រតនគិរីៈ សត្វជ្រូកព្រៃយ៉ាងតិច ៦ ក្បាល ត្រូវបានប្រជាសហគមន៍ការពារធម្មជាតិអូរគគី ប្រទះឃើញងាប់ដោយជាប់អន្ទាក់និងអន្ទាក់ចំនួន ៤៥ ត្រូវបានដោះចេញ នៅក្បែរតំបន់ដែនជម្រកសត្វព្រៃលំផាត់ ក្នុងអំឡុងពេលចុះល្បាតការពារសត្វព្រៃក្នុងសហគមន៍ កាលពីដើមខែមេសា ឆ្នាំ ២០២១។
លោក ប៊ូ វរសក្ស នាយកម្មវិធីប្រចាំកម្ពុជានៃអង្គការជីវិតសត្វស្លាបអន្តរជាតិ បានថ្លែងនៅថ្ងៃ ៧ ខែមេសាថា ជ្រូកព្រៃទាំង ៦ ក្បាលនោះ បានងាប់រហូតស្អុយរលួយ សល់តែឆ្អឹងជាប់ខ្សែអន្ទាក់នៅនឹងជើង។
លោកបញ្ជាក់ថា៖ «ទិដ្ឋភាពនេះបង្ហាញថា អន្ទាក់គឺជាឃាតករដ៏ស្ងៀមស្ងាត់ ដែលត្រូវបានគេប្រើសម្រាប់សម្លាប់សត្វព្រៃគ្រប់ប្រភេទ រួមទាំងក្រុមល្បាតការពារព្រៃឈើ និងសត្វព្រៃផងដែរ»។
បើតាមលោក វរសក្ស ក្រៅពីប្រទះឃើញសំណាកសពសត្វជ្រូកព្រៃជាប់អន្ទាក់ ក្រុមល្បាតក៏បាននាំគ្នាដោះអន្ទាក់សត្វព្រៃបានចំនួន ៤៥ អន្ទាក់ផងដែរ។ ប៉ុន្តែក្រុមល្បាតមិនបានជួបប្រទះមុខសញ្ញាក្រុមជនសង្ស័យ ដែលបានចូលលួចដាក់អន្ទាក់ចាប់សត្វព្រៃណាម្នាក់ឡើយ។
ទន្ទឹមជាមួយគ្នានេះ លោកបានអំពាវនាវ ដល់គ្រប់ភាគីពាក់ព័ន្ធទាំងអស់ ចូលរួមទប់ស្កាត់និងបង្ក្រាបបទល្មើសបរបាញ់ និងដាក់អន្ទាក់ចាប់សត្វព្រៃ ដោយគ្រប់គ្នាត្រូវបញ្ឈប់ការបរិភោគសាច់សត្វព្រៃ គ្រប់ប្រភេទ។
លោក សំ អុល អនុប្រធានគណៈកម្មការសហគមន៍ការពារធម្មជាតិអូរគគី បានប្រាប់ ភ្នំពេញ ប៉ុស្តិ៍ថា បច្ចុប្បន្ន ក្រុមព្រានព្រៃ បានផ្លាស់ប្ដូរយុទ្ធសាស្ត្រពីការដើរបរបាញ់ មកដាក់អន្ទាក់ចាប់សត្វព្រៃវិញម្ដង ដែលធ្វើឲ្យចំនួនសត្វព្រៃមានការធ្លាក់ចុះជាបន្តបន្ទាប់ ។
លោកសំ អុល ថ្លែងថា៖ «ក្នុងមួយខែ សហគមន៍យើងខ្ញុំ បាននាំគ្នាចុះល្បាតចំនួន ៣ លើក ហើយក្នុង ១ លើក ក្រុមការងារយើងបានរកឃើញនិងដោះអន្ទាក់សត្វព្រៃ យ៉ាងហោចណាស់ក៏ជាង ២០ អន្ទាក់ដែរ»។
លោកបន្តថា កាលពីខែកុម្ភៈថ្មីៗនេះ ក្នុងអំឡុងពេលចុះល្បាតព្រៃ ក្រុមការងាររបស់លោក ដែលមានការចូលរួមពីមន្ត្រីឧទ្យានុរក្ស មន្ត្រីនគរបាលប៉ុស្តិ៍រដ្ឋបាល និងប្រជាការពារភូមិបានប្រទះឃើញ និងជួយសង្គ្រោះសត្វត្រយ៉ងយក្សមួយក្បាល ដែលជាប់អន្ទាក់របស់ព្រាន។
លោក ផុន ខេមរិន្ទ ប្រធានមន្ទីរបរិស្ថានខេត្តរតនៈគិរីបានប្រាប់ ភ្នំពេញ ប៉ុស្តិ៍ថា ក្រៅពីការងារចុះល្បាត ស្រាវជ្រាវ និងបង្ក្រាបបទល្មើសធនធានធម្មជាតិ ក្នុងតំបន់ដែនជម្រកសត្វព្រៃ តំបន់ប្រើប្រាស់ច្រើនយ៉ាង និងរបៀងជីវចម្រុះ ក្រុមមន្ត្រីឧទ្យានុរក្ស នៃមន្ទីរបរិស្ថានខេត្តរតនៈគិរី ជារឿយៗបានចុះធ្វើការផ្សព្វផ្សាយអប់រំប្រជាពលរដ្ឋនៅតាមមូលដ្ឋាន អំពីផលប្រយោជន៍នៃការចូលរួមការពារបរិស្ថាន និងធនធានធម្មជាតិ។
លោកថ្លែងថា៖ «ការងារបង្ក្រាបនិងអប់រំណែនាំឲ្យពលរដ្ឋឱ្យយល់ដឹងពីគុណតម្លៃនៃការចូលរួមការពារបរិស្ថាន និងធនធានធម្មជាតិត្រូវដើរទន្ទឹមគ្នា។ ធ្វើយ៉ាងណាឱ្យគ្រប់គ្នាយល់ដឹង ហើយនាំគ្នាបញ្ឈប់ការបរិភោគសាច់សត្វព្រៃ បញ្ឈប់ការបរបាញ់ ដាក់អន្ទាក់ និងបញ្ឈប់ការកាប់ទន្ទ្រានកាន់កាប់ដីធ្លីក្នុងតំបន់ដែនជម្រកសត្វព្រៃខុសច្បាប់»៕