ស្ទឹងត្រែងៈ ខណ្ឌរដ្ឋបាលជលផលខេត្តស្ទឹងត្រែងប្រកាសបើកយុទ្ធនាការត្រួតពិនិត្យ ស្រាវជ្រាវ និងបង្ក្រាបបទល្មើសជលផលជាទ្រង់ទ្រាយធំសម្រាប់រដូវកាលបិទនេសាទឆ្នាំ ២០២០ ដែលនឹងចូលមកដល់នាថ្ងៃទី ១ ខែឧសភា ដើម្បីធានាឲ្យបាននូវនិរន្តរភាពធនធានជលផលទឹកសាបនៅកម្ពុជា។
លោក ទុំ នីរ៉ូ ប្រធានខណ្ឌរដ្ឋបាលជលផលខេត្តស្ទឹងត្រែងប្រាប់ភ្នំពេញ-ប៉ុស្តិ៍នៅថ្ងៃទី ២១ មេសា ថាជាទូទៅរដូវបិទនេសាទចាប់ផ្ដើមពីដើមខែមិថុនាដល់ដំណាច់ខែកញ្ញា ឬពីដើមខែកក្កដាដល់ដំណាច់ខែតុលា។ លើកលែងខេត្តស្ទឹងត្រែងតែមួយគត់ដែលត្រូវបានក្រសួងកសិកម្ម រុក្ខាប្រមាញ់ និងនេសាទ សម្រេចអនុម័តឲ្យប្រកាសបិទនេសាទចាប់ពីដើមខែឧសភាដល់ដំណាច់ខែកញ្ញា ដោយសារតែពិនិត្យឃើញថា ត្រីមេពូជមួយចំនួនក្នុងទន្លេមេគង្គនៃខេត្តនេះបានចាប់ផ្ដើមពងកូនជាបណ្ដើរៗនៅតាមតំបន់ដែលមានអន្លង់ទឹកជ្រៅ។
លោក នីរ៉ូ និយាយថានៅក្នុងរដូវបិទនេសាទនេះក្រៅពីឧបករណ៍នេសាទខុសច្បាប់ ដូចជាគ្រឿងផ្ទុះ ឧបករណ៍ឆក់ត្រី ថ្នាំបំពុល លបកន្ទុយកណ្ដុរ ណរ៉ាវ សម្រាស់ ឧបករណ៍នេសាទមួយចំនួនទៀតដែលរួមមាន មង អួន អញ្ចង និងសន្ទូចរនងក៏ត្រូវបានហាមឃាត់ធ្វើការប្រើប្រាស់ក្នុងការចាប់ត្រីជាលក្ខណៈគ្រួសារផងដែរ។
លោក ទុំ នីរ៉ូ បញ្ជាក់ថា៖ «រដូវបិទនេសាទឆ្នាំនេះ សមត្ថកិច្ចខណ្ឌរដ្ឋបាលជលផលខេត្តស្ទឹងត្រែងយើងនឹងបើកយុទ្ធនាការចុះត្រួតពិនិត្យស្រាវជ្រាវ និងបង្ក្រាបបទល្មើសធនធានជលផលជាលក្ខណៈទ្រង់ទ្រាយធំដូចកាលពីឆ្នាំមុន ដោយមានការចូលរួមពីអាជ្ញាធរពាក់ព័ន្ធរួមទាំងសហគមន៍នេសាទតាមមូលដ្ឋានផងដែរ»។
បើតាមលោក នីរ៉ូ កាលពីរដូវបិទនេសាទឆ្នាំមុន (ឆ្នាំ ២០១៩) សមត្ថកិច្ចជលផលខេត្តស្ទឹងត្រែងបានបង្ក្រាបចាប់ និងដុតកម្ទេចចោលនៅនឹងកន្លែងនូវឧបករណ៍នេសាទខុសច្បាប់រួមមាន អួន មង ណរ៉ាវ សរុប ៤១៣ ត្បូង ដែលមានប្រវែងសរុប ១០៣២៥០ ម៉ែត្រ ឬជាង ១០៣ គីឡូម៉ែត្រ។
រឹបអូសទុកជាសម្បត្តិរដ្ឋនូវវត្ថុតាងមួយចំនួនរួមមាន កាណូតស្មាច់ ៧ គ្រឿង ឧបករណ៍ឆក់ ប្រភេទអាំងឌុចទ័រ ១០ គ្រឿង អាគុយ ៦ គ្រឿង។ មិនតែប៉ុណ្ណោះបានចាប់ និងកសាងសំណុំរឿងបញ្ជូនជនប្រព្រឹត្តបទល្មើស ៧ នាក់ទៅតុលាការ ដោយចោទប្រកាន់ពីបទនេសាទត្រីដោយប្រើឧបករណ៍ឆក់។ រីឯ ២១៤ នាក់ទៀតត្រូវបានព្រមានដោយការចាប់ផាកពិន័យអន្តរកាល និងបង្ខំឲ្យធ្វើកិច្ចសន្យាបញ្ឈប់ការនេសាទត្រីបែបពាណិជ្ជកម្មក្នុងរដូវហាមឃាត់ ។
លោក នីរ៉ូ ក៏បានចែករំលែកនូវក្ដីកង្វល់របស់គាត់អំពីការធ្លាក់ចុះយ៉ាងគំហុកនូវបរិមាណផលត្រី ដោយសារតែសកម្មភាព នេសាទខុសច្បាប់នៅតាមចំណុចអន្លង់ទឹកជ្រៅនៃប៉ែកខាងលើនៃទន្លេមេគង្គក្នុងរដូវប្រាំង។ លោកថ្លែងថា៖ «អន្លង់ទឹកជ្រៅៗនៅក្នុងទន្លេ គឺជាកន្លែងត្រីពង និងភ្ញាស់កូនរួមទាំងត្រីផ្សោតផងដែរ ដែលចាំបាច់ត្រូវមានការចូលរួមការពារ និងអភិរក្សទាំងអស់គ្នា»។
ជាមួយគ្នានេះលោកអំពាវនាវឲ្យប្រជាជនក្នុងសហគមន៍ទាំងអស់សហការគ្នាឲ្យបានល្អក្នុងការខិតខំការពារត្រីជិតផុតពូជ និងតំបន់ត្រីពង បើមិនដូច្នោះ បរិមាណត្រីនេះនឹងបន្តធ្លាក់ចុះជាមិនខាន។
យោងតាមរបាយការណ៍អង្កេតរបស់ក្រុមអ្នកស្រាវជ្រាវនៃនាយកដ្ឋានកិច្ចការជលផលដែលបានចេញផ្សាយកាលពីខែកុម្ភៈ ឆ្នាំ ២០២០ គូសបញ្ជាក់ថាតាមរយៈការគាំទ្ររឹងមាំពីសំណាក់អាជ្ញាធរខេត្ត ឬមូលដ្ឋាន និងពីសំណាក់សហគមន៍ប្រជានេសាទផ្ទាល់ សកម្មភាពនេសាទខុសច្បាប់ក្នុងខេត្តស្ទឹងត្រែងនាឆ្នាំ ២០១៩ ត្រូវបានកាត់បន្ថយបានជិត ៣០ ភាគរយ។ បានសង្គ្រោះជីវិតត្រីមេពូជសំខាន់ៗគ្រប់ប្រភេទ ដែលជិតផុតពូជសរុបជាង ៣០០០ តោនដែលអាចបង្កកំណើតពងកូនបានរាប់លានក្បាលក្នុងទន្លេ និងបឹងធម្មជាតិបន្តទៀតក្នុងប្រទេសកម្ពុជា។
លោក ម៉ុម សារឿន អភិបាលខេត្តស្ទឹងត្រែងកាលពីថ្ងៃទី ១៧ មេសា បានណែនាំប្រជានេសាទទាំងអស់ក្នុងដែនសមត្ថកិច្ចរបស់លោកតាមរយៈចេញសេចក្ដីជូនដំណឹងស្ដីពីរដូវបិទនេសាទឆ្នាំនេះថា ដើម្បីចូលរួមអនុវត្តនូវវិធានការការពារត្រីមេពូជនៅរដូវពងកូនសម្រាប់តំបន់ទន្លេមេគង្គក្នុងភូមិសាស្ត្រខេត្តស្ទឹងត្រែងនៅក្នុងរដូវបិទនេសាទដែលនឹងប្រព្រឹត្តចាប់ពីថ្ងៃទី ១ ឧសភា ដល់ថ្ងៃទី ៣០ កញ្ញា ការនេសាទនឹងត្រូវហាមឃាត់ទាំងស្រុង លើកលែងតែការនេសាទបែបលក្ខណៈគ្រួសារប៉ុណ្ណោះ។
លោក សារឿន បញ្ជាក់ថា៖ «ការនេសាទជាលក្ខណៈគ្រួសារនេះទៀតសោត គឺអនុញ្ញាតឲ្យប្រើប្រាស់តែសន្ទូចផ្លែ ១ លប សំណាញ់ អង្រុត តុម ទ្រូ និងកញ្ច្រែង ប៉ុណ្ណោះ ក្រៅពីនោះឧបករណ៍នេសាទផ្សេងទៀតមិនត្រូវបានអនុញ្ញាតឡើយ»។
តាមប្រតិទិនរបស់រដ្ឋបាលជលផលជារៀងរាល់ឆ្នាំរដូវបិទនេសាទចាប់ពីថ្ងៃទី ១ មិថុនា ដល់ថ្ងៃទី ៣០ កញ្ញា ចំពោះដែននេសាទទឹកសាបដែលនៅប៉ែកខាងជើងខ្សែស្របទន្លេចតុមុខ រួមមាន ខេត្តទាំងអស់ជុំវិញបឹងទន្លេសាប និងបណ្តាខេត្តមួយចំនួនទៀតរួមមានខេត្តកំពង់ចាម ត្បូងឃ្មុំ ក្រចេះ រតនគិរី មណ្ឌលគិរី ព្រះវិហារ ប៉ៃលិន ឧត្តរមានជ័យ។ ផ្នែកខ្លះនៃរាជធានីភ្នំពេញ និងខេត្តកណ្តាលដែលនៅផ្នែកខាងជើងខ្សែស្របទន្លេចតុមុខ។ បណ្ដាខេត្តមួយចំនួនទៀតស្ថិតនៅផ្នែកខាងត្បូងខ្សែស្របទន្លេចតុមុខរួមមានខេត្តព្រៃវែង ស្វាយរៀង តាកែវ កំពង់ស្ពឺ។
ផ្នែកខ្លះនៃរាជធានីភ្នំពេញ និងខេត្តកណ្ដាលស្ថិតនៅផ្នែកខាងត្បូងនៃខ្សែស្រប ទន្លេចតុមុខ រដូវបិទនេសាទនឹងចាប់ផ្ដើមពីថ្ងៃទី ១ ខែកក្កដា ដល់ទី ៣១ ខែតុលា។ ប៉ុន្តែសម្រាប់ខេត្តស្ទឹងត្រែងរដូវបិទនេសាទចាប់ផ្ដើមពីថ្ងៃទី ១ ឧសភា ព្រោះត្រីមេពូជមួយចំនួនបានចាប់ផ្ដើមបង្កាត់ពូជ និងពង កូនជាបណ្ដើរៗនៅតាមអន្លង់ទឹកជ្រៅ៕