.jpg)
ម៉ាស៊ីនបាញ់ថ្នាំសម្លប់មេរោគប៉េស្តជ្រូកអាហ្វ្រិក។ រូបថត សមាគមចិញ្ចឹមជ្រូកកម្ពុជា
ភ្នំពេញៈ អគ្គនាយកដ្ឋានសុខភាពសត្វ និងផលិតកម្មសត្វ និងសមាគមអ្នកចិញ្ចឹមសត្វកម្ពុជាកាលពីថ្ងៃម្សិលមិញ បានចែកម៉ាស៊ីនសម្រាប់បាញ់ថ្នាំសម្លាប់មេរោគជំងឺប៉េស្ដជ្រូកអាហ្រ្វិកចំនួន ១០ គ្រឿង និងទឹកថ្នាំចំនួន ១៥៥ លីត្រ ដល់កន្លែងសត្តឃាតដ្ឋានចំនួន ១០ ក្នុងនោះមាន ៩ នៅរាជធានីភ្នំពេញ និង ១ កន្លែងទៀត នៅក្រុងតាខ្មៅ ខេត្តកណ្ដាល។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានប្រាប់ភ្នំពេញប៉ុស្ដិ៍ម្សិលមិញថា ម៉ាស៊ីនបាញ់សម្លាប់មេរោគជំងឺប៉េស្ដជ្រូកនេះ មានតម្លៃ ៣៥០ ដុល្លារ ក្នុង ១ គ្រឿង ដែលបង្កើតឡើងដោយសិប្បកម្មជាសមាជិករបស់សមាគមអ្នកចិញ្ចឹមសត្វកម្ពុជា ហើយបានឧបត្ថម្ភមកខាងសមាគម ដើម្បីយកទៅចែកដល់សត្តឃាតដ្ឋានដែលកំពុងខ្វះមធ្យោបាយធ្វើអនាម័យដើម្បីទប់ស្កាត់ជំងឺប៉េស្ដជ្រូកអាហ្វ្រិក។
លោកបន្តថា ជាជំហានដំបូងនេះ គឺសមាគមបានចែកទៅកន្លែងសត្តឃាតដ្ឋានធំៗដែលមានជ្រូកចេញចូលច្រើនជាងគេ និងនៅគ្រប់ខណ្ឌដែលមានកន្លែងសត្តឃាតដ្ឋាន ខណៈកន្លែងសេសសល់ក្នុងរាជធានីភ្នំពេញមួយចំនួនទៀតនឹងអាចទទួលបាននៅពេលក្រោយ។
លោកថា៖ «កន្លែងសត្តឃាតដ្ឋានដែលចុះបញ្ជីស្របតាមច្បាប់នៅភ្នំពេញមានពី ១៧ ទៅ ១៨ កន្លែង ហើយម៉ាស៊ីននេះងាយស្រួលគឺអូសបាញ់តែ ម្ដងហើយ ១ គ្រឿង តម្លៃ ៣៥០ ដុល្លារហ្នឹង គិតទាំងម៉ូទ័រទុយោ និងរទេះរុញ»។
ជំងឺប៉េស្ដជ្រូកអាហ្វ្រិកត្រូវបានរកឃើញផ្ទុះឡើងដំបូងនៅកម្ពុជានាថ្ងៃទី ២២ ខែមីនា នៅខេត្តរតនគិរី និងបានរាលដាលដល់ខេត្តត្បូងឃ្មុំ ស្វាយរៀង ព្រៃវែង និងខេត្តកណ្ដាល ដោយបានធ្វើឱ្យជ្រូករាប់ពាន់ក្បាល ងាប់ និងត្រូវបានសម្លាប់ចោល។ លោក ស្រ៊ុន ពៅ បន្ថែមថាដោយសារជំងឺប៉េស្ដជ្រូកអាហ្វ្រិកនេះ ធ្វើឱ្យពលរដ្ឋខ្លាចរអាមិនចង់បរិភោគសាច់ជ្រូកជាហេតុធ្វើឱ្យការផ្គត់ផ្គង់ថយចុះជាង ១ ខែមកនេះ និងធ្វើឱ្យអ្នកចិញ្ចឹមជ្រូកប្រឈមនឹងការខាតបង់ប្រាក់អស់ជាច្រើន។
លោកបានអះអាងថា កាលពីមិនទាន់មានផ្ទុះជំងឺប៉េស្ដជ្រូកអាហ្វ្រិក គឺកម្ពុជាត្រូវការសត្វជ្រូកផ្គត់ផ្គង់ទីផ្សារប្រហែល ៧ ពាន់ក្បាលរៀងរាល់ថ្ងៃ ក្នុងនោះមានជាង ១ ពាន់ក្បាល នាំចូលពីថៃ។ ប៉ុន្តែបច្ចុប្បន្នការផ្គត់ផ្គង់សល់តែជាង ៣ ពាន់ក្បាលទេ។
លោកថា៖ «កាលពីមុនយើងខ្វះតែជាង ១ ពាន់ទេ តែឥឡូវជ្រូកក្នុងស្រុកយើងប្រើមិនទាំងអស់ផងយើងនាំចូលអីទៀត»។ កាលពីថ្ងៃម្សិលមិញមិនអាចសុំការអត្ថាធិប្បាយពីលោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វបានទេ ប៉ុន្តែលោកធ្លាប់ប្រាប់ភ្នំពេញប៉ុស្ដិ៍កាលពីខែកក្កដាថា ក្រសួងបានដាក់ឱ្យមានឧបករណ៍ចល័តចំនួន ៤ គ្រឿង ដើម្បីធ្វើតេស្ដឈាមសត្វជ្រូកនៅទីតាំងផ្ទុះជំងឺ ដើម្បីឱ្យកសិករដែលមានសត្វជ្រូកគ្មានជំងឺអាចនាំចេញពីតំបន់នោះទៅលក់នៅខាងក្រៅបាន។
ជាមួយគ្នានេះ លោក ប៊ុន ទួន ស៊ីម៉ូណា ប្រធានមន្ទីរកសិកម្មខេត្តកណ្ដាលបានប្រាប់ភ្នំពេញប៉ុស្ដិ៍ម្សិលមិញថា ស្រុកស្អាង និងស្រុកខ្សាច់កណ្ដាល ដែលរាលដាលជំងឺប៉េស្ដជ្រូកអាហ្វ្រិកកាលពីដើមខែកក្កដា ដែលធ្វើឱ្យជ្រូកជាង ១ ពាន់ក្បាលបានងាប់ និងសម្លាប់ចោល នោះគឺរយៈពេលជាង ១ សប្ដាហ៍មកនេះ លែងមានជ្រូកឈឺ និងងាប់ទៀតហើយ។
លោក ស៊្រុន ពៅ សង្ឃឹមថា តម្រូវការសាច់ជ្រូកនៅលើទីផ្សារកម្ពុជា នឹងមានការកើនឡើងដូចធម្មតាវិញនៅក្នុងរយៈពេលដ៏ខ្លីខាងមុខនេះ ខណៈជំងឺប៉េស្ដជ្រូកអាហ្វ្រិក ត្រូវបានក្រសួងសុខាភិបាល និងក្រសួងកសិកម្មប្រកាសថា មិនឆ្លងទៅមនុស្សទេ៕
