.jpg)
ទិដ្ឋភាពការបិទព្រុំប្រទល់ភ្នំពេញ-ខេត្តកណ្ដាល ។ ហ៊ាន រង្សី
ភ្នំពេញ៖ កម្ពុជាបានចាក់វ៉ាក់សាំងការពារជំងឺកូវីដដល់ប្រជាពលរដ្ឋបានចំនួន១ ២៤១ ៩៤ ៧ នាក់នៅទូទាំងប្រទេស បូកសរុបទាំងក្រសួងការពារជាតិ និងក្រសួងសុខាភិបាល ខណៈដំណើរការនៃការចាក់វ៉ាក់សាំងនៅតែដំណើរការដដែល បើទោះបីជាមានការបិទខ្ទប់ក៏ដោយ។
យោងតាមរបាយការណ៍នៃការចាក់វ៉ាក់សាំង គិតត្រឹមយប់ថ្ងៃទី ១៦ ខែមេសា ឆ្នាំ ២០២១ អ្នកដែលបានចាក់រួចសរុបសម្រាប់ក្រសួងការពារជាតិមានចំនួន ២៧៤ ៨៥៨ នាក់ និងក្រសួងសុខាភិបាលចំនួន ៩៦៨ ០៨៩ នាក់។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចបានមានប្រសាសន៍ថា ការងារចាក់វ៉ាក់សាំងនៅតែដំណើរការធម្មតា និងរិតតែសម្រុកធ្វើទៀតផង ដោយមិនមានពន្យារពេល ឬផ្អាកនោះឡើយ ហើយគណៈកម្មការចំពោះកិច្ចនឹងដឹកជញ្ជូនវ៉ាក់សាំងទៅតាមបណ្តាមន្ទីររាជធានី-ខេត្តទាំង ២៥ នៅថ្ងៃអាទិត្យស្អែកនេះ។
លោកស្រីបានថ្លែងដូចនេះនៅថ្ងៃសៅរ៍ទី ១៧ ខែមេសា ឆ្នាំ ២០២១ នេះថា បុគ្គលណាដែលចាក់ដូសទី ១ រួចហើយ ហើយបុគ្គលនោះត្រូវចាក់ដូសទី ២ ទៀតនោះ ខណៈដែលគាត់កំពុងស្ថិតនៅតាមខេត្ត ឬកន្លែងដែលត្រូវបិទខ្ទប់នោះ គឺបុគ្គលនោះត្រូវទទួលវ៉ាក់សាំងដូសទី ២ របស់គាត់នៅខេត្តដែលគាត់កំពុងស្នាក់នៅ។
លោកស្រី ឱ វណ្ណឌីន បានថ្លែងថា៖ «គណៈកម្មការចំពោះកិច្ចចាក់វ៉ាក់សាំងកូវីដ១៩ នឹងចាត់ចែងដឹកវ៉ាក់សាំងពីរាជធានីភ្នំពេញទៅផ្គត់ផ្គង់ជូនមន្ទីរសុខាភិបាលរាជធានី-ខេត្តទាំង ២៥ នៅក្នុងមួយខេត្តគឺជូនចំនួន ២០០ ដូសសម្រាប់បុគ្គលចាក់លើកទី ២ ដែលនៅជាប់បម្រាមបិទខ្ទប់នៅខេត្តណាមួយ»។
អ្នកនាំពាក្យរូបនេះបានលើកឡើងបន្ថែមដោយលោកស្រីបានស្នើសុំទៅប្រធានអនុគណៈកម្មការចំពោះកិច្ចចាក់វ៉ាក់សាំងនៅរាជធានី-ខេត្តទាំងអស់ត្រូវគ្រប់គ្រងអ្នកដែលត្រូវចាក់វ៉ាក់សាំងលើកទី ២ ដែលកំពុងជាប់នូវបម្រាមបិទខ្ទប់នេះ ទទួលខុសត្រូវផ្តល់វ៉ាក់សាំងដល់ពួកគាត់តាមពេលវេលាដែលត្រូវចាក់ដូសលើកទី ២ ដោយមិនឱ្យលើសថ្ងៃត្រូវចាក់នោះទេ៕
