.jpg)
មន្ត្រីបង្ក្រាបវត្ថុក្លែងក្លាយពាក់ព័ន្ធសុខាភិបាលជិតផ្សារអូឡាំពិកចុងខែមុន។ រូបក្រសួងពាណិជ្ជកម្ម
ភ្នំពេញៈ ក្រសួងសុខាភិបាលប្រកាសហាមលក់ឱសថ ឧបករណ៍ បរិក្ខារពេទ្យ និងសារធាតុសម្លាប់មេរោគផ្សេងៗទៀតទាក់ទងនឹងវិស័យសុខាភិបាលនៅលើប្រព័ន្ធអនឡាញដោយក្រសួងចាត់ទុកផលិតផលដែលបានប្រកាសលក់តាមអនឡាញទាំងនោះ ភាគច្រើនមិនមានច្បាប់អនុញ្ញាត និងមិនមានគុណភាពត្រឹមត្រូវ។
ការដែលក្រសួងធ្វើការហាមឃាត់បែបនេះ ដោយសារកន្លងមកក្រសួងធ្លាប់បានទិញអាល់កុល ក៏ដូចជាសារធាតុសម្លាប់មេរោគមួយចំនួនពីអ្នកលក់តាមប្រព័ន្ធអនឡាញមកពិនិត្យគុណភាព ហើយឃើញថាអាល់កុល ឬសារធាតុសម្លាប់មេរោគទាំងនោះភាគច្រើនជាប្រភេទផលិតផលដែលមានគុណភាពមិនត្រឹមត្រូវតាមបទដ្ឋានបច្ចេកទេស ឬក្លែងបន្លំដូចជា អាល់កុលខ្លះជាមេតាណុល សុទ្ធសាធ ឬ មេតាណុលលាយជាមួយអេតាណុល។
សេចក្តីប្រកាសព័ត៌មានរបស់ក្រសួងសុខាភិបាលចុះថ្ងៃទី ៣១ ខែមីនា ឲ្យដឹងថា ស្របពេលដែលពិភពលោកក៏ដូចជាកម្ពុជាកំពុងមានករណីជំងឺកូវីដ ១៩ កើនឡើងជាបន្តបន្ទាប់ ធ្វើឲ្យប្រជាជនមានតម្រូវការឱសថ ឧបករណ៍ បរិក្ខារពេទ្យ និងសារធាតុសម្លាប់មេរោគជាចាំបាច់ ដើម្បីប្រើប្រាស់ក្នុងការការពារចម្លងវីរុសកូរ៉ូណា។
ទន្ទឹមនឹងនេះក្រសួងសុខាភិបាលសង្កេតឃើញតាមបណ្ដាញសង្គមហ្វេសប៊ុកថា មានគណនីជាច្រើនកំពុងឆ្លៀតឱកាសផ្សព្វផ្សាយលក់ឱសថ ឧបករណ៍ បរិក្ខារពេទ្យ និងសារធាតុសម្លាប់មេរោគយ៉ាងអនាធិបតេយ្យ។ ក្នុងនោះមានដូចជា ម៉ាស់ ឧបករណ៍វាស់សីតុណ្ហភាព អាល់កុល ជែល និងសារធាតុសម្លាប់មេរោគជាច្រើនប្រភេទទៀតដែលគ្មានលេខបញ្ជិកា ឬលេខប្រវេទន៍ពីក្រសួងសុខាភិបាលឡើយ។
អនុលោមតាមច្បាប់ស្តីពីការគ្រប់គ្រងឱសថក្រសួងសុខាភិបាលបញ្ជាក់ថា ការលក់ឱសថ ឧបករណ៍ បរិក្ខារពេទ្យ និងប្រតិករត្រូវមានលេខបញ្ជិកាពីក្រសួងសុខាភិបាល ហើយតម្រូវឱ្យលក់នៅតាមឱសថស្ថាន និងឱសថស្ថានរងស្របច្បាប់គឺមិនអនុញ្ញាតឲ្យលក់តាមប្រព័ន្ធអនឡាញឡើយ។
ក្រសួងបញ្ជាក់ថា៖ «ការលក់គ្រឿងសម្អាងគ្រប់ប្រភេទត្រូវមានលេខប្រវេទន៍ពីក្រសួងសុខាភិបាល។ ការផ្សព្វផ្សាយឱសថ ឧបករណ៍បរិក្ខារពេទ្យ ប្រតិករ និងគ្រឿងសម្អាងគ្រប់ប្រភេទត្រូវមានការអនុញ្ញាតពីក្រសួងសុខាភិបាល ដើម្បីពិនិត្យខ្លឹមសារផ្សព្វផ្សាយឲ្យមានលក្ខណៈត្រឹមត្រូវតាមឯកសារវេជ្ជសាស្ត្រ ឱសថសាស្ត្រ និងទន្តសាស្ត្រ»។
តាមក្រសួងសុខាភិបាលចំពោះអាល់កុលដែលមានគុណភាពសម្លាប់មេរោគ ជាប្រភេទអេតាណុលពី ៦០ ទៅ ៨០ ភាគរយ។ ដោយឡែកចំពោះសារធាតុមេតាណុលវិញមិនត្រូវបានគេប្រើប្រាស់សម្រាប់សម្លាប់មេរោគនោះឡើយ ដោយសារធាតុនេះគ្មានសកម្មភាពសម្លាប់មេរោគទេ ហើយសារធាតុនេះអាចបង្កឲ្យមានគ្រោះថ្នាក់ដល់អាយុជីវិតទៀតផង។
ក្រសួងសុខាភិបាលក៏បានណែនាំក្នុងលិខិត ១ ច្បាប់ទៀត កុំឲ្យសាធារណជនជឿការឃោសនា ភូតកុហកបោកប្រាស់តាមហ្វេសប៊ុកចំនួន ២ គឺ ៖ ១. Certified និង ២. Semprox Cambodia ដែលកំពុងផ្សព្វផ្សាយលក់ ឧបករណ៍ទូបាញ់កម្ចាត់មេរោគដែលការពារពីវីរុសដ៏កាចសាហាវ និងធុងអាគុយសម្លាប់មេរោគ។
ក្រសួងចាត់ទុកការផ្សព្វផ្សាយនូវឧបករណ៍ទាំង ២ នេះគឺជាព័ត៌មានមិនពិត ដែលអះអាងថា អាចការពារ និងបញ្ឈប់ការរីករាលដាលមេរោគកូរ៉ូណា។ ក្រសួងស្នើអាជ្ញាធរមានសមត្ថកិច្ចចាត់វិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីហ្វេសប៊ុកខាងលើដែលបានផ្សាយព័ត៌មានមិនពិតដើម្បីកុំឱ្យជនឱកាសនិយមបន្តបោកប្រាស់ពលរដ្ឋតទៅទៀត។
ប៉ុន្តែគណនីហ្វេសប៊ុកមួយចំនួនបានបង្ហាញការមិនពេញចិត្តដោយក្នុងនោះគណនីមួយដែលមានឈ្មោះថា មុំ វ៉ារិន បានសរសេរលើទំព័រហ្វេសប៊ុករបស់ខ្លួនថា គ្រាន់តែលក់ម៉ាស់ លក់ទឹកលាងដៃ និងម៉ាស៊ីនវាស់កម្តៅក៏ហាម។ ប្រទេសមួយចំនួនដូចជាអាមេរិក និងចិនអាចលក់នៅលើប្រព័ន្ធអនឡាញដែលមានឈ្មោះ Amazon និង Alibaba បាន។
គណនីដដែលបន្តថា៖ «សូមពិនិត្យឡើងវិញផង កុំឲ្យគេថាម៉ាពិភពលោកមានតែ ១។ សម័យនេះហើយបែបនៅចង់ឲ្យពលរដ្ឋជិះកង់ ម៉ូតូដើរទិញតាម Pharmacy ទៀត។ ហាមតែលក់ថ្នាំពេទ្យ វាត្រឹមត្រូវបំផុតហើយ។ ពីព្រោះវាទាមទារវេជ្ជបញ្ជា ឬឧបករណ៍ធ្វើតេស្ត Covid-19 ឬតេស្តឈាមអ៊ីចឹងហាមទៅ។ ចំណែកលក់ឧបករណ៍ ឬសម្ភារផ្សេងទៀត ដូចជាម៉ាស់ ទឹកលាងដៃសម្លាប់មេរោគ ម៉ាស៊ីនវាស់កម្តៅអី គេមិនដែលហាមឃាត់លក់តាមអនឡាញទេ»។
លោក ហែន ភារៈ វេជ្ជបណ្ឌិតផ្នែកផ្លូវដង្ហើមដែលមានបទពិសោធជាង ២០ ឆ្នាំ ថ្លែងថា ឱសថ និងសម្ភារទាំងនោះអាចនៅតាមឱសថស្ថាន និងឱសថស្ថានរងស្របច្បាប់ប៉ុណ្ណោះ ព្រោះរបស់ទាំងនេះមានគ្រោះថ្នាក់ដល់សុខភាពបើមិនបានពិនិត្យត្រឹមត្រូវ។
លោកវេជ្ជបណ្ឌិតថា ការហាមឃាត់គួរតែអនុវត្តជាយូរមកហើយ ព្រោះអ្នកលក់នៅតាមអនឡាញគ្មានច្បាប់អនុញ្ញាតមួយចំនួន កន្លងមកបានចែកចាយផលិតផលទាំងនោះរួចបាត់ទៅហើយ។
លោកថា៖ «ការដែលបង្ហោះហើយអះអាងថា ផលិតផលទាំងនោះអាចការពារកូវីដបានអ្នកលក់ដូរនោះគឺជាជនឱកាសនិយម។ បានន័យថា ទាន់ឱកាសកូវីដ គាត់ផ្សាយថា ទូបាញ់អាល់កុល និងទូកាំរស្មីទាំងនោះវាអាចសម្លាប់វីរុសកូរ៉ូណាបាន។ ប៉ុន្តែអ្នកដែលផលិតទូហ្នឹងមិនទាន់ស្គាល់អត្តសញ្ញាណពិតប្រាកដរបស់វីរុសកូរ៉ូណាទេ ស្របពេលដែលគ្រូពេទ្យសព្វថ្ងៃក៏មិនទាន់ស្គាល់ច្បាស់ដែរ»។
ទោះយ៉ាងណាលោក ហែន ភារៈ មិនថាឲ្យតែផលិតផលបង្ហោះលក់លើអនឡាញសុទ្ធតែគ្មានគុណភាពនោះទេ ព្រោះមានផលិតផលមួយចំនួនត្រូវបានទទួលស្គាល់ត្រឹមត្រូវ និងមានគុណភាពល្អផងដែរ ហើយបង្កភាពងាយស្រួលដល់ពលរដ្ឋ។
ដូច្នេះលោកថា៖ «អ្នកលក់អនឡាញត្រូវដឹងថា ផលិផលរបស់ខ្លួនលក់ហ្នឹងបានប្រកាសពន្ធ និងបញ្ជិកាត្រឹមត្រូវឬអត់? ផលិតផលទាំងអស់ហ្នឹងក៏អាចទិញនៅតាមសហគ្រាសរបស់រដ្ឋ ឬសហគ្រាសដែលទទួលបានសិទ្ធិពីរដ្ឋ ដូចជា អាល់កុលអីអ៊ីចឹងដោយរក្សាទុកនូវវិក្កយបត្រដើម ដើម្បីបញ្ជាក់ពីប្រភពដើមថា ទិញពីកន្លែងណា? ការធ្វើដូច្នេះគឺបង្កភាពងាយស្រួលដល់យើងអ្នកលក់អនឡាញ។ យើងអាចពិនិត្យមើលខ្លួនឯងក្នុងករណីដែលយើងលក់ខុសច្បាប់ បើគេមិនចាប់ទេ គឺទទួលប្រាក់ចំណេញទៅ ប៉ុន្តែគេចាប់នឹងទទួលទោសព្រហ្មទណ្ឌហើយ»៕
វីដេអូ៖
