.jpg)
គ្រូពេទ្យត្រួតពិនិត្យអ្នកកើតជំងឺឈីក ដែលសម្រាកព្យាបាលមន្ទីរពេទ្យក្នុងស្រុកមង្គលបុរី ខេត្តបន្ទាយមានជ័យ។ រូបថត សហការី
បន្ទាយមានជ័យៈ ប្រជាពលរដ្ឋប្រមាណ ៤៩ នាក់ ក្នុងនោះមានកុមារ ៣៥ នាក់ នៅភូមិអូរស្ងួត ឃុំអូរប្រាសាទ ស្រុកមង្គលបុរីមានអាការក្ដៅខ្លួន ឈឺសន្លាក់ដៃជើង ឈឺសាច់ដុំ ចេញកន្ទួលលើស្បែក ត្រូវបានសង្ស័យផ្ទុះករណីគ្រុនឈីក (Chikunnguya)។ ខណៈជំងឺនេះកំពុងរាលដាលទៅភូមិចំនួន ៤ បន្ថែមទៀតដែលនៅក្បែរៗនោះ។ យោងតាមការឲ្យដឹងពីមន្ទីរសុខាភិបាលខេត្តបន្ទាយមានជ័យ។
លោក ឡេ ច័ន្ទសង្វាត ប្រធានមន្ទីរសុខាភិបាល ខេត្តបន្ទាយមានជ័យបានប្រាប់ភ្នំពេញប៉ុស្តិ៍កាលពីថ្ងៃពុធថា កាលពីយប់ថ្ងៃទី ៧ កញ្ញា មានករណីផ្ទុះឡើងនូវជំងឺឈីកជាថ្មីទៀតនៅក្នុងខេត្តនេះ ក្រោយពីក្រុមការងារបានចុះត្រួតពិនិត្យបន្ទាន់។
លោក ច័ន្ទសង្វាត បានថ្លែងថា៖ «បន្ទាប់ពីរកឃើញយ៉ាងដូច្នេះ ក្រុមការងារ បានបញ្ជូនអ្នកជំងឺមួយចំនួនមកមន្ទីរពេទ្យខេត្តមង្គលបុរី ព្រោះតែពួកគេមានរោគសញ្ញាក្តៅខ្លួន ៣៩ ដល់ ៤០ អង្សាសេ ឈឺសន្លាក់ដៃជើង ឈឺសាច់ដុំ ចេញកន្ទួលលើស្បែក វិលមុខ ក្អួតចង្អោរ»។
លោក ច័ន្ទសង្វាត បានឲ្យដឹងទៀតថា ក្រោយបញ្ចប់ការងារ និងបន្តការតាមដាននៃការផ្ទុះករណីគ្រុនឈីក ដែលបានកើតឡើងនៅភូមិអូរស្ងួត ក្រុមការងារក៏កំពុងសង្ស័យថា មានការរីករាលដាលនៃជំងឺនេះទៅភូមិដែលនៅក្បែរៗនោះចំនួន ៤ ភូមិទៀតដែរ ហើយការអន្តរាគមន៍បន្ទាន់កំពុងបន្តស្រាវជ្រាវ ករណីសង្ស័យបន្ថែមទៀត ដើម្បីបញ្ជូនរកសេវា ព្យាបាល និងថែទាំ និងបូមឈាមរកករណីសង្ស័យផ្សេងទៀត ដើម្បីស្រាវជ្រាវ មេរោគគ្រុនឈីក។
លោកថ្លែងថា៖ «មកដល់ពេលនេះមានករណីថ្មីកើតមានទៀត តែមិនច្រើនទេ។ ក្រុមការងារយើង កំពុងចុះអប់រំផ្សព្វផ្សាយនូវសារសុខភាព ការបង្ការ និងការលុបបំបាត់ជម្រកមូស ដោយសហការជាមួយអាជ្ញាធរមូលដ្ឋាន និងផ្នែកពាក់ព័ន្ធ ពិសេសការចុះដាក់អាបែតបន្ថែម និងការបាញ់ថ្នាំមូសតំបន់គោលដៅ»។
លោក ចន្ទ វិឌ្ឍីណាវុឌ្ឍ ប្រធានមន្ទីរពេទ្យមិត្តភាពកម្ពុជា ជប៉ុនមង្គលបុរីបានឲ្យដឹងថា ចំពោះអ្នកជំងឺទាំងអស់ដែលមានការសង្ស័យកើតមានជំងឺឈីកនៅក្នុងភូមិនោះគឺមានចំនួន ៣៧ នាក់បានសម្រាកព្យាបាលនៅក្នុងមន្ទីរពេទ្យ។ ប៉ុន្តែដោយសារអ្នកជំងឺមួយចំនួនមានអាការល្អប្រសើរ ក្រុមគ្រូពេទ្យក៏បានអនុញ្ញាតឲ្យចេញពីមន្ទីរពេទ្យ ខណៈដែលអ្នកជំងឺដែលនៅបន្តសម្រាកនៅមន្ទីរពេទ្យ ដោយសារពួកគេមានជំងឺឈីក ស្របជាមួយជំងឺគ្រុនឈាម។
លោកបានថ្លែងថា៖ «ពួកគាត់មិនមានអ្វីធ្ងន់ធ្ងរទេ ព្រោះអ្នកដែលនៅបន្តសម្រាកនោះ បើទោះជាមិនទាន់បានលទ្ធផលឈាមថាកើតជំងឺគ្រុនឈីក តែយើងសង្ស័យថា កើតឈីក និងមានអ្នកខ្លះពិនិត្យឃើញថាមានគ្រុនឈាម»៕
