាថ្លែងថា ដោយសារស្ថានភាពជំងឺកូវីដ១៩ ក្រសួងអប់រំបានអនុញ្ញាតឲ្យគ្រឹះស្ថានសិក្សាឯកជនរៀបចំការប្រឡងបាក់ឌុបតាមគ្រឹះស្ថានរៀងៗខ្លួនក្រោមកិច្ចសហការជាមួយក្រសួងអប់រំ យុវជន និងកីឡា និងមន្ទីរអប់រំ យុវជន និងកីឡាតាមការចាំបាច់។
មូលហេតុប្តូរសម័យប្រឡង ដោយសារតែការកំណត់កាលបរិច្ឆេទក្នុងសេចក្តីជូនដំណឹងកាលពីថ្ងៃទី ១៤ ខែកក្កដាបានកំណត់យកថ្ងៃទី ១៧-១៨ ខែសីហា ចំថ្ងៃដែលរាជរដ្ឋាភិបាលអនុញ្ញាតឲ្យឈប់សម្រាករយៈពេល ៥ ថ្ងៃចាប់ពីថ្ងៃទី ១៧ ដល់ ២១ ខែសីហាឆ្នាំ ២០២០ សងថ្ងៃសម្រាកថ្ងៃចូលឆ្នាំថ្មី។
លោកបញ្ជាក់ថា៖ «គ្រឹះស្ថានសិក្សាឯកជនត្រូវដាក់ពាក្យស្នើសុំរៀបចំការប្រឡងបាក់ឌុបមកក្រសួងអប់រំ យុវជន និងកីឡាតាមរយៈមន្ទីរអប់រំ យុវជន និងកីឡាឲ្យបានមុនដំណាច់ខែកក្កដា ឆ្នាំ ២០២០ ដើម្បីពិនិត្យ និងទទួលស្គាល់»។
លោក សុវាចា ថ្លែងថាគ្រឹះស្ថានសិក្សាឯកជននីមួយៗត្រូវរៀបចំមណ្ឌលប្រឡង និងបញ្ជូនមកក្រសួងអប់រំ យុវជន និងកីឡាតាមរយៈមន្ទីរអប់រំ យុវជន និងកីឡា ដើម្បីពិនិត្យ និងសម្រេច។ ក្នុង ១ បន្ទប់ប្រឡងមានបេក្ខជនពី ១០ ទៅ ១៥ នាក់។ ធានាអនុវត្តវិធានការសុវត្ថិភាពសុខភាពរបស់ក្រសួងសុខាភិបាល និងអង្គការសុខភាពពិភពលោក។
លោកឱ្យដឹងដែរថា ការប្រឡងបាក់ឌុបរបស់គ្រឹះស្ថានសិក្សាសាធារណៈ ក្រសួងអប់រំនឹងជម្រាបជូននាពេលក្រោយ។ ចំពោះមុខនេះ ក្រសួងអប់រំប្រាប់សិស្សានុសិស្សទាំងអស់បន្តការសិក្សាពីចម្ងាយ ដោយអនុវត្តវិធានការសុវត្ថិភាពសុខភាព តាមការណែនាំរបស់ក្រសួងសុខាភិបាល។
លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្ដមសិក្សាកម្ពុជាដែលមានគ្រឹះស្ថានឧត្ដមសិក្សា និងមធ្យមសិក្សាប្រមាណជាង ៤០ គ្រឹះស្ថាននៅកម្ពុជាជាសមាជិកថ្លែងថា៖ «សព្វថ្ងៃនេះយើងកំពុងពិភាក្សាគ្នាថែមទៀត ថាតើត្រូវរៀបចំការប្រឡងនោះតាមរយៈការចេញវិញ្ញាសាតាមសាលា ឬក៏ត្រូវចេញបែបបទណាមួយពីក្រសួងអប់រំវិញ។ ថ្ងៃស្អែកនេះយើងនឹងប្រជុំជជែកគ្នាចំពោះរឿងនេះបន្ថែមទៀត ដើម្បីដាក់ចេញគោលការណ៍រួមតែម្ដង»។
លោក ឃឹម ផុន ប្រធាននាយកប្រតិបត្តិសាលារៀនសុវណ្ណភូមិថ្លែងថា ការប្រឡងបាក់ឌុបត្រូវរង់ចាំប្រឡងជាមួយសាលារបស់រដ្ឋដែលក្រសួងអប់រំរៀបចំ។
លោកថ្លែងថា៖ «បច្ចុប្បន្នសាលារៀនសុវណ្ណភូមិមានសិស្សថ្នាក់ទី ៩ [ចំនួន] ១ ១៤៦ នាក់ និង ថ្នាក់ទី ១២ [ចំនួន] ៩១៦ នាក់ ដែលត្រូវប្រឡងក្នុងឆ្នាំនេះ។ យើងជ្រើសរើសយកការប្រឡងសម្រាប់សិស្សថ្នាក់ទី ៩ ដោយខ្លួនឯងនៅថ្ងៃទី ៣ ខែសីហាខាងមុខ។ ចំណែកថ្នាក់ទី ១២ យើងរង់ចាំការប្រឡងជាមួយសាលាសាធារណៈរបស់រដ្ឋថ្នាក់ជាតិ»៕