.jpg)
បំណែកពុទ្ធបដិមាដែលមន្ត្រីទើបប្រទះឃើញ ។ រូបថត អាជ្ញាធរជាតិអប្សរា
សៀមរាប: ក្រុមអ្នកជំនាញបុរាណវិទ្យានៃអាជ្ញាធរជាតិអប្សរាបានប្រទះឃើញរូបពុទ្ធបដិមាចំនួន ២១ អង្គ ដែលបែកបាក់កប់ក្នុងដីនៅបរិវេណប្រាសាទអង្គរវត្ត បន្ទាប់ពីធ្វើកំណាយខណៈអាជ្ញាធរនេះទទួលបានបដិមាចំនួន ៦ ដុំ និងក្រឡចំនួន ៤ ពីមន្ត្រីកងរាជអាវុធហត្ថស្រុកជីក្រែង ខេត្តសៀមរាប ដើម្បីរក្សាទុកផងដែរ។
លោក ស្រ៊ុន តិច ប្រធានគម្រោងកំណាយ និងស្រាវជ្រាវនៃអាជ្ញាធរជាតិអប្សរាបានថ្លែងពីម្សិលមិញថា ចម្លាក់រូបពុទ្ធបដិមាទាំង ២១ អង្គនោះមាន ១៤១ បំណែកដែលកប់ក្នុងដីជម្រៅជិតកន្លះម៉ែត្រ នៅបរិវេណប្រាសាទអង្គរវត្ត។
លោកថា៖ «ការរកឃើញដោយចៃដន្យនេះចាប់តាំងពីថ្ងៃទី ១១ ខែមេសា បន្តបន្ទាប់មក។ ភាគច្រើនជារូបពុទ្ធបដិមាដែលមួយចំនួនបាក់បែកព្រះសិរ ដៃ ជើង និងបំណែកមួយចំនួនទៀត។ បដិមាទាំងអស់នេះជាបដិមាព្រះពុទ្ធទ្រង់អង្គុយផង និងឈរផង»។
លោកបានបន្ថែមថា៖ «ក្នុងនោះមានកប់ដីលាយឡំជាមួយសំណល់សម័យទំនើបមានន័យថា កប់ដីប្រហែលក្នុងទសវត្សរ៍ទី ៦០ ឬ ៧០ ព្រោះយើងបានរកឃើញអំបែងកែវ កណ្ដឹងកង់ ថង់ប្លាស្ទិក និងសម្ភារផ្សេងៗទៀត។ អ៊ីចឹងការកប់រូបពុទ្ធបដិមាទាំងនេះ មិនមែនក្នុងសម័យបុរាណទេ»។
លោក អ៊ឹម សុខរិទ្ធី ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរាបានថ្លែងពីម្សិលមិញថា បើពិនិត្យពីទម្រង់រូបពុទ្ធបដិមាទាំង ២១ អង្គនេះ គេមិនទាន់អាចសន្និដ្ឋានបានថា មានប្រភពមកពីណាខ្លះទេ។ ប៉ុន្តែមនុស្សសម័យទំនើបបានកប់ទុកត្រឹមត្រូវក្នុងរណ្ដៅតែមួយ ដោយមានទំហំ ប្រភេទ និងប្រភពផ្សេងៗគ្នាទាំងអស់ តែក្រុមការងារគ្រោងធ្វើកំណាយទៅក្រោមជិត ១ ម៉ែត្រទៀត ព្រោះសង្ស័យថា នៅមានកប់អ្វីទៀត។
លោកបញ្ជាក់ថា៖ «រូបបដិមាទាំងនេះមានមនុស្សរៀបចំទុកដាក់ត្រឹមត្រូវ ព្រោះយើងបានកត់សម្គាល់តាមរយៈស្រទាប់ដី សម្គាល់លើសម្ភារដែលកប់ជាប់ក្នុងរណ្ដៅនេះ។ រូបបដិមាទាំង ២១ អង្គនេះភាគច្រើនជាបំណែកៗ ហើយខ្លះយើងរកមិនទាន់ឃើញព្រះសិរ និងខ្លះបាត់ដៃ ឬខ្លះបាត់ជើង»។
ករណីស្រដៀងគ្នានេះមន្ត្រីកងរាជអាវុធហត្ថស្រុកជីក្រែងនៅថ្ងៃទី ១៥ ខែមេសាបានប្រគល់វត្ថុបុរាណធ្វើអំពីថ្មភក់ចំនួន ៦ ដុំ និងក្រឡចំនួន ៤ ក្រឡឲ្យមន្ទីរវប្បធម៌ និងវិចិត្រសិល្បៈខេត្តសៀមរាប និងបានប្រគល់បន្តទៅឲ្យអាជ្ញាធរជាតិអប្សរាដើម្បីរក្សាទុក។
លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្តសៀមរាបបានថ្លែងកាលពីម្សិលមិញថា លោកបានទទួលវត្ថុបុរាណទាំងនេះពីមន្ត្រីកងរាជអាវុធហត្ថស្រុកជីក្រែងដើម្បីយកទៅរក្សាទុកជាសម្បត្តិវប្បធម៌ជាតិ។
លោកបន្តថា វត្ថុបុរាណទាំងនេះត្រូវបានពលរដ្ឋប្រទះឃើញកាលពីថ្ងៃទី ១៦ មីនា ឆ្នាំនេះនៅភូមិគំរូ ឃុំពង្រលើ ស្រុកជីក្រែង ខេត្តសៀមរាប ហើយបានប្រគល់ឲ្យមន្ត្រីកងរាជអាវុធហត្ថស្រុកមុនពេលយកមកប្រគល់ជូនមន្ទីរវប្បធម៌ និងវិចិត្រសិល្បៈខេត្ត។
លោកបញ្ជាក់ថា៖ «ខ្ញុំបានប្រគល់ជូនទៅអាជ្ញាធរជាតិអប្សរាយកទៅរក្សាទុកនៅសារមន្ទីរ ដើម្បីជួសជុលឡើងវិញ និងដាក់តាំងបង្ហាញឲ្យសាធារណជនចូលទស្សនាក៏ដូចជា ទុកធ្វើជាភ័ស្ដុតាង ដើម្បីឲ្យក្មេងៗជំនាន់ក្រោយបានស្គាល់»។
លោក ឡុង កុសល អ្នកនាំពាក្យអាជ្ញាធរជាតិអប្សរាបានថ្លែងកាលពីម្សិលមិញថា រូបចម្លាក់បដិមាទាំង ៦ ដុំ និងក្រឡចំនួន ៤ ទៀតត្រូវបានយកទៅរក្សាទុកនៅសារមន្ទីរព្រះសីហនុអង្គររួចរាល់ហើយ ដើម្បីឲ្យក្រុមអ្នកអភិរក្សលាងសម្អាត និងជួសជុលមុននឹងដាក់តាំងឡើងវិញ។
លោកបានបន្តថា កន្លងមកពលរដ្ឋតែងតែប្រទះឃើញរូបបដិមាជាច្រើន ប៉ុន្ដែពួកគាត់បានប្រគល់មកឲ្យអាជ្ញាធរ និងអ្នកជំនាញនៃអាជ្ញាធរជាតិអប្សរា ដើម្បីរក្សាទុក ជួសជុល និងយកមកដាក់តាំងនៅក្នុងខេត្តសៀមរាបក្នុងបំណងបង្ហាញសាធារណជន និងអ្នកស្រាវជ្រាវដែលចង់ដឹងចង់ស្វែងយល់ពីវត្ថុបុរាណទាំងនោះ។
លោកបញ្ជាក់ថា៖ «អាជ្ញាធរជាតិអប្សរាសូមអំពាវនាវដល់ពលរដ្ឋយើង បើបានជួបប្រទះនូវវត្ថុបុរាណ សូមរក្សាទុក និងយកទៅប្រគល់ជូនអាជ្ញាធរ និងមន្ត្រីជំនាញ ដើម្បីយើងអភិរក្សសម្រាប់ទុកឲ្យក្មេងៗជំនាន់ក្រោយរបស់យើងបានឃើញ និងស្គាល់»៕
