ភ្នំពេញៈ ប្រធានប្តូរវេននៃឧត្តមក្រុមប្រឹក្សាពិគ្រោះ និងផ្តល់យោបល់ និងជាសមាជិកនៃស្ថាប័ននេះ មកពីគណបក្សសំបុកឃ្មុំសង្គមប្រជាធិបតេយ្យ លោកម៉ម សូណង់ដូ គ្រោងស្នើបង្កើតច្បាប់ផ្ទៃក្នុងមួយសម្រាប់ឧត្តមក្រុមប្រឹក្សា ដើម្បីការពារកុំឲ្យមានការបញ្ចប់មុខតំណែងសមាជិកដទៃទៀត ក្រោយលោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោកត្រូវបានបញ្ចប់មុខតំណែងពីស្ថាប័ននេះពាក់ព័ន្ធការបំពេញបេសកកម្មរបស់ខ្លួន។
ការស្នើបង្កើតច្បាប់ផ្ទៃក្នុងនេះនឹងត្រូវលើកយកទៅពិភាក្សាជាមួយសមាជិកគណបក្សនយោបាយជាង ១០ បក្សទៀតនាថ្ងៃចន្ទ សប្តាហ៍ក្រោយក្នុងកិច្ចប្រជុំប្រចាំ ខែឧសភា ដឹកនាំដោយលោក ម៉ម សូណង់ដូ សមាជិកឧត្តមក្រុមប្រឹក្សាពិគ្រោះ និងផ្តល់យោបល់ ដែលជាប្រធានប្តូរវេននៃឧត្តមក្រុមប្រឹក្សាពិគ្រោះ និងផ្តល់យោបល់សម្រាប់កិច្ចប្រជុំនោះ។
លោកប្រាប់ពីម្សិលមិញថា៖ «យើងប្រជុំនេះ ដើម្បីបង្កើតច្បាប់ផ្ទៃក្នុងមួយកុំឲ្យមានបញ្ហាដកសមាជិកផ្សេងទៀត ដែលវាដិតដាមដដែលៗដោយយើងមិនចង់ឲ្យបញ្ហានេះកើតមានម្តងទៀត។ ទាក់ទងទៅការងាររដ្ឋបាល ការងារ អី ដែលយើងត្រូវធ្វើច្បាប់ផ្ទៃក្នុងមួយឲ្យយើងគោរពទាំងអស់គ្នា កុំឲ្យប៉ះពាល់ដល់កិត្តិយសឧត្តមក្រុមប្រឹក្សាហើយក៏ដូចជាប៉ះពាល់ដល់កិត្តិយសសម្តេចដែរ»។
កាលពីថ្ងៃទី ៤ ឧសភា លោក សាយ ឈុំ ប្រមុខរដ្ឋស្តីទីបានចុះហត្ថលេខាក្នុងព្រះបរមនាម និងតាមព្រះរាជក្រឹត្យត្រាស់បង្គាប់ដែលស្នើដោយលោកនាយករដ្ឋមន្ត្រី ហ៊ុន សែន បានបញ្ចប់មុខតំណែងលោក សុខសុវណ្ណ វឌ្ឍនាសាប៊ុង ប្រធានប្រតិភូគណបក្ស ខ្មែរក្រោកពីសមាជិកឧត្តមក្រុមប្រឹក្សាពិគ្រោះ និងផ្តល់យោបល់។
លោក សូណង់ដូ បន្តថា កិច្ចប្រជុំនឹងមិនពិភាក្សាគ្នា ដើម្បីស្វែងរកខុសត្រូវជុំវិញការដកតំណែងលោក សុខសុវណ្ណ វឌ្ឍនាសាប៊ុង នោះទេ គ្រាន់តែមានគោលបំណងពិភាក្សាគ្នាស្វែងរកចំណុចខ្វះចន្លោះ ដែលកើតមានកន្លងមក ដើម្បីកែតម្រូវកំហុសសម្រាប់សមាជិកឧត្តមក្រុមប្រឹក្សាដទៃទៀតឲ្យបន្តសកម្មភាពរបស់ខ្លួនបានរលូន និងត្រឹមត្រូវ។
លោកថា៖ «ច្បាស់ណាស់ ករណីនៃការដកតំណែង ឬបញ្ចប់តំណែង លោកសុខសុវណ្ណ វឌ្ឍនាសាប៊ុង នេះគឺបានជះឥទ្ធិពលដល់សមាជិកដទៃទៀតក្នុងការចុះធ្វើការងាររបស់ខ្លួន បើមិនមានតិចក៏មានច្រើនដែរ។ ដូច្នេះបានខ្ញុំថាចាំបាច់ត្រូវតែមានច្បាប់ផ្ទៃក្នុងនេះ»។
ការស្នើនេះគ្រាន់តែជាការស្នើឡើងរបស់លោកតែម្នាក់ក្នុងនាមជាប្រធានប្តូរវេនដឹកនាំកិច្ចប្រជុំប្រចាំខែឧសភា។ ប៉ុន្តែលោករំពឹងថា សំណើនៃការបង្កើតច្បាប់ផ្ទៃក្នុងសម្រាប់ឧត្តមក្រុមប្រឹក្សាពិគ្រោះ និងផ្តល់យោបល់នឹងមាន ការគាំទ្រពីសមាជិកមកពីបក្សដទៃទៀតដើម្បីឲ្យច្បាប់នេះលេចជារូបរាងឡើងក្នុងពេលឆាប់ៗ។
លោក សេង សុខេង សមាជិកឧត្តមក្រុមប្រឹក្សាពិគ្រោះ និងផ្តល់យោបល់ពីគណបក្សសញ្ជាតិកម្ពុជាប្រាប់ពីម្សិលមិញថាលោកពុំទាន់ទទួលបានរបៀបវារៈ និងការកំណត់នៃអង្គប្រជុំប្រចាំខែរបស់ឧត្តមក្រុមប្រឹក្សានោះទេ។ ទោះយ៉ាងណាលោកយល់ថាការស្នើបង្កើតច្បាប់ផ្ទៃក្នុងពិតណាស់នឹងមិនអាចធ្វើបាននោះទេ។ ព្រោះតួនាទីរបស់ស្ថាប័ននេះគឺសម្រាប់តែតាមដានការអនុវត្តច្បាប់តែប៉ុណ្ណោះ។
លោកថ្លែងថា៖ «ចំពោះការបំពេញការងាររបស់ឧត្តមក្រុមប្រឹក្សានេះ គឺធ្វើឡើងតាមច្បាប់បញ្ញត្តិ បើសិនជាសមាជិកឧត្តមក្រុមប្រឹក្សានីមួយៗបំពេញតាមភារកិច្ច ហ្នឹងទាំងអស់ខ្ញុំគិតថា ដូចជាមិនមានអ្វីត្រូវព្រួយបារម្ភនោះទេ។ ពីព្រោះការបំពេញការងាររបស់ឧត្តមក្រុមប្រឹក្សាគឺចូលរួមចំណែកជាមួយរដ្ឋាភិបាលក្នុងការលុបបំបាត់ភាពមិនប្រក្រតី»។
លោក សួង សុភ័ណ្ឌ ប្រធានគណបក្សអំណាចខ្មែរលើកឡើងពីម្សិលមិញថា កន្លងទៅស្ថាប័នឧត្តមក្រុមប្រឹក្សាមានច្បាប់ជាច្រើនបានចែងយ៉ាងច្បាស់រួចទៅហើយ ដូច្នេះការស្នើបង្កើតច្បាប់បន្ថែមទៀតនេះនឹងមិនអាចទៅរួចទេ។ ប៉ុន្តែក្នុងនាមជាប្រធានគណបក្សនយោបាយ លោកសាទររាល់ច្បាប់ទាំងឡាយណាដែលបង្កើតឡើងក្នុងន័យបម្រើផលប្រយោជន៍ ប្រជាពលរដ្ឋ ហើយមិនប៉ះពាល់ដល់ផលប្រយោជន៍ជាតិ។
លោកថ្លែងថា៖ «ស្ថាប័នឧត្តមក្រុមប្រឹក្សា បង្កើតឡើងហាក់ដូចតក់ក្រហល់ ហើយមានលក្ខណៈផុយស្រួយសូម្បីតែការតអាណត្តិនៅពេលក្រោយៗទៀតក៏មិនទាន់ មានអ្វីច្បាស់លាស់ដែរ។ ស្ថាប័ននេះវាប្រឈមខ្លាំងព្រោះវាអាចនៅបានក្នុងពេលដែលរដ្ឋាភិបាលត្រូវការ។ ប៉ុន្តែវាអាចនឹងប្រឈមខ្ពស់ក្នុងការបញ្ចប់មុខតំណែង នៅពេលរដ្ឋាភិបាលឈប់ត្រូវការដែរ នេះគឺជាការមើលឃើញជាក់ស្តែង»។
លោក ឈឹម ផលវរុណ ប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ប្រាប់ភ្នំពេញប៉ុស្តិ៍ម្សិលមិញថា ការប្រជុំប្រចាំខែរបស់ឧត្តមក្រុមប្រឹក្សាពិគ្រោះ និងផ្តល់យោបល់គឺជាសិទ្ធិអំណាចរបស់ប្រធានប្តូរវេននីមួយៗដែលផ្លាស់ប្តូរគ្នាជាប្រចាំខែដែលមានសិទ្ធិកំណត់របៀបវារៈ និងកំណត់ពេលវេលាជាក់លាក់ទៅតាមសិទ្ធិរបស់ខ្លួន។
លោកបានបញ្ជាក់ថា៖ «នេះជាសិទ្ធិរបស់ប្រធានប្តូរវេន ព្រោះស្ថាប័នមួយគឺត្រូវតែមានប្រធាន ហើយប្រធានលេខាធិការដ្ឋានគ្រាន់តែយន្តការរដ្ឋបាលក្នុងការរៀបចំឲ្យការកោះប្រជុំនេះដំណើរការ។
ឯការបញ្ចេញទស្សនៈទៅលើបរិបទណាមួយគួរតែសួរគណបក្សនយោបាយ»៕