.jpg)
សត្វដំរីព្រៃដែលឃើញដេកងាប់ក្នុងចម្ការស្វាយចន្ទីរបស់ប្រជាពលរដ្ឋកាលពីម្សិលមិញ។ សហការី
មណ្ឌលគិរីៈ សត្វដំរីព្រៃវ័យចំណាស់មួយក្បាលត្រូវបានគេប្រទះឃើញត្រូវគេបាញ់ងាប់ នៅចំណុចចម្ការស្វាយចន្ទីរបស់ប្រជាពលរដ្ឋនៅជាប់ព្រៃខ្មោច ក្នុងដែនជម្រកសត្វព្រៃកែវសីមា ស្ថិតក្នុងភូមិស្រែល្វី ឃុំស្រែខ្ទុម ស្រុកកែវសីមា។
សត្វដំរីឈ្មោលដែលត្រូវគេបាញ់ងាប់នេះត្រូវបានប្រទះឃើញកាលពីម្សិលមិញ ដែលបើតាមមន្ត្រី វាត្រូវបានគេបាញ់ងាប់ប្រមាណ ១០ ថ្ងៃមកហើយ នៅចំណុចភូមិស្រែល្វី។ ដំរីព្រៃនេះមានកម្ពស់ ២,៧០ ម៉ែត្រ ប្រវែង ៤,៥០ ម៉ែត្រទទឹង ១,៥០ ម៉ែត្រ។
អ្នកនាំពាក្យក្រសួងបរិស្ថាន លោក នេត្រ ភក្ត្រា បានឲ្យដឹងកាលពីយប់មិញថា ករណីសត្វដំរីព្រៃដែលគេប្រទះឃើញងាប់នោះ គឺជាដំរីឈ្មោល ដែលវាត្រូវបានគេបាញ់សម្លាប់ដោយគ្រាប់កាំភ្លើង ក្នុងគោលបំណងកាត់យកភ្លុក។
បច្ចុប្បន្ន សមត្ថកិច្ចបាននាំខ្មោចដំរីនោះទៅកប់ដើម្បីធ្វើកំណាយយកគ្រោងឆ្អឹងរបស់វា មករក្សាទុក សម្រាប់ធ្វើការសិក្សាស្រាវជ្រាវវិទ្យាសាស្ត្រ អំពីប្រភេទដំរីនៅកម្ពុជានាពេលអនាគត។
លោកបញ្ជាក់ថា៖ «យោងតាមការពិនិត្យកោសល្យវិច័យចុងក្រោយទៅលើសាកសពសត្វដំរីនោះ ដោយបានលើកផ្អៀងមកពិនិត្យផ្នែកម្ខាងទៀតរបស់វា យើងបានរកឃើញមានស្នាមធ្លុះមួយកន្លែងនៅប្រមាណមួយចំអាមពីភ្នែក ដែលយើងសន្និដ្ឋានថាជាស្នាមធ្លុះដោយគ្រាប់កាំភ្លើង ដែលជនទុច្ចរិតបានបាញ់ ក្នុងគោលបំណងដើម្បីកាត់យកភ្លុក។ ភ្លុកទាំង ២ និងផ្នែកចុងកន្ទុយរបស់វាត្រូវបានគេកាត់យក»។
លោកបានបន្ថែមថា៖ «ការសន្និដ្ឋានជំហានដំបូង ដែលថាដំរីនោះងាប់ដោយសារថ្នាំពុលនោះ គឺមិនត្រឹមត្រូវទេ ព្រោះការពិនិត្យជំហានដំបូងបានតែផ្នែកម្ខាងប៉ុណ្ណោះ»។
លោកបន្តថា នៅពេលនេះ ក្រុមមន្ត្រីជំនាញកំពុងបន្តធ្វើការពិនិត្យកោសល្យវិច័យបន្ថែមទៀត ដើម្បីឈានទៅដល់ការកំណត់អត្តសញ្ញាណរបស់ជនល្មើស និងស្វែងរកចាប់ខ្លួនមកផ្ដន្ទាទោសតាមច្បាប់។
លោក ឌិន ប៊ុនធឿន អនុប្រធានមន្ទីរបរិស្ថានខេត្តមណ្ឌលគិរី ប្រាប់ភ្នំពេញប៉ុស្តិ៍កាលពីម្សិលមិញថា ដំរីដែលត្រូវបានគេបាញ់ងាប់នោះ វាចំណាស់ដែរហើយពីព្រោះបាតជើងវា ឡើងសឹក។ បើតាមលោកប៊ុនធឿន ក្រៅពីការរងគ្រោះដោយការបាញ់សម្លាប់សត្វព្រៃជាច្រើនប្រភេទក៏រងគ្រោះដោយការប្រើថ្នាំគីមីដាក់ដំណាំរបស់ប្រជាពលរដ្ឋផងដែរ។
លោកបានអំពាវនាវសូមឲ្យ «ប្រជាជនទាំងអស់ អ្នកពាក់ព័ន្ធយកចិត្តទុកដាក់នឹងសត្វព្រៃ ជាពិសេស អ្នកដែលធ្វើចម្ការហ្នឹង គាត់ប្រើថ្នាំគីមីច្រើន។ ណាមួយចម្ការគាត់នៅជាប់នឹងព្រៃ ពេលណារដូវប្រមូលផល សត្វព្រៃអាចចូលមកស៊ីផ្លែឈើទាំងនោះ ធ្វើឲ្យពុល។ អ៊ឹចឹងសុំឲ្យបងប្អូនប្រជាពលរដ្ឋ កុំប្រើប្រាស់ថ្នាំគីមីច្រើនហួសហេតុពេក ពេលខ្លះហូរតាមទឹកអីទៅ ដែលមិនត្រឹមតែប៉ះពាល់ដល់សត្វព្រៃទេ ពួកគាត់ម្ចាស់ចម្ការក៏ប៉ះពាល់ដែរ»។
បើតាមក្រុមជំនាញអភិរក្សសត្វព្រៃ របស់អង្គការ WCS បានធ្វើការពិសោធទៅលើដានជើងដំរី និងស្បែកដំរីដែលចាប់បានដោយប្រព័ន្ធកាមេរ៉ាស្វ័យប្រវត្តិកាលពីឆ្នាំ ២០១០ បានប៉ាន់ប្រមាណថា អាចមានដំរីព្រៃរស់នៅប្រមាណពី ១២០ ទៅ ១៧០ ក្បាល នៅក្នុងដែនអភិរក្សសត្វព្រៃ ខេត្តមណ្ឌលគិរី ខណៈដែលនៅក្នុងរយៈពេល ៣ ឆ្នាំចុងក្រោយនេះ លោក ឌិន ប៊ុនធឿន បានកត់សម្គាល់ឃើញថា មានសត្វដំរីព្រៃចំនួន ៣ ក្បាលបានងាប់នៅក្នុងព្រៃនៃខេត្តនេះ គឺដោយសារតែការបាញ់សម្លាប់ និងដល់វ័យចាស់ជរា៕
