.jpg)
នៅព្រឹកនេះ ប្រជាពលរដ្ឋដែលកំពុងស្នាក់នៅក្នុងភូមិសាស្ដ្រ «តំបន់ក្រហម» សម្រុកទៅធ្វើតេស្ត នៅ វិហារព្រះយេស៊ូ ទល់មុខបញ្ជាការដ្ឋានកងរាជអាវុធហត្ថរាជធានីភ្នំពេញ។ រូបថត យូសុះ អាប់ឌុលរ៉ាស់ហ៊ីម
ភ្នំពេញ៖ នៅព្រឹកនេះ ប្រជាពលរដ្ឋដែលកំពុងស្នាក់នៅក្នុងភូមិសាស្ដ្រ «តំបន់ក្រហម» ក្នុងរាជធានីភ្នំពេញសម្រុកទៅធ្វើតេស្ត តាមសេចក្តីណែនាំរបស់ក្រសួងសុខាភិបាល។
កាលពីយប់ថ្ងៃទី ២៣ ខែមេសា រដ្ឋបាលរាជធានីភ្នំពេញបានចេញសេចក្តីណែនាំស្តីពីការប្រមូលសំណាក ដោយដាក់កំហិតឱ្យប្រជាពលរដ្ឋទាំងអស់ក្នុងតំបន់ដែលមានផ្ទុះការឆ្លងរាលដាលជំងឺកូវីដ១៩ ត្រូវទៅធ្វើតេស្តរកមេរោគឆ្លងដ៏កាចសាហាវនេះ។
ជាមួយនឹងការសម្រុកទៅធ្វើតេស្តនេះ ប្រជាពលរដ្ឋម្នាក់ដែលសុំមិនបញ្ចេញឈ្មោះបានប្រាប់ភ្នំពេញប៉ុស្តិ៍ បន្ទាប់ពីបានត្រឡប់មកពីកន្លែងធ្វើតេស្ត ក្នុងសង្កាត់ស្ទឹងមានជ័យវិញថា លោកមិនបានទទួលការធ្វើតេស្តនេះទេ ព្រោះមានតែមនុស្សណែនតាន់តាប់។ លោកបន្តថា ម្យ៉ាងទៀតក្រុមសន្ដិសុខដែលប្រចាំការនៅកន្លែងធ្វើតេស្តបានប្រកាសប្រាប់ពលរដ្ឋថា ក្នុងដំណាក់កាលនេះ ការធ្វើតេស្តគឺលើកទឹកចិត្តឲ្យកម្មករនិយោជិត ធ្វើតេស្ដមុន។
តាមរដ្ឋបាលសាលារាជធានីភ្នំពេញបានឲ្យដឹងថា ចំពោះប្រជាពលរដ្ឋដែលត្រូវបានកំណត់ជាតំបន់ក្រហម នៃសង្កាត់ស្ទឹងមានជ័យ១ សង្កាត់ស្ទឹងមានជ័យ២ និងសង្កាត់ស្ទឹងមានជ័យ៣ ក្នុងខណ្ឌមានជ័យ ត្រូវទៅយកសំណាកនៅទីតាំងទី១ នៅទីលានចាក់សំរាមចាស់ក្នុងភូមិដំណាក់ធំ ទីតាំងទី២នៅតាមបណ្តោយផ្លូវលេខ ១០១៩ (ផ្លូវទ្រុងមាន់) ក្នុងភូមិទ្រា និងទី ៣ នៅ វិហារព្រះយេស៊ូ ទល់មុខបញ្ជាការដ្ឋានកងរាជអាវុធហត្ថរាជធានីភ្នំពេញ។
ចំណែកប្រជាពលរដ្ឋដែលរស់នៅក្នុងទីតាំង ដែលត្រូវបានកំណត់ជាតំបន់ក្រហមនៃសង្កាត់ចោមចៅទី១ ខណ្ឌពោធិ៍សែនជ័យត្រូវទៅយកសំណាកនៅ ទី១ សាលាបឋមសិក្សាសុភមង្គមក្នុងភូមិបប្រ៉កខាងជើង ទី២ នៅផ្សារ K-Mall ក្នុងភូមិត្រពាំងថ្លឹង១ និងទី ៣ នៅដីឡូតិ៍ខាងក្រោយផ្សារឯករាជ្យក្នុងភូមិត្រពាំងថ្លឹង។
ចំពោះប្រជាពលរដ្ឋដែលរស់នៅក្នុងទីតាំងដែលត្រូវបានកំណត់ជាតំបន់ក្រហមនៃភូមិ១៤ ភូមិ១៦ និងភូមិ១៧ សង្កាត់បឹងសាឡាង ខណ្ឌទួលគោក ត្រូវទៅយកសំណាកនៅក្នុងបរិវេណមជ្ឈមណ្ឌលវប្បធម៌ចេនឡា៕
