ពោធិ៍សាត់ៈ ក្រុមមន្ត្រីឧទ្យានុរក្សស្នាក់ការអូរសោមនៃឧទ្យានជាតិជួរភ្នំក្រវាញខាងត្បូង និងមន្ត្រីអង្គការសម្ព័ន្ធមិត្តសត្វព្រៃបានប្រទះឃើញគំនរសាច់សត្វខ្ទីង ១ ក្បាល ក្នុងតំបន់ឧទ្យានជាតិជួរភ្នំក្រវាញខាងត្បូងស្ថិតក្នុងស្រុកវាលវែងដែលមានស្លាកស្នាមជាប់អន្ទាក់របស់ព្រានព្រៃ។
លោក វ៉ាយ សារីម ប្រធានកងល្បាតនៃស្នាក់ការបរិស្ថានអូរសោមប្រាប់ភ្នំពេញប៉ុស្តិ៍នៅថ្ងៃពុធថា ក្នុងអំឡុងពេលចុះល្បាតព្រៃ ២ ថ្ងៃគឺនៅថ្ងៃទី ២២-២៣ ខែមិថុនា ក្រុមការងាររបស់លោកដែលមានការចូលរួមពីក្រុមបរិស្ថាននៃអង្គការសម្ព័ន្ធមិត្តសត្វព្រៃ (Wildlife Alliance) បានប្រទះឃើញគំនរសាច់សត្វខ្ទីងដ៏កម្រ ១ ក្បាល នៅចំណុចឫស្សីជ្រំស្ថិតក្នុងភូមិឆាយលូក ឃុំអូរសោម ស្រុកវាលវែង។ «យើងបានប្រទះឃើញសត្វខ្ទីងនេះនៅរសៀលថ្ងៃទី ២៣ ខែមិថុនា។ វាត្រូវបានជនប្រព្រឹត្តបទល្មើសពន្លះយកសាច់អស់មួយភាគធំ និងកាត់យកស្នែងទាំងគូ។ សំណាកសាច់ ស្បែក គ្រោងឆ្អឹង ក្បាល ស្មងជើង និងគ្រឿងក្នុងដែលជនសង្ស័យបានបន្សល់ទុកនៅកន្លែងកើតហេតុមានទម្ងន់សរុប ២៨០ គីឡូក្រាម»។
លោក សារីម បន្ថែមថា៖ «នៅជាប់ស្មងជើងនៃសំណាកសត្វខ្ទីងនោះ យើងបានរកឃើញខ្សែអន្ទាក់ ដែលធ្វើពីខ្សែហ្វ្រាំងកង់ដែលបញ្ជាក់ថា សត្វខ្ទីងដ៏កម្រ ១ ក្បាលនេះបានជាប់អន្ទាក់ក្រុមប្រមាញ់សត្វព្រៃ»។
ក្រុមល្បាតបានប្រមូលសាច់សត្វខ្ទីងនេះដុតកម្ទេចចោលនៅនឹងកន្លែង ហើយកំពុងស្រាវជ្រាវស្វែងរកជនល្មើសមកផ្តន្ទាទោសទៅតាមច្បាប់។
នេះគឺជាសត្វខ្ទីងទី ២ ហើយដែលត្រូវបានគេសម្លាប់នៅក្នុងរយៈពេល ២ ខែចុងក្រោយនេះ។ កាលពីខែឧសភាក្រុមឧទ្យានុរក្សដែនជម្រកសត្វព្រៃព្រះរកា បានប្រទះឃើញសត្វខ្ទីងពេញវ័យ ១ ក្បាល អាយុប្រហែល ៥ ឆ្នាំត្រូវបានព្រានបាញ់សម្លាប់ ដោយបន្សល់ទុកតែក្បាលនៅក្នុងដែនជម្រកសត្វព្រៃព្រះរកាក្នុងខេត្តព្រះវិហារ។ សត្វខ្ទីងជាប្រភេទសត្វកម្រដែលត្រូវបានចុះក្នុងបញ្ជីក្រហម IUCN ថាជាប្រភេទសត្វព្រៃងាយរងគ្រោះថ្នាក់ជាសកលនៅឆ្នាំ ១៩៨៦។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានសម្តែងការសោកស្តាយយ៉ាងខ្លាំង ចំពោះការបាត់បង់សត្វខ្ទីង ១ ក្បាលនេះ និងបានថ្កោលទោសចំពោះក្រុមជនល្មើសដែលតែងលួចប្រព្រឹត្តបទល្មើសដាក់អន្ទាក់សត្វព្រៃ និងបរបាញ់សត្វព្រៃដ៏កម្របែបនេះ។
លោកបានថ្លែងឲ្យដឹងថា៖ «អន្ទាក់ និងកាំភ្លើងកែច្នៃ គឺជាឃាតករលាក់មុខសម្លាប់សត្វព្រៃនៅកម្ពុជាជារៀងរាល់ថ្ងៃដែលចាំបាច់ត្រូវពង្រឹងការទប់ស្កាត់ និងបង្ក្រាបឲ្យបានជាប្រចាំ និងហាមឃាត់ការយកនូវឧបករណ៍ទាំងនេះចូលក្នុងតំបន់ការពារធម្មជាតិ»៕