.jpg)
លោក វុន ធឿន ប្រធានការិយាល័យដែនជម្រកសត្វព្រៃគូលែនព្រហ្មទេព នៃមន្ទីរបរិស្ថានខេត្តព្រះវិហារ ដែលត្រូវដកចេញពីតំណែង។ សហការី
ព្រះវិហារៈ ប្រធានការិយាល័យដែនជម្រកសត្វព្រៃគូលែនព្រហ្មទេព នៃមន្ទីរបរិស្ថានខេត្តព្រះវិហារ លោក វុន ធឿន ត្រូវបានលោក សាយ សំអាល់ រដ្ឋមន្ត្រីក្រសួងបរិស្ថានដកចេញពីតំណែង ដោយតម្រូវឲ្យមកបម្រើការងារនៅទីស្ដីការក្រសួងបរិស្ថានវិញ។
តាមសេចក្តីប្រកាសព័ត៌មានរបស់លោក សាយ សំអាល់ ចុះថ្ងៃទី ២៥ តុលា ដែលភ្នំពេញប៉ុស្ដិ៍ទើបទទួលបានឲ្យដឹងថា៖ «ត្រូវផាកពិន័យលោក វុន ធឿន អត្តលេខ ១៧១០៥០០០៤៤ ប្រធានការិយាល័យដែនជម្រកសត្វព្រៃគូលែនព្រហ្មទេពនៃមន្ទីរបរិស្ថានខេត្តព្រះវិហារដាក់វិន័យក្រោមរូបភាពផ្លាស់ដោយបង្ខំ ឲ្យមកបម្រើការងារនៅទីស្តីការក្រសួងបរិស្ថានវិញ»។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ឱ្យដឹងថា ឈ្មោះ វុន ធឿន ត្រូវបានថ្នាក់ដឹកនាំក្រសួងបរិស្ថាន ធ្វើការអប់រំ និងណែនាំ ជាច្រើនលើកច្រើនសារួចមកហើយ ប៉ុន្តែមិនបានកែកំហុសរបស់ខ្លួនឡើយ។ ក្រសួងបរិស្ថានមិនគាំទ្រ និងការពារមន្ត្រីរូបណាដែលប្រព្រឹត្តកំហុសឡើយ។
លោកបញ្ជាក់ថា៖ «ដូច្នេះជាវិធានការរដ្ឋបាល ក្រសួងត្រូវសម្រេចដាក់ពិន័យរដ្ឋបាលដោយផ្លាស់ដោយបង្ខំឱ្យមកបំពេញការងារនៅទីស្តីការក្រសួងបរិស្ថាន។ ក្នុងករណីមិនរាងចាលនឹងប្រឈមមុខចំពោះមុខច្បាប់ជាធរមាន»។
ទោះបីយ៉ាងណាទាំងសេចក្តីប្រកាសព័ត៌មានរបស់លោក សាយ សំអាស់ និងលោក នេត្រ ភក្ត្រា មិនបានបញ្ជាក់ពីកំហុសអ្វីខ្លះឱ្យច្បាស់លាស់ ទើបឈានដល់មានការដកមន្ត្រីខាងលើនេះចេញពីតំណែងនោះទេ។
លោក អៀ សុខា ប្រធានមន្ទីរបរិស្ថានខេត្តព្រះវិហារថ្លែងកាលពីថ្ងៃទី ៣០ ខែតុលា ថាករណីនេះជាការសម្រេចរបស់ថ្នាក់ដឹកនាំ។ ការផ្ទេរ ឬតែងតាំងជាកិច្ចការរដ្ឋបាលរបស់ក្រសួងបរិស្ថាន។ ដូច្នេះលោក វុន ធឿន ប្រហែលជាមានកំហុសធ្ងន់ហើយ ទើបបានជាថ្នាក់ដឹកនាំដាក់ពិន័យរដ្ឋបាល ដោយផ្ទេរគាត់បែបនេះ។
លោកបានបញ្ជាក់ថា៖ «ចំពោះកំហុសឆ្គងលោក វុន ធឿន យ៉ាងណានោះ ខ្ញុំមិនបានដឹងទេ ព្រោះកិច្ចការនេះ ក្រុមអធិការកិច្ចខាងក្រសួងបរិស្ថានជាអ្នកធ្វើការផ្ទាល់»។
លោកបានបន្តថា ក្រុមការងារអធិការកិច្ចរបស់ក្រសួងបរិស្ថានបានធ្វើការស៊ើបអង្កេតជាយូរខែមកហើយ ទើបបានជាផ្ទេរទាំងបង្ខំបែបនេះ។ ចំពោះការតែងតាំងអ្នកថ្មីមកជំនួសលោកថា លោកមិនទាន់បានដឹងទេ ព្រោះវាជាការសម្រេចចិត្តរបស់ថ្នាក់ដឹកនាំ។ លោក អៀ សុខា បញ្ជាក់ថា៖ «ព្រោះត្រូវឆ្លងកាត់ការវាយតម្លៃ ធ្វើតេស្តសមត្ថភាពលើជំនាញចំណេះដឹង បទពិសោធការងារ។ ការតែងតាំងនេះមិនអាចចេះតែរើសដាក់ៗស្រេចតែចិត្តបានទេ»។
នៅពេលទាក់ទងពីថ្ងៃទី ៣០ តុលាលោក វុន ធឿន ដែលត្រូវបានផ្ទេរតួនាទីនេះ បានបដិសេធធ្វើអធិប្បាយដោយគ្រាន់តែថ្លែងយ៉ាងខ្លីថា លោកបានទទួលលិខិតផ្ទេរភារកិច្ចរបស់លោក សាយ សំអាល់ រួចហើយ។ «ឥឡូវពិបាកនិយាយគ្នាណាស់បានហើយ ប៉ុណ្ណឹងបានហើយ»។
លោក ឆេង សុវណ្ណា នាយប៉ុស្ដិ៍នគរបាលឃុំគូលែនខាងជើងថ្លែងថា លោកមិនបានដឹងពីទោសកំហុសរបស់លោក វុន ធឿន ដែលឈានដល់ការផ្ទេរតួនាទីទាំងបង្ខំបែបនេះទេ។ ប៉ុន្ដែកន្លងមកលោកធ្លាប់ឮពលរដ្ឋលើកឡើងថា លោក វុន ធឿន តែងតែធ្វើការបំពានបទបញ្ជាពីថ្នាក់លើ ព្រមទាំងធ្លាប់មានរឿងអាស្រូវមួយចំនួនដែរ។
លោកបញ្ជាក់ថា៖ «គ្រាន់តែដឹងថា កន្លងមកខ្ញុំឮគេនិយាយរឿងមិនល្អពីគាត់។ ក្រៅពីហ្នឹង ខ្ញុំអត់ដឹងទេ សួរទៅសាមីខ្លួនគាត់ទៅ»។
លោក ហេង ស្រស់ សកម្មជនការពារបរិស្ថាន និងព្រៃឈើបានថ្លែងថា លោកមិនបានដឹងចំពោះទោសកំហុសរបស់លោក វុន ធឿន ទេ ប៉ុន្ដែប្រសិនបើក្រសួងបរិស្ថានរកឃើញកំហុសមន្ត្រីរូបនេះខុសមែន គួរតែបណ្ដេញចេញពីក្របខ័ណ្ឌមន្ត្រីរាជការ ហើយអនុវត្តទោសតាមផ្លូវច្បាប់តុលាការឲ្យតឹងរ៉ឹង។
លោកបញ្ជាក់ថា៖ «ខ្ញុំថាមិនគួរយកគាត់បញ្ឈរជើងចោលហើយដេកស៊ីប្រាក់ខែរដ្ឋ ដោយគ្មានធ្វើការងារអ្វីនោះទេ។ មន្ត្រីបែបនេះគួរតែដកចេញពីក្របខ័ណ្ឌរដ្ឋ ហើយស្រាវជ្រាវអនុវត្តទោសតាមផ្លូវច្បាប់តុលាការ ដើម្បីទុកជាការព្រមានមន្ត្រីខិលខូចមួយចំនួនដទៃទៀត។ បើក្រសួង ឬរដ្ឋាភិបាលនៅតែឱបក្រសោបមន្ត្រីខិលខូចទៀត ពលរដ្ឋគ្មានជំនឿថា យើងអាចលុបបំបាត់អំពើពុករលួយបានទេ»៕
