ស្ទឹងត្រែងៈ កូនផ្សោតថ្មី ១ ទៀត ត្រូវបានគេប្រទះឃើញនៅតំបន់អន្លង់សត្វផ្សោតត្បូងខ្លា ក្នុងភូមិកោះជ្រឹម ឃុំអូរម្រះ ស្រុកសៀមបូក ខេត្តស្ទឹងត្រែង។ នេះបើតាមការផ្សព្វផ្សាយរបស់អង្គការមូលនិធិសកលសម្រាប់អភិរក្សធនធានធម្មជាតិកម្ពុជា (WWF-Cambodia) ពីថ្ងៃចន្ទ។
កូនផ្សោតនោះត្រូវបានក្រុមឆ្មាំទន្លេប្រចាំប៉ុស្តិ៍កោះជ្រឹមប្រទះឃើញកាលពីល្ងាចថ្ងៃទី ១៧ ខែវិច្ឆិកាឆ្នាំនេះ គ្រាដែលវាកំពុងហែលលេងជាមួយមេ និងផ្សោតជំទង់ ៤ ក្បាលផ្សេងទៀត។ ក្រោយពីទទួលបានដំណឹងនេះនៅព្រឹកថ្ងៃទី ២០ ខែវិច្ឆិកា ក្រុមការងារនៃ WWF-Cambodia និងរដ្ឋបាលជលផលខេត្តក្រចេះ និងស្ទឹងត្រែងបានចុះទៅពិនិត្យអង្កេតកូនផ្សោតនោះ និងបានថតរូបទាំងកូន និងមេវា ទុកជាភ័ស្តុតាងផងដែរ ។
បើតាមកំណត់ត្រារបស់ក្រុមការងារស្រាវជ្រាវនៃអង្គការ WWF-Cambodia កូនផ្សោតដែលបានប្រទះឃើញថ្មីនេះគឺជាកូនផ្សោតទី ១២ ហើយដែលបានកើតក្នុងឆ្នាំនេះចាប់ពីខែមករារហូតដល់ខែវិច្ឆិកានេះក្នុងនោះកូនផ្សោត ៦ ក្បាលត្រូវបានកត់ត្រាថាបានកើតនៅខេត្តស្ទឹងត្រែង និងកូនផ្សោត ៦ ក្បាលទៀតកើតនៅខេត្តក្រចេះ ។
លោក ស៊ុំ នីរ៉ូ នាយខណ្ឌរដ្ឋបាលជលផលខេត្តស្ទឹងត្រែងបានប្រាប់ភ្នំពេញប៉ុស្តិ៍ពីម្សិលមិញថា៖ «វត្តមានរបស់កូនផ្សោតថ្មីនេះនឹងក្លាយជាការរួមចំណែកសំខាន់មួយទៀតក្នុងវិស័យទេសចរណ៍តាមដងទន្លេមេគង្គ»។
សត្វផ្សោតក្នុងទន្លេមេគង្គកម្ពុជាបច្ចុប្បន្នត្រូវបានគេប៉ាន់ប្រមាណថា មានជាង ១១០ ក្បាល ដែលកើនឡើងប្រមាណ ៣០ ក្បាល បើធៀបនឹងឆ្នាំ ២០១៥ ដែលបានរកឃើញនៅសេសសល់ប្រមាណ ៨០ ក្បាល ។
លោក អេង ជាសាន ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផលបានថ្លែងថា កំណើនផ្សោតថ្មីនេះគឺជាលទ្ធផលនៃការខំប្រឹងប្រែងរួមគ្នារវាងក្រុមឆ្មាំទន្លេ អង្គការ WWF-Cambodia និងភាគីពាក់ព័ន្ធ រួមទាំងសហគមន៍នេសាទផងដែរក្នុងការការពារ និងអភិរក្សសត្វផ្សោត។
លោកបានបញ្ជាក់ថា៖ «សត្វផ្សោតទន្លេមេគង្គក្នុងខេត្តក្រចេះ និងខេត្តស្ទឹងត្រែងនាពេលបច្ចុប្បន្នបានរួមចំណែកយ៉ាងសំខាន់ក្នុងការកាត់បន្ថយភាពក្រីក្រនៅកម្ពុជា»។
ជាមួយគ្នានេះលោកបានអំពាវនាវដល់ពលរដ្ឋក៏ដូចសហគមន៍នេសាទឲ្យចូលរួមការពារសត្វផ្សោតទាំងអស់គ្នាដើម្បីបង្កើនសត្វផ្សោតឲ្យបានកាន់តែច្រើនក្នុងទន្លេមេគង្គរបស់កម្ពុជា៕