ភ្នំពេញៈ លោក ហង្ស ព្រីនយ៉ា ប្រធានក្រុមហ៊ុន «ឋានព្រះឥន្ទ» បានចេញមុខបកស្រាយ និងស្នើឲ្យអតិថិជនទុកពេលឲ្យលោក ៣ ខែទៀត ដើម្បីរៀបចំដំណើរការក្រុមហ៊ុនឡើងវិញទើបអាចមានលទ្ធភាពដោះស្រាយការទាមទាររបស់អតិថិជនបាន ប៉ុន្តែជនរងគ្រោះមួយចំនួនមិនមានជំនឿលើការអះអាងរបស់ម្ចាស់ក្រុមហ៊ុននេះឡើយ។
ការចេញមុខមកបកស្រាយនេះធ្វើឡើងបន្ទាប់ពីមានជនរងគ្រោះមួយចំនួនបានប្រមូលផ្តុំគ្នាបង្កើតជាទំព័រហ្វេសប៊ុក ហើយបានបង្ហោះការទាមទារ និងទទូចឲ្យប្រធានក្រុមហ៊ុនរូបនេះចេញមុខដោះស្រាយ និងសងប្រាក់ដែលពួកគេបានដាក់វិនិយោគ និងទិញដីចម្ការរបស់ក្រុមហ៊ុន បន្ទាប់ពីក្រុមហ៊ុន បានបិទទ្វារដោយសារអស់ប្រាក់វិនិយោគ។
លោក ហង្ស ព្រីនយ៉ា ឬមានឈ្មោះមួយទៀតថា ឈី ចរិយា ប្រាប់ភ្នំពេញប៉ុស្តិ៍កាលពីថ្ងៃចន្ទថា លោកគ្មានចេតនាចង់គេចវេះពីការទទួលខុសត្រូវក្នុងការទូទាត់សំណងដល់អតិថិជនរបស់លោកនោះទេ។ លោកបន្តថា ដោយសារតែមួយរយៈកន្លងមកនេះមានជនឆ្លៀតឱកាសមួយចំនួនបានព្យាយាមបង្ខូចកេរ្តិ៍ឈ្មោះរបស់លោក ទើបបណ្តាលឲ្យក្រុមហ៊ុនដែលកំពុងដំណើរការធម្មតាជួបប្រទះបញ្ហាផ្នែកហិរញ្ញវត្ថុស្របពេលដែលលោកទទួលរងនូវការចោទប្រកាន់ ទាំងគ្មានកំហុសទៀតផង។
លោកបញ្ជាក់ថា៖ «បន្ទាប់ពីមានរឿងអាស្រូវក្នុងឆ្នាំ ២០១៩ ថាខ្ញុំលក់ដីខ្យល់ ទាំងដែលខ្ញុំមានដីពិតប្រាកដនោះបានធ្វើឲ្យអតិថិជនសម្រុកដកលុយចេញជាបន្តបន្ទាប់។ នៅក្នុងអំឡុង ឆ្នាំ ២០១៩ ក្រុមហ៊ុនមានលុយ ហើយបានព្យាយាមដោះស្រាយ និងសងត្រឡប់ទៅអតិថិជនវិញ។ ដូចដឹងស្រាប់ហើយ បើក្រុមហ៊ុនមានតែការដកមិនមានចំណូលគឺដួលហើយ។ យើងក៏អស់លុយរលីង ត្រឹមដំណាច់ខែ ១២ ឆ្នាំ ២០១៩ ដោយសារតែសងទៅអតិថិជន»។
ជាមួយនឹងការបកស្រាយបែបនេះលោក ព្រីនយ៉ា ស្នើដល់អតិថិជនឲ្យបន្តទុកពេល ៣ ខែ គិតចាប់ពីថ្ងៃទី ២០ ខែមេសា ដល់ថ្ងៃទី ២០ ខែកក្កដា ឆ្នាំ ២០២០ ដើម្បីទុកលទ្ធភាពឲ្យលោក ដំណើរការក្រុមហ៊ុនឲ្យបានល្អឡើងវិញ។
លោកថា នៅពេលក្រុមហ៊ុនអាចដំណើរការឡើងវិញ នោះនឹងអាចផ្តល់ជូនអតិថិជននូវអ្វីៗគ្រប់យ៉ាងដូចការរំពឹងទុក។ «ខ្ញុំនឹងប្រកាសបើកការិយាល័យនៅភ្នំពេញវិញនៅក្នុងខែ ៦ ខាងមុខឲ្យពួកគាត់ ទុកពេលវេលាឲ្យពួកខ្ញុំដើម្បីធ្វើការយើងមានសមាជិកល្អៗបន្តការងាររបស់យើងដូចនៅខេត្តកំពត។ យើងមានអតិថិជនល្អ បន្តការជឿគាំទ្រ ហើយកំពុងបន្តដើរទៅមុខ។ សូមឲ្យដៃគូវិនិយោគទាំងអស់ងាកមកធ្វើការរួមគ្នា ដើម្បីប្រយោជន៍អតិថិជន និងកេរ្តិ៍ឈ្មោះរបស់ស្ថាប័នទាំងអស់គ្នា»។
ប៉ុន្តែលោក ង៉ោ លីស៊ាង ជាជនរងគ្រោះម្នាក់ដែលបានដាក់ពាក្យបណ្តឹងទៅតុលាការខេត្តសៀមរាបកាលពីអំឡុងខែមីនា ថ្លែងពីម្សិលមិញថាលោកនៅតែទន្ទឹងរង់ចាំដំណោះស្រាយពីប្រព័ន្ធយុត្តិធម៌ដោយលោកមិនមានជំនឿលើការអះអាងរបស់ប្រធានក្រុមហ៊ុនឡើយ ព្រោះកន្លងមកប្រធានក្រុមហ៊ុននេះ តែងតែសុំឲ្យទុកពេលរហូត។
លោកបន្តថា៖ «គាត់ស្នើនេះច្រើនដងមកហើយ ដែលពួកយើងព្យាយាមអត់ធ្មត់ ១ ឆ្នាំជាងទាក់ទងនឹងការធ្វើប្លង់ទាក់ទងការទាមទារសំណងអីហ្នឹង។ ក្នុងករណីនេះមិនមែនតែអ្នកទិញដីចម្ការគឺមានទាំងអ្នកវិនិយោគទៀត។ គាត់និយាយសុំពេល ៣ ខែដល់ពេលគាត់លើក ៣ ខែទៀតដោយមានហេតុផលច្រើន។ ការទាមទារនេះបើគាត់ធ្វើដូចអ្វីដែលគាត់សន្យានេះ ក៏យើងមិនតវ៉ាដល់ពេលនេះដែរ»។
ជនរងគ្រោះម្នាក់ទៀតដែលបញ្ជាក់ត្រឹមឈ្មោះ រិទ្ធី ដែលបានចំណាយលុយជាង ៤ ម៉ឺនដុល្លារ ទិញដីចម្ការក្នុងខេត្តសៀមរាបដូចលោក ង៉ោ លីស៊ាង ដែរនោះបានប្រាប់ភ្នំពេញប៉ុស្តិ៍ពីម្សិលមិញថា កន្លងមកលោកធ្លាប់ជឿទុកចិត្ត និងបានទុកពេលឲ្យប្រធានក្រុមហ៊ុននេះជាច្រើនលើកច្រើនសាប៉ុន្តែនៅតែគ្មានដំណោះស្រាយ។
លោក រិទ្ធី បន្តថា៖ «ខ្ញុំបានទៅស៊ើបនៅស្រុកស្រីស្នំជាមួយអាជ្ញាធរហើយគេថា គាត់គ្មានដីនៅទីនេះទេ គ្រាន់តែគេបានបញ្ជាក់ថា គាត់ពិតជាបានកក់ប្រាក់ និងទិញដីនៅតំបន់នេះពិតមែន ប៉ុន្តែមិនទាន់ឲ្យលុយគេអស់ទេ ហើយម្ចាស់គេក៏បានយកដីវិញ។ ខ្ញុំដឹងបែបនេះ ខ្ញុំលែងជឿហើយ ខ្ញុំសុំតែប្រគល់ប្រាក់របស់ខ្ញុំ ឬប្រគល់ដីដែលខ្ញុំបានទិញមកវិញទេ»។
ក្រៅពីអះអាងដូច្នេះលោក រិទ្ធី បានបញ្ជាក់ដែរថា ក្នុងអំឡុងពេលនេះជនរងគ្រោះមួយចំនួនកំពុងប្រមូលឯកសារដើម្បីរួមគ្នាដាក់ពាក្យបណ្តឹងទៅអាជ្ញាធរដែនដី ហើយបើនៅតែមិនមានដំណោះស្រាយទៀតនឹងបន្តដាក់ពាក្យបណ្តឹងទៅតុលាការបន្ថែមទៀត។
ក្រុមហ៊ុន ឋានព្រះឥន្ទ ដែលមានឈ្មោះ ហង្សម្ចាស់ដី ឌីវេឡុបមិន ចាប់បើកដំណើរការកាលពីឆ្នាំ ២០១៨ ដោយមានសាខាច្រើនកន្លែងដែលមានដីចម្ការដាំដំណាំផ្សេងៗក្នុងខេត្តមួយចំនួនដែលមានខេត្តសៀមរាប ខេត្តមណ្ឌលគិរី ខេត្តពោធិ៍សាត់ និងខេត្តកំពតជាដើម។ ប៉ុន្តែក្រុមហ៊ុននេះបានជួបវិបត្តិហិរញ្ញវត្ថុធ្ងន់ធ្ងរក្នុងអំឡុងខែឧសភា ២០១៩ ទើបបណ្តាលឲ្យអតិថិជនបន្តទាមទារ និងដាក់ពាក្យបណ្តឹងនៅតុលាការដល់បច្ចុប្បន្ន៕