ក្រចេះ: សត្វផ្សោតញីវ័យចំណាស់ ១ ក្បាល ត្រូវបានប្រជានេសាទក្នុងសហគមន៍ភូមិសំបុក ស្រុកចិត្របុរី ខេត្តក្រចេះប្រទះឃើញងាប់អណ្ដែតទឹក កាលពីព្រឹកថ្ងៃទី ២២ ខែ ធ្នូ ឆ្នាំ ២០២០ នៅចំណុចព្រែកខ្សោរ ដែលមានចម្ងាយប្រមាណ ៥០០ ម៉ែត្រ ពីអន្លង់ផ្សោតកាំពី។
លោក ម៉ុក ពន្លក នាយខណ្ឌរដ្ឋបាលជលផលខេត្តក្រចេះប្រាប់ ភ្នំពេញ ប៉ុស្តិ៍ ពីម្សិលមិញថា ផ្សោតញី ១ ក្បាលនោះ មានទម្ងន់ ២០១ គីឡូក្រាម និងមានប្រវែង ២,៣ ម៉ែត្រ។ វាជាផ្សោតដែលមានលេខសម្គាល់ (ID-95) រស់នៅក្នុងតំបន់អន្លង់ផ្សោតកាំពី។ លោកបញ្ជាក់ថា៖ «តាមការពិនិត្យភាពជាក់ស្តែង ផ្សោតនេះស្លាប់ដោយសារភាពចាស់ជរារបស់វា ព្រោះធ្មេញរបស់វាបានសឹករេចអស់ទាំងលើទាំងក្រោម ហើយនៅលើដងខ្លួន និងកន្ទុយរបស់វា ក៏ពុំមានស្នាមជាំ ឬដាច់រលាត់នោះឡើយ»។
បើតាមលោក ពន្លក ក្រោយពិនិត្យ និងវាស់វែងរួចក្រុមការងារបានសម្រេចវះកាត់ ដើម្បីយកសំណាករបស់វារក្សាទុកនៅក្នុងស្នាក់ការ អង្គការ WWF-Cambodia សាខាខេត្តក្រចេះ។
ប្រជានេសាទក្នុងសហគមន៍សំបុកលោក សៅ ស៊ីនឿន បានប្រទះឃើញសពសត្វផ្សោតនេះអណ្តែតទឹកភ្លឹមៗនៅកណ្តាលទន្លេនៅចំណុចព្រែកខ្សោរ ដែលមានចម្ងាយប្រមាណ ៥០០ ម៉ែត្រ ពីអន្លង់ផ្សោតកាំពីកាលពីថ្ងៃទី ២២ ខែធ្នូ។
លោកថា៖ «ខ្ញុំពិតជាសោកស្ដាយជាខ្លាំង នៅពេលប្រទះឃើញសពសត្វផ្សោតញី ១ ក្បាលនោះ។ វាទំនងជាទើបនឹងងាប់កាលពីយប់ថ្ងៃទី ២១ ខែ ធ្នូ ឆ្នាំ ២០២០ ព្រោះសពរបស់វានៅស្រស់ល្អដូចជាផ្សោតធម្មតា និងគ្មានស្លាកស្នាមអ្វីទាំងអស់»។ ភ្លាមៗនោះលោក ស៊ីនឿន បានរាយការណ៍ប្រាប់ឆ្មាំទន្លេនៅក្នុងតំបន់នោះ។
លោក ទេព អស្នារិទ្ធ ប្រធានកិច្ចការសាធារណៈ និងជាអ្នកនាំពាក្យ WWF-Cambodia ប្រាប់ភ្នំពេញប៉ុស្តិ៍ថា ក្រោយពីពិនិត្យសាកសពផ្សោតញី ១ ក្បាលនេះរួច មន្ត្រីជំនាញពាក់ព័ន្ធបានសន្និដ្ឋានរួមគ្នាថា ផ្សោតនេះមានអាយុចន្លោះពី ២៧ ឆ្នាំ ទៅ ៣០ ឆ្នាំ ហើយការងាប់របស់វាគឺដោយសារតែ «វ័យចាស់ជរា»។
សត្វផ្សោតទន្លេមេគង្គ គឺជាប្រភេទសត្វកម្រមួយនៅលើពិភពលោក ដែលមានអង្គការជាច្រើនបាននិងកំពុងចូលរួមអភិរក្សក្នុងនោះអង្គការ WWF បានសហការជាមួយរាជរដ្ឋាភិបាលកម្ពុជាយ៉ាងជិតស្និទ្ធក្នុងការចូលរួមអភិរក្សសត្វផ្សោតនេះ។
ការសិក្សាស្រាវជ្រាវក្នុងឆ្នាំ ២០២០ នេះ ក្រុមមន្ត្រីជំនាញបានរកឃើញផ្សោតមេពូជចំនួន ៨៩ ក្បាល កំពុងរស់នៅក្នុងដងទន្លេមេគង្គនៃប្រទេសកម្ពុជាចាប់ពីខេត្តក្រចេះដល់ខេត្តស្ទឹងត្រែង ជាប់ព្រំប្រទល់ដែនប្រទេសឡាវ។ នេះបើតាមលោក អ៊ុក វិបុល ប្រធាននាយកដ្ឋានអភិរក្សធនធានជលផលនៃអគ្គនាយកដ្ឋានរដ្ឋបាលជលផលកាលពីម្សិលមិញ។ លោកថ្លែងថា៖ «បើរាប់បញ្ចូលទាំងចំនួនកូនផ្សោតដែលទើបកើតថ្មី គឺមានចំនួនចន្លោះពី ១២០-១៣០ ក្បាលក្នុងឆ្នាំ ២០២០ នេះ»។
ចំនួនផ្សោតមេពូជនៅក្នុងឆ្នាំនេះបានធ្លាក់ចុះចំនួន ៣ ក្បាល បើធៀបទៅនឹងឆ្នាំ ២០១៧ ដែលបានរកឃើញដល់ ៩២ ក្បាល។ ប៉ុន្តែការធ្លាក់ចុះនេះ ត្រូវបានក្រុមមន្ត្រីជំនាញផ្នែកអភិរក្សសត្វផ្សោតទាំងថ្នាក់ជាតិ និងអន្តរជាតិ សន្និដ្ឋានថា ដោយសារមានការចល័តចេញពីតំបន់ដែលពួកវាធ្លាប់រស់នៅ ទៅកាន់កន្លែងផ្សេងៗទៀត ព្រោះគ្មានសញ្ញាណាមួយដែលបង្ហាញថា ពួកវាត្រូវបានងាប់ ដោយសារឧប្បត្តិហេតុអ្វីឡើយ៕
វីដេអូ៖