ភ្នំពេញៈ រដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញ បានប្រកាសបែងចែកពេលវេលាសម្រាប់ដឹកជញ្ជូនពលរដ្ឋពីភ្នំពេញទៅកាន់បណ្ដាខេត្តនានា និងពីខេត្តនានាមកភ្នំពេញវិញដោយឥតគិតថ្លៃក្នុងរដូវបុណ្យភ្ជុំបិណ្ឌនេះ ខណៈក្រសួងសាធារណការ និងដឹកជញ្ជូនបានប្រកាសអំពីកម្មវិធីជិះរថភ្លើងទៅកាន់ក្រុងព្រះសីហនុ,ខេត្តពោធិ៍សាត់ និងក្រុងប៉ោយប៉ែតខេត្តបន្ទាយមានជ័យ ដោយឥតគិតថ្លៃពីថ្ងៃទី ២៦-៣០ ខែកញ្ញា។
លោក ប៉ាល់ ចន្ទតារា រដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍ថាក្នុងឱកាសបុណ្យភ្ជុំនេះក្រសួងបានបង្កើតកម្មវិធីដឹកជញ្ជូនពលរដ្ឋទៅខេត្តមួយចំនួនដោយឥតគិតថ្លៃតាមមធ្យោបាយដឹកជញ្ជូនផ្លូវដែក និងរថយន្តក្រុង។
លោកថ្លែងថា៖ «យើងបានរៀបចំកម្មវិធីដឹកជញ្ជូនតាមរថភ្លើងពីភ្នំពេញទៅក្រុងព្រះសីហនុ, ភ្នំពេញទៅខេត្តពោធិ៍សាត់ និងពីខេត្តពោធិ៍សាត់ទៅក្រុងប៉ោយប៉ែតដោយឥតគិតថ្លៃចាប់ពីថ្ងៃទី ២៦-៣០ ខែកញ្ញា ដែលក្នុង ១ ថ្ងៃ មាន ២ វេន។ វេនទី ១ នៅម៉ោង ៧:៣០ នាទីព្រឹក និងវេនទី ២ ពីម៉ោង ៦:៣០ នាទី ឬ ៧ យប់»។
លោក អ៊ាន សុឃីម អភិបាលរដ្ឋាករស្វយ័តដឹកជញ្ជូនសាធារណរថយន្តក្រុងរាជធានីភ្នំពេញបានប្រាប់ភ្នំពេញប៉ុស្តិ៍ពីម្សិលមិញថា រដ្ឋាករស្វយ័តដឹកជញ្ជូនសាធារណរថយន្តក្រុងរាជធានីភ្នំពេញបានត្រៀមរថយន្ត ១២០ គ្រឿងសម្រាប់ដឹកអ្នកដំណើរពីរាជធានីភ្នំពេញទៅបណ្ដាខេត្តនានា និងពីខេត្តនានាមកភ្នំពេញវិញដោយឥតគិតថ្លៃចាប់ពីថ្ងៃទី ២៦-៣០ ខែកញ្ញា ឆ្នាំ ២០១៩ នេះ។
លោកបានបន្តថាការចេញដំណើរពីភ្នំពេញទៅតាមបណ្ដាខេត្តនានាមាន ៥ ដងក្នុង ១ ថ្ងៃ រួមមាននៅម៉ោង ៥:៣០ នាទីម្ដង,ម៉ោង ១១:៣០ នាទីម្ដង,ម៉ោង ១២:៣០ នាទី ថ្ងៃត្រង់ម្ដង, ម៉ោង ១៣:៣០ នាទីរសៀលម្ដង និងម៉ោង ១៤ រសៀលម្ដង។ ចំណែកទីតាំងចំណតសម្រាប់គោលដៅដឹកជញ្ជូនពីភ្នំពេញទៅបណ្ដាខេត្តនានាមាន ៥ ទីតាំង។
ទីតាំងទី ១ ស្ថិតនៅតាមបណ្ដោយផ្លូវ ៦០ ម៉ែត្រ ទល់មុខក្រុមហ៊ុនម៉ែរសឺដែសគឺសម្រាប់ពលរដ្ឋដែលត្រូវទៅខេត្តព្រៃវែង ខេត្តស្វាយរៀង និងតាកែវដោយឆ្លងកាត់ខេត្តកណ្ដាលតាមផ្លូវជាតិលេខ ១ និងផ្លូវជាតិលេខ ២ ។
ទីតាំងទី ២ ស្ថិតនៅស្ថានីយចំណតរថយន្តផ្លូវ ២០០៤ ជាប់បញ្ជាការដ្ឋានកងទ័ពអាកាសសម្រាប់ពលរដ្ឋដែលត្រូវទៅខេត្តកែប,កំពត,កំពង់ស្ពឺ និងខេត្តព្រះសីហនុដោយឆ្លងកាត់ខេត្តកណ្ដាលតាមផ្លូវជាតិលេខ ៣ និងផ្លូវជាតិលេខ ៤។
ទីតាំងទី ៣ ស្ថិតនៅសួនច្បារឃ្លាំងសាំងឫស្សីកែវសម្រាប់ពលរដ្ឋដែលត្រូវទៅខេត្តកំពង់ឆ្នាំង, ពោធិ៍សាត់, បាត់ដំបង និងខេត្តបន្ទាយមានជ័យដោយឆ្លងកាត់ខេត្តកណ្ដាលតាមផ្លូវជាតិលេខ ៥។
ទីតាំងទី ៤ ស្ថិតនៅក្បែររង្វង់មូលទេពមច្ឆាខាងកើតស្ពានដែកឫស្សីកែវក្នុងខណ្ឌជ្រោយចង្វារសម្រាប់ពលរដ្ឋដែលត្រូវទៅខេត្តកំពង់ធ និងខេត្តសៀមរាប ដោយឆ្លងកាត់ខេត្តកណ្ដាល និងខេត្តកំពង់ចាមតាមផ្លូវជាតិលេខ ៦ ខណៈទីតាំងទី ៥ ស្ថិតនៅមុខរាជាយស្ម័យយានកម្ពុជា (រ៉ារថភ្លើង) សម្រាប់ពលរដ្ឋដែលត្រូវទៅខេត្តកំពង់ចាម,ត្បូងឃ្មុំ,ក្រចេះ និងខេត្តស្ទឹងត្រែងដោយឆ្លងកាត់ខេត្តកណ្ដាលតាមផ្លូវជាតិលេខ ៦ ផ្លូវជាតិលេខ ៦-៧ និងផ្លូវជាតិលេខ ៦-៨ ។
លោកថ្លែងថា៖ «សូមបងប្អូនដែលត្រូវធ្វើដំណើរទៅជួបជុំក្រុមគ្រួសារនៅតាមបណ្ដាខេត្តក្នុងពេលបុណ្យភ្ជុំបិណ្ឌខាងមុខនេះ មេត្តារួសរាន់ទៅកាន់គោលដៅនៃចំណតនីមួយៗដែលបានកំណត់» ។
កាលពីម្សិលមិញអ្នកស្រី កែវ ថន អាយុ ៦៦ ឆ្នាំ ដែលរស់នៅភូមិមិត្តភាព សង្កាត់-ខណ្ឌឫស្សីកែវបានទៅពិនិត្យកម្មវិធីចេញដំណើរនៅទីតាំងឃ្លាំងសាំងឫស្សីកែវបាននិយាយថានៅថ្ងៃសុក្រខាងមុខនេះ គាត់ចង់ធ្វើដំណើរទៅខេត្តបាត់ដំបងឲ្យទាន់កម្មវិធីបុណ្យភ្ជុំនៅព្រឹកថ្ងៃសៅរ៍។
អ្នកស្រីថ្លែងថា៖ «ខ្ញុំ និងក្រុមគ្រួសារចង់ទៅភ្ជុំនៅបាត់ដំបងដើម្បីជួបជុំសាច់ញាតិ។ ខ្ញុំ និងក្រុមគ្រួសារបានឯកភាពគ្នាចេញពីភ្នំពេញនៅព្រឹកថ្ងៃសុក្រដោយជិះរថយន្តក្រុង ព្រោះយើងមិនមានលុយច្រើនសម្រាប់បង់ថ្លៃរថយន្តឈ្នួលនោះទេ»។
ចំណែកកម្មករសំណង់ម្នាក់នៅសង្កាត់គីឡូម៉ែត្រលេខ ៦ លោក តាន់ សុខសាន អាយុ ២៦ ឆ្នាំ បាននិយាយថា នៅថ្ងៃបុណ្យកាន់បិណ្ឌ គាត់បានរៀបចំម្ហូបអាហារ នំចំណី ព្រមទាំងថវិកាមួយចំនួនជូនម្ដាយរបស់គាត់ និងធ្វើចង្ហាន់ទៅវត្តបាន ៣ ដងរួចមកហើយ ដូច្នេះក្នុងឱកាសបានឈប់សម្រាកការងារនេះ គាត់ចង់នាំប្រពន្ធកូនរបស់គាត់ទៅលេងខេត្តសៀមរាប។
លោក សុខសាន បានថ្លែងថា៖ «ពួកយើងមិនសូវមានពេលទំនេរនោះទេ ដូច្នេះក្នុងឱកាសឈប់សម្រាកបុណ្យភ្ជុំនេះ ខ្ញុំចង់នាំប្រពន្ធកូនខ្ញុំទៅលេងខេត្ត-សៀមរាប ទស្សនាប្រាសាទអង្គរវត្តម្ដង ព្រោះប្រពន្ធកូនខ្ញុំមិនធ្លាប់បានទៅលេងប្រាសាទអង្គរវត្តនោះទេ»។
លោក សុខសាន បានបន្តថាពួកគាត់នឹងនាំគ្នាជិះរថយន្តក្រុងរបស់រដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញដោយចេញដំណើរនៅម៉ោង ៥:៣០ នាទីព្រឹកថ្ងៃព្រហស្បតិ៍នេះ៕