ភ្នំពេញ: ពលរដ្ឋជាង ៦០០ នាក់ រស់នៅក្នុងបុរីរបស់ក្រុមហ៊ុន 7NG នៅភូមិដំណាក់ត្រយឹង សង្កាត់ចោមចៅទី ២ ខណ្ឌពោធិ៍សែនជ័យ បាននាំគ្នាតវ៉ាប្រឆាំងការលក់ទីតាំងចំណតរថយន្តរួមទៅឱ្យបុគ្គលផ្សេងដោយអះអាងថា ដីនេះបម្រើឱ្យផលប្រយោជន៍រួម ប៉ុន្ដែម្ចាស់បុរីថា មិនស្ថិតក្រោមការគ្រប់គ្រងរបស់ក្រុមហ៊ុនទៀតទេ ខណៈអាជ្ញាធរឱ្យប្ដឹងទៅតុលាការ។
អ្នកស្រី ណុប ភក្ត្រា តំណាងពលរដ្ឋទាំងនោះបានថ្លែងកាលពីថ្ងៃទី ១៩ តុលា ថា អ្នកស្រី និងពលរដ្ឋជាង ៦០០ នាក់នេះ បានតវ៉ាប្រឆាំងនឹងក្រុមហ៊ុន 7NG ចំពោះការលក់ដីចំណតរថយន្តទំហំ ១៩ គុណ ៧៦ ម៉ែត្រ ដែលមានទីតាំងក្នុងបុរី។ ចំណតរថយន្តនេះជាដីរួមរបស់ពលរដ្ឋក្នុងបុរីដែលមានកិច្ចសន្យាត្រឹមត្រូវពីម្ចាស់ក្រុមហ៊ុន។
អ្នកស្រីបានបន្តថា ដីនេះត្រូវបានពលរដ្ឋទុកជាទីតាំងចតរថយន្ត និងសម្រាប់ប្រើប្រាស់រៀបចំកម្មវិធីបុណ្យ ពិធីជប់លៀង និងពិធីអាពាហ៍ពិពាហ៍។ ប៉ុន្ដែមួយរយៈចុងក្រោយនេះ ស្រាប់តែមានបុគ្គលចំនួន ១២ នាក់ បានមកព័ទ្ធរបង និងឈប់ឱ្យពលរដ្ឋក្នុងបុរីប្រើប្រាស់តទៅទៀត ដោយអះអាងថា ជាដីរបស់ពួកគាត់ដែលបានទិញពីក្រុមហ៊ុន 7NG រួចហើយ។
អ្នកស្រី ភក្ត្រា បញ្ជាក់ថា៖ «ដីហ្នឹងយើងបានចុះកិច្ចសន្យាជាមួយខាងម្ចាស់បុរីថា រក្សាទុកសម្រាប់ចតឡាន ឬប្រសិនបើមានអ្នកចង់ធ្វើបុណ្យ ឬពិធីការកូនចៅអីគឺមកធ្វើនៅលើដីហ្នឹងមក និយាយរួមគឺម្ចាស់បុរី និងពលរដ្ឋព្រមព្រៀងគ្នាត្រូវទុកដីហ្នឹងឥឡូវបែរជាលក់ទៅឱ្យបុគ្គលឯកជនទៅវិញពួកយើងទាមទារឱ្យទុកដីហ្នឹងដដែលដើម្បីបម្រើផលប្រយោជន៍រួម»។
ពលរដ្ឋម្នាក់សុំមិនបញ្ចេញឈ្មោះដែលចូលរួមតវ៉ាដែរនោះ បានថ្លែងកាលពីថ្ងៃ ១៩ តុលា ថា ក្រុមហ៊ុន 7NG បានលួចលក់ដីចំណតរថយន្តទៅឱ្យបុគ្គលចំនួន ១២ នាក់ ដែលរស់នៅក្នុងបុរីនេះដែរ ក្នុងនោះរួមមានឈ្មោះលោក គឹម យ៉ាន់ ប្រធានសហគមន៍ដែលគ្រប់គ្រងពលរដ្ឋក្នុងបុរី,ឈ្មោះ គឹម ឌី ត្រូវជាកូន គឹម យ៉ាន់, គឹម ឆន ត្រូវជាសាច់ញាតិ គឹម យ៉ាន់, គឹម ឌីម៉ង់ ត្រូវជាកូន គឹម យ៉ាន់, ផាន់ ណារិន្ទ ត្រូវជាបក្ខពួក គឹម យ៉ាន់ និងបុគ្គលមួយចំនួនទៀត។
លោកបន្តថា លោកមិនពេញចិត្តចំពោះការលក់ផ្ដាច់ទៅឱ្យក្រុមបុគ្គលបែបនេះទេ តែត្រូវតែរក្សាដីនេះសម្រាប់ប្រើប្រាស់ទាំងអស់គ្នា។ ពួកលោកជាអតីតពលរដ្ឋរស់នៅបឹងកក់ ដែលរងការបណ្ដេញចេញពីឆ្នាំ ២០០៧ ហើយនៅឆ្នាំ ២០០៨ ក៏បាននាំគ្នាមកទិញផ្ទះពីក្រុមហ៊ុន 7NG ដើម្បីរស់នៅ។
លោកថា៖ «អាជ្ញាធរ និងម្ចាស់បុរីត្រូវតែជួយរកយុត្តិធម៌ឱ្យពលរដ្ឋទាំងអស់នេះព្រោះពួកខ្ញុំតវ៉ានេះមិនមែនសម្រាប់បុគ្គលម្នាក់ណាទេគឺទុកជាសម្បត្តិរួមប្រើប្រាស់រួមគ្នា បើបាត់បង់ដីនេះគ្មានកន្លែងចតឡាន ហើយក៏គ្មានកន្លែងរៀបចំកម្មវិធីផ្សេងៗដែរ»។
លោក វ៉ា សារ៉ង ចៅសង្កាត់ចោមចៅទី ២ បានថ្លែងពីថ្ងៃ ១៩ តុលា ថា លោកបាននិងកំពុងសម្របសម្រួលជាមួយភាគីទំនាស់ដើម្បីបញ្ចប់ការតវ៉ានេះ។ ភាគីអ្នកតវ៉ាបានទាមទារឱ្យក្រុមហ៊ុន 7NG របស់លោកឧកញ៉ា ស្រី ចាន់ថន រក្សាទីតាំងនេះដើម្បីប្រយោជន៍រួមក្នុងបុរី។ ចំណែកភាគីម្ខាងទៀតចង់បានដីនោះធ្វើអាជីវកម្មផ្ទាល់ខ្លួន ដោយពួកគាត់អះអាងថា បានទិញពីក្រុមហ៊ុនរួចហើយ។ ពួកគាត់បាននាំគ្នាព័ទ្ធរបង និងមិនអនុញ្ញាតឱ្យអ្នកផ្សេងចូលទីនោះទៀតទេ។
លោក សារ៉ង បញ្ជាក់ថា៖ «រឿងនេះខ្ញុំបានរាយការណ៍ទៅថ្នាក់លើហើយដើម្បីរកវិធានការជួយដោះស្រាយបញ្ចប់ ដើម្បីកុំឱ្យការតវ៉ាអូសបន្លាយថែមទៀតប៉ុន្ដែភាគីអ្នកទិញដីហ្នឹងគាត់មិនខ្វល់ពីការដោះស្រាយទេគឺគោលដៅគាត់ចង់បានតែដីនោះប៉ុណ្ណោះហើយគាត់ជំរុញឱ្យពលរដ្ឋប្ដឹងទៅតុលាការថែមទៀតផង បើមានអ្នកមិនសុខចិត្ត។ ទោះយ៉ាងណាក្នុងនាមយើងជាអាជ្ញាធរនឹងព្យាយាមសម្របសម្រួលដោះស្រាយបញ្ចប់»។
លោក ហែម ដារិទ្ធ អភិបាលខណ្ឌពោធិ៍សែនជ័យបានឱ្យដឹងកាលពីម្សិលមិញថា ផ្លូវដែលពលរដ្ឋបិទតវ៉ានោះបានបើកដំណើរការវិញហើយ ប៉ុន្តែលោកបានលើកទឹកចិត្តឱ្យក្រុមពលរដ្ឋដែលតវ៉ាទាំងនោះប្ដឹងទៅកាន់សាលាដំបូង ដើម្បីរកដំណោះស្រាយបន្តទៀត។
លោកបានបញ្ជាក់ថា៖ «រឿងនេះខុសត្រូវ រឿងអីមកបិទផ្លូវ...កាលណាបិទផ្លូវ គឺជារឿងខុសខ្ញុំមិនទាន់ដឹងរឿងបន្ដទៀតទេ ព្រោះជាប់ការងារជាមួយថ្នាក់ដឹកនាំយើងនៅទីតាំងទឹកជំនន់»។
លោកឧកញ៉ា ស្រី ចាន់ថន អគ្គនាយកក្រុមហ៊ុន 7NG បានថ្លែងពីថ្ងៃទី ១៩ តុលា ថា លោកមិនទាន់បានទទួលព័ត៌មាននេះទេ ដោយសារបុរីនៅទីតាំងខាងលើគឺក្រុមហ៊ុនបានប្រគល់ទៅឱ្យសហគមន៍ (អតិថិជនទិញបុរី) ជាអ្នកគ្រប់គ្រងផ្ទាល់ ព្រោះក្រុមហ៊ុនបានលក់ផ្ទះឱ្យពួកគាត់អស់ហើយ។ ដូច្នេះក្រុមហ៊ុនមិនមានកាតព្វកិច្ចពាក់ព័ន្ធនឹងទំនាស់នេះទេ។
លោកបញ្ជាក់ថា៖ «បុរីខាងហ្នឹងមិនជាប់ពាក់ព័ន្ធអ្វីខាងក្រុមហ៊ុនខ្ញុំទៀតទេ គឺខ្ញុំបានប្រគល់ជូនទៅខាងសហគមន៍គ្រប់គ្រងផ្ទាល់ ទីតាំងហ្នឹងពីមុនក្រោមការគ្រប់គ្រងរបស់ខ្ញុំមែន ប៉ុន្ដែខាងសហគមន៍គាត់គ្រប់គ្រងវិញហើយ។ ប៉ុន្ដែពលរដ្ឋមួយចំនួននៅតែហៅតៗថា 7NG, 7NG 7NG ជាប់មាត់រហូតមកតែការពិតមិនមែនរបស់ខ្ញុំទៀតទេ»។
លោក គឹម យ៉ាន់ ប្រធានសហគមន៍នៅក្នុងបុរីក្រុមហ៊ុន 7NG ដែលជាភាគីអ្នកទិញដីនេះមិនទាន់អាចស្វែងរកប្រភពទាក់ទងសុំការបញ្ជាក់បន្ថែមជុំវិញករណីនេះបាននៅឡើយទេកាលពីម្សិលមិញ៕