The Phnom Penh Post Search

Search form

Logo of Phnom Penh Post newspaper Phnom Penh Post - ប្រធាន​ពន្ធនាគារ​ខេត្ត​កណ្តាល​ត្រូវ​គេ​ប្តឹង​ចោទ​ថា ប្រព្រឹត្ត​អំពើ​ពុករលួយ




ប្រធាន​ពន្ធនាគារ​ខេត្ត​កណ្តាល​ត្រូវ​គេ​ប្តឹង​ចោទ​ថា ប្រព្រឹត្ត​អំពើ​ពុករលួយ

ទិដ្ឋភាព​នៅ​មុខ​ពន្ធនាគារ​ខេត្ត​កណ្តាល​កាលពី​ពេល​កន្លងមក​។
ទិដ្ឋភាព​នៅ​មុខ​ពន្ធនាគារ​ខេត្ត​កណ្តាល​កាលពី​ពេល​កន្លងមក​។ ស្រេង ម៉េងស្រ៊ុន

ប្រធាន​ពន្ធនាគារ​ខេត្ត​កណ្តាល​ត្រូវ​គេ​ប្តឹង​ចោទ​ថា ប្រព្រឹត្ត​អំពើ​ពុករលួយ

កណ្តាលៈ ប្រធាន​ពន្ធនាគារ​ខេត្ត​កណ្តាល​ត្រូវ​គេ​ប្តឹង​ចោទ​ថា បាន​ប្រព្រឹត្ត​អំពើ​ពុករលួយ​ដោយ​តម្រូវ​ឲ្យ​អ្នក​ជាប់​ឃុំ​បង់​ប្រាក់​ចាប់ពី​ ៥០ រហូត​ដល់ ៣០០០ ដុល្លារ ដើម្បី​បាន​រស់នៅ​សុខស្រួល​ជាង​អ្នកទោស​ដទៃ ដូចជា​ការ​ទទួល​បាន​ការ​លម្ហែ​ក្រៅ​បន្ទប់ ការ​ប្រើប្រាស់​ទូរស័ព្ទ​ដៃ ការ​ដាក់​ទូរទស្សន៍​នៅក្នុង​បន្ទប់ និង​ការ​រស់នៅ​ក្នុង​ប៉ុស្តិ៍​សុខភាព​ជាដើម។

ទោះ​យ៉ាងណា លោក ចាត ស៊ីនាង ប្រធាន​ពន្ធនាគារ​ខេត្ត​កណ្តាល បាន​បដិសេធ​រាល់​ការ​ចោទ​ប្រកាន់​ទាំងនោះ ដោយ​លោក​ធ្វើការ​បំភ្លឺ​តាមរយៈ​លិខិត​​មួយ ដែល​ចេញ​ផ្សាយ​ដោយ​អង្គភាព​ប្រឆាំង​អំពើ​ពុករលួយ (ACU) កាលពី​ថ្ងៃ​ទី ២៧ ឧសភា​កន្លង​ទៅ។

ACU ក្នុង​សប្តាហ៍​នេះ បាន​ឲ្យ​ដឹង​ថា ខ្លួន​ទទួល​​បាន​ពាក្យ​បណ្តឹង​កាលពី​ថ្ងៃ​ទី​ ២១ តុលា ឆ្នាំ​ ២០១៤ ដែល​ចោទ​ប្រកាន់​ពី​ «ភាព​មិន​ប្រក្រតី​មួយ​ចំនួន​ពាក់ព័ន្ធ​នឹង​លោក ចាត ស៊ីនាង» ក្នុង​នោះ​មាន​ចំនួន​ ៦ ​ចំណុច ដែល​មាន​ការ​យក​ប្រាក់​ពី​អ្នក​ទោស​ ២០០ ដុល្លារ​ក្នុង​មួយ​ខែ​ «ជា​ថ្នូរ​នឹង​ការ​អនុញ្ញាត​ឲ្យ​ចេញ​លម្ហែ​កាយ​ក្រៅ​បន្ទប់» រាល់​ព្រឹក​ការ​ «យក​ប្រាក់​ពី​អ្នកទោស​ ១០០ ដុល្លារ ក្នុង​មួយ​ខែ ជា​ថ្នូរ​នឹង​ការ​អនុញ្ញាត​ឲ្យ​ប្រើប្រាស់​ទូរស័ព្ទ​ដៃ» និង​ ៥០ ​ដុល្លារ ជា​ថ្នូរ​នឹង​ការ​ដាក់​ទូរទស្សន៍​ក្នុង​បន្ទប់។

ACU បាន​ឲ្យ​ដឹង​បន្ត​ថា បណ្តឹង​បាន​ចោទប្រកាន់​ថា អ្នកទោស​បង់​ប្រាក់​ពី ១០០០ ដុល្លារ ទៅ​ ១៥០០ ដុល្លារ សម្រាប់​ការ​អនុញ្ញាត​ឲ្យ​នៅ​កន្លែង​កុមារ យក​ប្រាក់​ពី​អ្នកទោស​ពី​ ២០០០ ​ទៅ​ ៣០០០ ដុល្លារ​ជា​ថ្នូរ​នឹង​ការ​អនុញ្ញាត​ឲ្យ​ស្នាក់នៅ​មណ្ឌល​សុខភាព​ (ប៉ុស្តិ៍​សុខភាព​) ចោទ​ថា អនុញ្ញាត​ឲ្យ​អ្នកទោស​លក់​ចាប់ហួយ​ក្នុង​ពន្ធនាគារ និង​បាន​កិបកេង​ប្រាក់​ជីវភាព​អ្នកទោស​ពី​ ១០ លាន​រៀល ទៅ​ ២០ ​លានរៀល​ជា​រៀងរាល់​ខែ​។

លោក ចាត ស៊ីនាង មិន​អាច​ទាក់ទង​សុំ​ការ​បញ្ជាក់​បន្ថែម​បាន​ទេ កាលពី​ម្សិលមិញ។ ប៉ុន្តែ​តាម​លិខិត​របស់​ ACU លោក​ប្រធាន​ពន្ធនាគារ​រូប​នេះ បាន​បដិសេធ​គ្រប់​ចំណុច​នៃ​ការ​ចោទ​ប្រកាន់​ទាំងអស់​។

លោក​ ស៊ីនាង បាន​ឆ្លើយ​ក្នុង​ពេល​ ACU សួរ​ចម្លើយ​ថា ៖ «ចាត ស៊ីនាង សូម​បដិសេធ​ទាំង​ស្រុង​ចំពោះ​ការ​ចោទប្រកាន់...ព្រោះ​រាល់​ជន​ជាប់​ឃុំ បើ​គ្មាន​លិខិត​បញ្ជាក់ពី​មន្ត្រី​ពេទ្យ ពន្ធនាគារ​ទេ មិន​អាច​ស្នាក់នៅ​ប៉ុស្តិ៍​សុខភាព​បាន​ឡើយ​»។

ការ​ឲ្យ​លុយ​ដើម្បី​បាន​ស្នាក់នៅ​កន្លែង​កុមារ ក៏​ត្រូវ​បាន​ប្រធាន​ពន្ធនាគារ​បដិសេធ​ដែរ និង​ថា​ច្បាប់​បាន​ចែង​ឲ្យ​នីតិជន រស់នៅ​ដាច់​ពី​អនីតិជន «ប៉ុន្តែ​ការ​រស់នៅ​មាន​បញ្ហា​គ្រប់គ្រង​ខ្លះៗ​នៅ​កន្លែង​អនីតិជន ទើប​អង្គភាព​ពិភាក្សា​គ្នា ដើម្បី​សម្រេច​យក​អនីតិជន​មួយ​ចំនួន​ឲ្យ​ទៅ​រស់នៅ​ក្នុង​បន្ទប់ ដើម្បី​ដឹកនាំ​មើល​ការ​ខុសត្រូវ និង​ជួយ​អប់រំ»។

លោក​ ចាត ស៊ីនាង បាន​ប្រាប់ ACU ថា អង្គភាព​លោក​មាន​ការ​ត្រួតពិនិត្យ​ពី​មន្ត្រី​ថា្នក់​លើ និង​អយ្យការ​អម​សាលា​ដំបូង​ខេត្ត​កណ្តាល ដើម្បី​ពិនិត្យ​ការ​គ្រប់គ្រង​ជន​ជាប់​ឃុំ​ផង​ដែរ​។

មន្ត្រី ACU មិន​អាច​ទាក់ទង​សុំ​ការ​បញ្ជាក់​បាន​ទេ ថា​តើ​ ACU នឹង​ត្រូវ​បន្ត​ធ្វើការ​ស៊ើបអង្កេត​លើ​ករណី​ពាក់ព័ន្ធ​នឹង​ប្រធាន​ពន្ធនាគារ តប​តាម​បណ្តឹង​ខាង​លើ​ឬ​យ៉ាង​ណា​?

អតីត​អ្នកទោស​ម្នាក់​នៅ​ពន្ធនាគារ​ខេត្ត​កណ្តាល ដែល​ទើប​តែ​រួច​ទោស​ក្នុង​ខែ​ឧសភា​ពី​ករណី​ឆក់​កាបូប បាន​ឲ្យ​ដឹង​ថា នាង​មើល​ឃើញ​ពី​ការ​បង់​លុយ ដើម្បី​បាន​សេវា​ល្អៗ​ក្នុង​ពន្ធនាគារ​នេះ​។

ស្ត្រី​អាយុ​ ២៨ ឆ្នាំ មាន​ជីវភាព​ក្រីក្រ ដែល​ត្រូវ​បាន​តុលាការ​កាត់​ទោស​ឲ្យ​ជាប់​ពន្ធនាគារ ៦ ខែ រូប​នេះ ទើប​តែ​ត្រូវ​ដោះលែង​ពី​ពន្ធនាគារ​ប្រមាណ​ជាង​ ១០ ថ្ងៃ បាន​ឲ្យ​ដឹង​ថា៖ «អ្នក​មាន​លុយ ពិតជា​បង់​លុយ​ ៥០ ​ដុល្លារ ក្នុង​មួយ​ខែ ដើម្បី​ដាក់​ទូរទស្សន៍​មើល ហើយ​នេះ​ជា​ប្រាក់​បង់​ថ្លៃ​ភ្លើង​។ អ្នក​មាន​លុយ​បាន​ដេក​លើ​គ្រែ យើង​អត់​លុយ​ដេក​លើ​ដី។ មាន​ថ្លៃ​ផ្សេងៗ​ទៀត​ត្រូវ​បង់ ដើម្បី​បាន​កន្លែង​រស់នៅ​ល្អ»។

លោក អំ សំអាត ទីប្រឹក្សា​បច្ចេកទេស​នៃ​អង្គការ​សិទ្ធិ​មនុស្ស​លីកាដូ​បាន​ថ្លែង​កាលពី​ម្សិលមិញ​ថា ការ​បង់លុយ​ដើម្បី​ទទួល​បាន​សេវា​ល្អ​ប្រសើរ បាន​កើតឡើង​ជាទូទៅ​ទៅ​ហើយ​នៅ​តាម​ពន្ធនាគារ​ក្នុង​ប្រទេស​កម្ពុជា​។

លោក​ថា៖ «យើង​ធ្លាប់​ទទួល​ព័ត៌មាន​នៃ​ការ​ផ្តល់​លុយ ដើម្បី​មាន​ឈ្មោះ​ក្នុង​បញ្ជី​បន្ធូរបន្ថយ​ទោស លើកលែង​ទោស​ផង​ដែរ​។ ទាំងនោះ​ជា​អំពើ​ពុករលួយ។...អ៊ីចឹង​បើ​មាន​បណ្តឹង​គួរតែ​អង្គភាព​ប្រឆាំង​អំពើ​ពុករលួយ​ស៊ើបអង្កេត​ឲ្យ​ច្បាស់​ដើម្បី​ឲ្យ​មាន​តម្លាភាព​»៕

អត្ថបទគួរចាប់អារម្មណ៍