.jpg)
អាវុធហត្ថខេត្តស្ទឹងត្រែងប្រគល់រថយន្តស្លាកលេខ ខ.ម ទៅឲ្យគយថ្ងៃទី ១៨ កក្កដា។រូប FB
ស្ទឹងត្រែងៈ សមត្ថកិច្ចកងរាជអាវុធហត្ថខេត្តស្ទឹងត្រែងបានប្រគល់រថយន្តចង្កូតស្ដាំចំនួន ៧ គ្រឿង ដែលត្រូវបាននាំចូលដោយខុសច្បាប់ និងប្រើប្រាស់ស្លាកលេខយោធាក្លែងក្លាយទៅឱ្យសមត្ថកិច្ចគយ និងរដ្ឋាករខេត្ត ដើម្បីអនុវត្តវិធានការទៅតាមច្បាប់ បន្ទាប់ពីរឹបអូសបាននៅពេលចុះត្រួតពិនិត្យយានយន្ត ប្រើប្រាស់ស្លាកលេខ ខ.ម។
ការប្រគល់រថយន្តដែលត្រូវបានគេបន្លំប្រើប្រាស់ជារថយន្តរបស់យោធានេះគឺសមត្ថកិច្ចអាវុធហត្ថបានប្រគល់ទៅឲ្យខាងសមត្ថកិច្ចគយកាលពីថ្ងៃទី ១៨ ខែកក្កដា ដែលធ្វើឡើងក្នុងបញ្ជាការដ្ឋានកងរាជអាវុធហត្ថខេត្តស្ទឹងត្រែង។ រថយន្តចង្កូតស្ដាំត្រូវបានរដ្ឋាភិបាលហាមឃាត់មិនឱ្យនាំចូលតាំងពីឆ្នាំ ២០១៥ ។
លោក ស៊ីម គួន ប្រធានមន្ទីរយុត្តិធម៌នៃបញ្ជាការដ្ឋានកងរាជអាវុធហត្ថខេត្តស្ទឹងត្រែង បដិសេធធ្វើអត្ថាធិប្បាយអំពីការប្រគល់រថយន្តខុសច្បាប់ទាំងនេះ និងជំរុញឱ្យទៅសួរលោក អៀង វ៉ាន់ឌី ដែលជាមេបញ្ជាការវិញ ប៉ុន្តែទូរស័ព្ទរបស់លោក វ៉ាន់ឌី ពុំអាចទាក់ទងបានឡើយ។
ជាមួយគ្នានេះលោក សៅ វុត្ថា មេបញ្ជាការកងរាជអាវុធហត្ថក្រុងស្ទឹងត្រែងក៏ពុំអាចធ្វើអត្ថាធិប្បាយអំពីការប្រគល់រថយន្តទាំងនេះទៅឱ្យគយនោះដែរ ខណៈលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានជំរុញឱ្យទៅសួរខាងគយ និងរដ្ឋាករវិញ។
ភ្នំពេញប៉ុស្ដិ៍មិនអាចសុំការបញ្ជាក់ពីលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករបានទេពីម្សិលមិញ ដោយទូរស័ព្ទហៅចូលច្រើនលើកលោកមិនទទួលទូរស័ព្ទ។ ប៉ុន្តែលោក ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូនបានបញ្ជាក់ថា រថយន្តដែលប្រើប្រាស់ស្លាកលេខ ន.ប ឬ ខ.ម មិនមែនជារថយន្តដែលត្រូវចុះបញ្ជីនៅក្រសួងសាធារណការឡើយ។
លោកថា៖ «ទាក់ទងនឹងរឿងវិធានការចំពោះរថយន្តនាំចូលខុសច្បាប់ គ្មានពន្ធនេះ គឺសម្រាប់កន្លែងខ្ញុំ រថយន្តដែលគ្មានពន្ធគឺចុះបញ្ជីអត់កើតទេ ហើយកាលណាចុះបញ្ជីអត់បាន គឺអត់បានស្លាកលេខប្រើប្រាស់ទេ»។
កាលពីខែឧសភាកន្លងទៅកងរាជអាវុធហត្ថខេត្តស្ទឹងត្រែងក៏ធ្លាប់បានប្រគល់រថយន្តដែលនាំចូលខុសច្បាប់ និងប្រើប្រាស់ស្លាកលេខយោធាក្លែងក្លាយនេះ ទៅឱ្យខាងគយ និងរដ្ឋាករមានចំនួន ១២ គ្រឿងដែរ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានលើកឡើងថា រថយន្តដែលប្រើប្រាស់ស្លាកលេខ ន.ប និង ខ.ម និងរដ្ឋជាដើម គឺសុទ្ធតែមានរឿងអាស្រូវថាជាស្លាកលេខក្លែងក្លាយ។ លោកបញ្ជាក់ថា រថយន្តប្រើប្រាស់ស្លាកលេខក្លែងក្លាយ គឺធ្វើឱ្យបាត់បង់ពន្ធគយ និងពន្ធដារចូលទៅរដ្ឋ ខណៈរថយន្តខ្លះប្រើប្រាស់ស្លាកលេខ ខ.ម គឺដើម្បីកាងមុខរបរខុសច្បាប់របស់ខ្លួន ដូចជាការដឹកជញ្ជូនអនុផលព្រៃឈើខុសច្បាប់ និងទំនិញខុសច្បាប់មួយចំនួនទៀត។
លោក សន ជ័យ បានបញ្ជាក់ថា៖ «យើងសង្ស័យថា ស្លាកលេខក្លែងក្លាយគឺផលិតដោយក្រុមសង្គមងងឹត ព្រោះអីបើស្លាកលេខដែលចេញដោយក្រសួងការពារជាតិ គឺមានអត្តសញ្ញាណត្រឹមត្រូវ»៕
វីដេអូ៖
