The Phnom Penh Post Search

Search form




Logo of Phnom Penh Post newspaper Phnom Penh Post - ប្រជានេសាទ​ខ្មែរ​ ៥៩ នាក់​ទៀត​ត្រូវ​បាន​សង្គ្រោះ​នៅ​លើ​កោះ​ពីរ​របស់​ប្រទេស​ឥណ្ឌូនេស៊ី

ប្រជានេសាទ​ខ្មែរ​ ៥៩ នាក់​ទៀត​ត្រូវ​បាន​សង្គ្រោះ​នៅ​លើ​កោះ​ពីរ​របស់​ប្រទេស​ឥណ្ឌូនេស៊ី

Content image - Phnom Penh Post
ប្រ​ជា​នេសាទ​ដែល​បានសង្គ្រោះ​កន្លងមក​​​។ ម៉ៃ វីរៈ

ប្រជានេសាទ​ខ្មែរ​ ៥៩ នាក់​ទៀត​ត្រូវ​បាន​សង្គ្រោះ​នៅ​លើ​កោះ​ពីរ​របស់​ប្រទេស​ឥណ្ឌូនេស៊ី

ភ្នំពេញៈ ក្រសួង​ការ​បរទេស ​បានឲ្យ​ដឹង​កាល​ពី​ថ្ងៃ​ពុធថា ប្រជា​នេសាទ​កម្ពុជា ៥៩ នាក់​ទៀត គ្រោង​នឹង​វិល​ត្រឡប់​មក​ប្រទេស​កម្ពុជា​វិញ ក្នុង​រយៈពេល ៣ សប្តាហ៍​ទៀត បន្ទាប់​ពី​ពួកគេ​ត្រូវ​បាន​រកឃើញ​នៅ​លើ​កោះ​ឥណ្ឌូនេស៊ី​ចំនួន ២។

លោក កុយ គួង អ្នក​នាំ​ពាក្យ​ក្រសួង​ការ​បរទេស បាន​ឲ្យ​ដឹង​នៅ​ក្នុង​សេចក្តី​ថ្លែង​ការណ៍​មួយ​ដែល​ចេញ​​ផ្សាយ​កាល​ពី​ថ្ងៃ​ពុធ​ម្សិលមិញថា ដោយ​មាន​ជំនួយ​ពី​អាជ្ញាធរ​ឥណ្ឌូនេស៊ី អ្នក​នេសាទ ២១ នាក់ ត្រូវ​បាន​សង្គ្រោះ​ពីនាវា​ថៃ​ ស្ថិត​នៅ​កោះ Ambon ​ខណៈ​ដែល​ពលករ ៣៨ នាក់​ទៀត​ត្រូវ​បាន​សង្គ្រោះ​ពី​កោះ Benjina។

លោក កុយ គួង បាន​បន្ថែម​ថា៖ «អ្នក​នេសាទ​ទាំង​នេះ​ត្រូវ​បាន​សង្គ្រោះ​នា​ពេល​ថ្មីៗ​នេះ។ យើង​កំពុង​ព្យាយាម​សម្រួល​ឲ្យ​ពួក​គេ​វិល​ត្រឡប់​មក​កម្ពុជា​វិញ​ឲ្យ​បាន​ឆាប់ ព្រោះ​វា​ចំណាយ​ច្រើន ប្រសិន​បើ​នៅយូរ»។

លោក​បាន​បន្ត​ថា មន្រ្តី​ដែល​ពាក់​​ព័ន្ធនឹង​ករណី​នេះ បាន​ធ្វើ​អន្តរាគមន៍ និង​បង្ខំ​ឲ្យ​ម្ចាស់​ទូក​បង់​ប្រាក់​ខែ​ពលករ និង​បង់​ប្រាក់​​លើ​ដំណើរ​វិល​ត្រឡប់​របស់​ពួកគេ។

អ្នក​នេសាទ ត្រូវ​បាន​រំពឹង​ថា នឹង​វិលមក​ដល់​កម្ពុជា​វិញ នៅ​ចុង​ខែ​ឧសភា ​ឬ​ដើម​ខែ​មិថុនា ​ប៉ុន្តែ ​គិត​មក​ដល់​ពេល​នេះ ពួកគេ​គ្មាន​លិខិត​ឆ្លង​ដែន​ទេ។

អង្គការ​ទេសន្តរ​ប្រវេសន៍ បាន​ឲ្យ​ដឹង​ថា អង្គការ​កំពុង​គ្រោង​​រៀប​ចំ​ឲ្យ​ពួកគេ​វិល​មក​កម្ពុជា។

លោក Brett Dickson មន្រ្តី​កម្មវិធី​អង្គការ​ទេសន្តរ​ប្រវេសន៍ ​បាន​ឲ្យ​ដឹង​តាម​អ៊ីមែល​ថា៖ «អង្គការ​ទេសន្តរ​ប្រវេសន៍​កំពុង​​សម្រប​សម្រួល​ជាមួយ​នឹង​ស្ថានទូត​កម្ពុជា​ប្រចាំ​នៅ​ឥណ្ឌូនេស៊ី ​លើ​ករណី​​អ្នក​នេសាទ​ជា​ច្រើន​ករណី។ យើង​នៅ​តែ​កំពុង​កំណត់​អត្តសញ្ញាណ ហើយ​ស្ថានទូត​កំពុង​ចេញ​វិញ្ញា​បនបត្រ​សម្គាល់​អត្តសញ្ញាណ/ឯកសារ​ធ្វើ​ដំណើរ»។

គួរ​បញ្ជាក់​ផងដែរ​ថា នេះ​ជា​ប្រជានេសាទ​ក្រុមទី ២ ដែល​ត្រូវ​​បាន​សង្គ្រោះ​ពី​ឥណ្ឌូនេស៊ី។

នៅ​​ដើម​ខែ​នេះ ប្រជានេសាទ ៥៩ ទៀត​ ត្រូវ​បាន​​នាំ​មក​ផ្ទះ​វិញ បន្ទាប់​ពី​​ជួប​ប្រទេស​លក្ខខណ្ឌ​ធ្វើការ​ដូច​ទាសករ និង​​ការ​បង្ខំ​ឲ្យ​ធ្វើ​ការ​ជា​ទម្ងន់។ ប្រជានេសាទ ៥៨ នាក់ ត្រូវ​បាន​​សង្គ្រោះ​ បន្ទាប់​ពី​ការ​ស៊ើប​អង្កេត​របស់ទី​ភ្នាក់​ងារ​សារ​ព័ត៌មាន​ AP ដែល​បង្ហាញ​ពី​របៀប​ដែល​ទូក​នេសាទ​ថៃ ដែល​ដំណើរ​ការ​​នៅ​សមុទ្រ​ឥណ្ឌូនេស៊ី ឃុំ​ខ្លួន​កម្មករ​របស់​ខ្លួន ខណៈ​​ដែល​​ពួកគេ​​​ជា​អ្នក​នេសាទ​ត្រី​សមុទ្រ ដែល​ដឹក​ជញ្ជូន​ជុំវិញ​ប្រទេស​កម្ពុជា។

ប្រជានេសាទ​ទី ៥៩ ដែល​ជា​ជន​រង​គ្រោះ មិនស្ថិត​ក្រុម​ប្រជានេសាទ​តែ​មួយ​នោះ​ទេ៕TK

អត្ថបទគួរចាប់អារម្មណ៍