.jpg)
លោក ស ខេង ក្នុងកិច្ចប្រជុំនៅក្រសួងមហាផ្ទៃកាលពីថ្ងៃពុធ។ រូបថត ក្រសួងមហាផ្ទៃ
ភ្នំពេញៈ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គជអប) បានពិនិត្យពិភាក្សា និងអនុម័តលើសេចក្តីព្រាងអនុក្រឹត្យស្ដីពីការប្រគល់មុខងារគ្រប់គ្រង និងផ្តល់សេវាសុខាភិបាលទៅឱ្យរដ្ឋបាលរាជធានី-ខេត្ត ដែលមានគោលបំណងធ្វើឱ្យប្រសើរឡើងនូវការផ្តល់សេវាសុខាភិបាលប្រកបដោយគុណភាព សុវត្ថិភាព ប្រសិទ្ធភាព និងសមធម៌។
គ.ជ.អ.ប. ដែលបានបើកកិច្ចប្រជុំលើកទី ១៧ នៅក្រសួងមហាផ្ទៃកាលពីថ្ងៃទី ២០ វិច្ឆិកា បានពិភាក្សា និងអនុម័តលើសេចក្តីព្រាងអនុក្រឹត្យស្តីពីការផ្ទេរមុខងារក្នុងវិស័យសុខាភិបាលទៅឱ្យរដ្ឋបាលរាជធានី-ខេត្ត ដែលមាន ៨ ជំពូក និង ២៧ មាត្រាក្រោមអធិបតីភាពលោក ស ខេង រដ្ឋមន្ត្រីក្រសួងមហាផ្ទៃ និងជាប្រធាន គ.ជ.អ.ប.។ ពិធីនេះក៏មានការចូលរួមពីសមាជិករបស់ គ.ជ.អ.ប. ប្រធានស្ថាប័នពាក់ព័ន្ធក្រុមការងារបច្ចេកទេស វិមជ្ឈការ និងវិសហមជ្ឈការ ថ្នាក់ដឹកនាំ គ.ជ.អ.ប. អភិបាលរាជធានី-ខេត្ត។
អនុក្រឹត្យនេះមានគោលបំណងធ្វើឱ្យប្រសើរឡើងនូវការផ្តល់សេវាសុខាភិបាលប្រកបដោយគុណភាព សុវត្ថិភាព ប្រសិទ្ធភាព និងសមធម៌ តាមរយៈការបង្ខិតការធ្វើសេចក្តីសម្រេចចិត្ត និងការទទួលខុសត្រូវក្នុងការគ្រប់គ្រងសេវាសុខាភិបាលឱ្យទៅកៀកជិតប្រជាពលរដ្ឋ។ ប្រគល់មុខងារគ្រប់គ្រងមន្ទីរសុខាភិបាល ការិយាល័យសុខាភិបាលស្រុកប្រតិបត្តិ និងការផ្តល់សេវាសុខាភិបាលនៃមន្ទីរពេទ្យបង្អែករាជធានី-ខេត្ត មន្ទីរពេទ្យបង្អែកក្រុង ស្រុក ខណ្ឌ មណ្ឌលសុខភាព និងប៉ុស្តិ៍សុខភាពទៅឱ្យរដ្ឋបាលរាជធានី-ខេត្ត។ ផ្ទេរធនធានហិរញ្ញវត្ថុ ទ្រព្យសម្បត្តិ និងធនធានមនុស្សឱ្យទៅរដ្ឋបាល រាជធានី-ខេត្តសម្រាប់អនុវត្តមុខងារសុខាភិបាលដែលបានប្រគល់។
អនុក្រឹត្យនោះបញ្ជាក់នៅជំពូក ៣ ក្នុងមាត្រា ៦ ចែងថា៖ «គ.ជ.អ.ប. ដឹកនាំសម្របសម្រួលជាមួយក្រសួងសុខាភិបាល ក្រសួងមហាផ្ទៃក្រសួងសេដ្ឋកិច្ចនិងហិរញ្ញវត្ថុ និងរដ្ឋបាលរាជធានីខេត្តដើម្បីកំណត់អំពីទំហំធនធានហិរញ្ញវត្ថុ លក្ខខណ្ឌហិរញ្ញវត្ថុ លក្ខខណ្ឌបច្ចេកទេស និងលក្ខខណ្ឌផ្សេងៗទៀតដែលត្រូវផ្ទេរទៅឱ្យរដ្ឋបាលរាជធានី-ខេត្ត ដើម្បីគ្រប់គ្រងចាត់ចែង និងប្រើប្រាស់សម្រាប់អនុវត្តមុខងារបានប្រគល់»។
អនុក្រឹត្យបន្ថែមថា៖ «លក្ខខណ្ឌហិរញ្ញវត្ថុ លក្ខខណ្ឌបច្ចេកទេស និងលក្ខខណ្ឌនានានៃការផ្ទេរហិរញ្ញវត្ថុមានភ្ជាប់លក្ខខណ្ឌទៅឱ្យរដ្ឋបាលរាជធានី-ខេត្ត សម្រាប់អនុវត្តមុខងារសុខាភិបាលដែលបានប្រគល់ត្រូវកំណត់ដោយប្រកាសអន្តរក្រសួងរវាងក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុ និងក្រសួងមហាផ្ទៃ»។
បើយោងតាមជំពូក ៥ មាត្រា ១៧ បានឲ្យដឹងថា រដ្ឋបាលរាជធានី-ខេត្តត្រូវទទួលខុសត្រូវលើការគ្រប់គ្រង ការចាត់ចែង និងការអនុវត្តមុខងារសុខាភិបាលដែលបានប្រគល់ឱ្យមានប្រសិទ្ធភាពស្របតាមគោលនយោបាយសុខាភិបាលជាតិ ផែនការយុទ្ធសាស្ត្រ មគ្គុទ្ទេសក៍ណែនាំស្តីពីការប្រតិបត្តិគ្លីនិក ពិធីសារនៃការពិនិត្យព្យាបាល ស្តង់ដា គុណភាព និងបទដ្ឋានបច្ចេកទេសនានា។ ដើម្បីអនុវត្តមុខងារសុខាភិបាលទាំងនេះ រដ្ឋបាលរាជធានី-ខេត្ត ត្រូវសហការជាមួយ ក្រសួង ស្ថាប័នពាក់ព័ន្ធ ដៃគូអភិវឌ្ឍន៍ អង្គការសង្គមស៊ីវិល និងអ្នកពាក់ព័ន្ធនានាដើម្បីគាំទ្រដល់ការអនុវត្តមុខងារសុខាភិបាលដែលបានប្រគល់។
អនុក្រឹត្យបញ្ជាក់ថា៖ «កៀរគរការគាំទ្រ ថវិកា សម្ភារ និងបច្ចេកទេសពីអ្នកពាក់ព័ន្ធនានា និងអាចប្រើប្រាស់ធនធានឆន្ទានុសិទ្ធិរបស់រដ្ឋបាលរាជធានី-ខេត្តដើម្បីបង្កើនប្រសិទ្ធភាពនៃការផ្តល់សេវាសុខាភិបាលក្នុងដែនសមត្ថកិច្ចរបស់ខ្លួន។ រៀបចំរបាយការណ៍វឌ្ឍនភាពនៃការអនុវត្តមុខងារសុខាភិបាល ដែលបានប្រគល់ក្នុងដែនសមត្ថកិច្ចរបស់ខ្លួនមកក្រសួងសុខាភិបាល និងក្រសួងមហាផ្ទៃព្រមទាំងធ្វើរបាយការណ៍ហិរញ្ញវត្ថុតាមគោលការណ៍ និងនីតិវិធីកំណត់។
អនុក្រឹត្យបន្តថា៖ «រដ្ឋបាលរាជធានី-ខេត្ត ត្រូវគ្រប់គ្រង ចាត់ចែង និងប្រើប្រាស់ ធនធានហិរញ្ញវត្ថុ ទ្រព្យសម្បត្តិ និងបុគ្គលិកដែលបានផ្ទេរសម្រាប់អនុវត្តមុខងារ សុខាភិបាល ដែលបានប្រគល់ឱ្យមានប្រសិទ្ធភាព តម្លាភាព និងគណនេយ្យភាព ស្របតាមគោលការណ៍បែបបទ នីតិវិធី និងបទដ្ឋានបច្ចេកទេសដែលបានកំណត់»។
ជាមួយគ្នានេះដែរបើយោងតាម អនុក្រឹត្យនេះក្នុងមាត្រា ២០ ក្រសួងសុខាភិបាលមានតួនាទី ភារកិច្ច កំណត់លក្ខណៈ វិនិច្ឆ័យ នីតិវិធី គោលការណ៍ណែនាំ និងស្តង់ដាសម្រាប់ការបង្កើត និងដំណើរការមន្ទីរពេទ្យបង្អែក មណ្ឌលសុខភាព ប៉ុស្តិ៍សុខភាព និងទីតាំងសុខាភិបាលឯកជនគ្រប់ប្រភេទ។ កំណត់និយាមសម្រាប់ការសាងសង់ហេដ្ឋារចនាសម្ព័ន្ធសុខាភិបាល និងប្លង់គំរូសាងសង់នៃការសាងសង់ មន្ទីរពេទ្យ មណ្ឌលសុខភាព និងការសម្រេចបង្កើតមន្ទីរពេទ្យ និងមណ្ឌលសុខភាពគ្រប់ប្រភេទ។ កំណត់បញ្ជីស្តង់ដាឱសថសារវ័ន្ត បរិក្ខារពេទ្យ ឧបករណ៍អមវេជ្ជសាស្ត្រសម្រាប់មន្ទីរពេទ្យបង្អែក និងមណ្ឌលសុខភាព និងរៀបចំកិច្ចលទ្ធកម្ម និងបែងចែកឱសថសារវ័ន្ត បរិក្ខារពេទ្យ ឧបករណ៍ អមវេជ្ជសាស្ត្រដល់រដ្ឋបាលរាជធានី-ខេត្ត។
លោក ង៉ាន់ ចំរើន រដ្ឋលេខាធិការក្រសួងមហាផ្ទៃ និងជាប្រធានលេខាធិរដ្ឋាន គ.ជ.អ.ប. មានប្រសាសន៍ថាការអនុម័តលើសេចក្តីព្រាងអនុក្រឹត្យស្ដីពីការប្រគល់មុខងារ គ្រប់គ្រង និងផ្តល់សេវាសុខាភិបាលទៅឱ្យរដ្ឋបាល-រាជធានី-ខេត្ត នឹងជួយពង្រឹងការផ្តល់សេវាកម្មសាធារណៈប្រកបដោយប្រសិទ្ធភាព និងគុណភាព។ លោកចាត់ទុកអនុក្រឹត្យនេះនឹងផ្តល់សិទ្ធិអំណាចដល់រដ្ឋបាលថ្នាក់រាជធានី-ខេត្ត ក្រុង ស្រុក និង ខណ្ឌក្នុងការធ្វើការសម្រេចចិត្តដែលនឹងជួយការផ្តល់សេវាកម្មសាធារណៈ កាន់តែមានប្រសិទ្ធភាព និងទាន់ពេលវេលា។
លោកបញ្ជាក់ថា៖ «ការសម្រេចចិត្តរៀបចំផ្ទេរ និងផ្តល់សេវាចាំបាច់ទាំងអស់ហ្នឹងត្រូវបានបង្ខិតកៀកទៅនៅជិតជាមួយពលរដ្ឋ។ បានន័យថា ខិតកៀកទៅឲ្យរដ្ឋបាលរាជធានី-ខេត្ត និងសិទ្ធិអំណាចទាំងអស់នោះត្រូវផ្ទេរទៅឲ្យរដ្ឋបាលក្រុង ស្រុក ដែលនៅកៀកជិតជាមួយប្រជាពលរដ្ឋ»។
លោកក៏បានឲ្យដឹងដែរថា គ.ជ.អ.ប. បានអនុម័តលើសេចក្តីព្រាងចំនួន ៣ ក្នុងនោះមានអនុក្រឹត្យស្តីពីមុខងារ និងរចនាសម្ព័ន្ធរបស់រដ្ឋបាលក្រុង។ អនុក្រឹត្យស្តីពីមុខងារ និងរចនាសម្ព័ន្ធរបស់រដ្ឋបាលស្រុក និងអនុក្រឹត្យស្តីពីមុខងារ និងរចនាសម្ព័ន្ធរបស់រដ្ឋបាលខណ្ឌ ដើម្បីជួយពង្រឹងនូវការផ្តល់សេវាកម្មសាធារណៈប្រកបដោយគុណភាព និងប្រសិទ្ធភាព។
លោកស្រី ឱ វណ្ណឌីន លោក ឡូ វាសនាគីរី និងលោក លី សូវ៉ាន់ អ្នកនាំពាក្យក្រសួងសុខាភិបាលមិនអាចទាក់ទងសុំការអត្ថាធិប្បាយពាក់ព័ន្ធនឹងការអនុម័តលើសេចក្តីព្រាងអនុក្រឹត្យនេះបានទេពីម្សិលមិញ។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជាបានស្វាគមន៍ការអនុម័តលើសេចក្តីព្រាងអនុក្រឹត្យស្ដីពីការប្រគល់មុខងារនេះ ដោយលោកចាត់ទុកថា ជាការចាប់ផ្តើមវិជ្ជមានក្នុងការផ្តល់សិទ្ធិអំណាច និងថវិកាដល់ថ្នាក់ក្រោមជាតិ។ ប៉ុន្តែលោកថា អាជ្ញាធរមូលដ្ឋានត្រូវអនុញ្ញាតឲ្យប្រជាពលរដ្ឋចូលរួមធ្វើការវាយតម្លៃ និងតាមដានប្រសិទ្ធភាពការងាររបស់សុខាភិបាលថ្នាក់ក្រោមជាតិផងដែរ។
លោកថ្លែងថា៖ «វាគឺជាសញ្ញាមួយនៃការចាប់ផ្តើមដើម្បីឱ្យមាននូវភាពជាម្ចាស់ការនៃរដ្ឋបាលថ្នាក់ក្រោមជាតិទៅលើវិស័យសុខាភិបាលក្នុងការរៀបចំ។ ក្រៅពីការងារបច្ចេកទេសរៀបចំផែនការអភិវឌ្ឍន៍ និងការទម្លាក់ថវិកានៅថ្នាក់ក្រោមជាតិរបស់វិស័យសុខាភិបាល អាជ្ញាធរត្រូវបើកឱ្យប្រជាពលរដ្ឋមានឱកាសក្នុងការតាមដាន និងវាយតម្លៃប្រសិទ្ធភាពការងារសុខាភិបាលថ្នាក់ក្រោមជាតិផងដែរ»៕
