The Phnom Penh Post Search

Search form

Logo of Phnom Penh Post newspaper Phnom Penh Post - ប្រធាន​មណ្ឌល ម២ ត្រូវ​បាន​គេ​ប្តឹង​ពី​បទ​ពុករលួយ




ប្រធាន​មណ្ឌល ម២ ត្រូវ​បាន​គេ​ប្តឹង​ពី​បទ​ពុករលួយ

ស្រ្តី​ជាប់​ឃុំ​នៅ​មណ្ឌល​អប់រំ​កែប្រែ​ ម២ កាលពី​ពេល​កន្លង​មក​។
ស្រ្តី​ជាប់​ឃុំ​នៅ​មណ្ឌល​អប់រំ​កែប្រែ​ ម២ កាលពី​ពេល​កន្លង​មក​។ ហេង ជីវ័ន

ប្រធាន​មណ្ឌល ម២ ត្រូវ​បាន​គេ​ប្តឹង​ពី​បទ​ពុករលួយ

ភ្នំពេញៈ ប្រធាន​មណ្ឌល​អប់រំ​កែប្រែ​ទី ២ (ម២ ឬ គុក​ព្រៃស) ត្រូវ​បាន​គេ​ប្តឹង​ចោទប្រកាន់​ថា​បាន​កិបកេង​ប្រាក់​ប្រចាំ​ថ្ងៃ​របស់​ជន​ជាប់​ឃុំ​កិបកេង​ប្រាក់​ខែ​បុគ្គលិក​ក្រោម​ឱវាទ​យក​ថ្លៃ​ប្តូរ​បន្ទប់​ស្នាក់នៅ​ និង​យក​ប្រាក់​ពី​សាច់ញាតិ​ចូល​ជួប​សួរ​សុខទុក្ខ​អ្នក​ជាប់​ឃុំ​ប៉ុន្តែ​ត្រូវ​បាន​ប្រធាន​​មណ្ឌល​អប់រំ​រូប​នេះ​បដិសេធ​ទាំង​ស្រុង។

ការ​ចោទ​ប្រកាន់​នេះ​ត្រូវ​បាន​អង្គភាព​ប្រឆាំង​អំពើ​ពុករលួយ​ (អ.ប.ព) បាន​បង្ហាញ​ជា​សាធារណៈ​តាម​គេហទំព័រ​របស់​ខ្លួន​ក្នុង​សប្តាហ៍​នេះ​នៅក្នុង​លិខិត​បំភ្លឺ​របស់​លោក ខ្លូត តារា ប្រធាន​មណ្ឌល​អប់រំ​កែប្រែ​ទី ២ ​(ជា​កន្លែង​ឃុំឃាំង​ស្ត្រី​ និង​អនីតិជន) បាន​បដិសេធ​រាល់​ការ​ចោទប្រកាន់​ ៤ ចំណុច​គឺ​ទី ១.តម្រូវ​ឲ្យ​ក្រុម​គ្រួសារ​​ដែល​ទៅ​ជួប​សួរ​សុខទុក្ខ​ជន​ជាប់​ឃុំ​បង់​ប្រាក់​ចំនួន​ ៣ ២០០០ រៀល​នៅ​រាល់​ពេល​ដែល​ចូល​សួរ​សុខទុក្ខ​ម្តងៗ។ ទី ២. យក​លុយ​ពី​ជន​ជាប់​ឃុំ​ខ្លួន​ក្នុង​ម្នាក់ៗ​ចាប់ពី​ ១០០ ទៅ​ ៥០០ ​ដុល្លារ​ជា​ថ្នូរ​ក្នុង​ការ​ផ្លាស់ប្តូរ​បន្ទប់។ ទី ៣.កិបកេង​របប​ជីវភាព​ប្រចាំ​ថ្ងៃ​របស់​​ជន​ជាប់​ឃុំ​ខ្លួន​ប្រហែល​ពី​​ ១០ ទៅ​ ១៥ ​លាន​រៀល​ក្នុង​មួយ​ខែ​ និង​ទី ៤. យក​​ប្រាក់ខែ​របស់​មន្ត្រី​ដែល​មិន​មក​បម្រើ​ការងារ​ចំនួន​ ៩ នាក់​មក​ធ្វើ​ជា​ប្រយោជន៍​ផ្ទាល់​ខ្លួន​អស់​រយៈពេល ​៤ ឆ្នាំ​មក​ហើយ។

ទាក់ទិន​នឹង​ចំណុច​​ចោទប្រកាន់​ទាំង​នេះ​លោក​ ខ្លូត តារា បាន​បំភ្លឺ​ជូន អបព កន្លង​មក​ថា​មិន​មាន​តម្រូវ​ឲ្យ​បង់​លុយ​រាល់​ពេល​ចូល​ជួប​ជន​ជាប់​ឃុំ​ដល់​ ៣២០០០ ​រៀល​នោះ​ទេ​គឺ «អង្គភាព​របស់​គាត់​ឲ្យ​បង់​ប្រាក់​ចំនួន ២០០០ រៀល​ថ្លៃ​បំពេញ​ពាក្យ​សុំ​ជួប​តែ​ប៉ុណ្ណោះ»។

ចំណែក​ការ​យក​លុយ​ពី​ជន​ជាប់​ឃុំ​ខ្លួន​ក្នុង​ម្នាក់ៗ​ចាប់​ពី​ ១០០ ដុល្លារ​ទៅ​ ៥០០ ដុល្លារ​អាមេរិក​ជា​ថ្នូរ​ក្នុង​ការ​ផ្លាស់ប្តូរ​បន្ទប់​គឺ​គ្មាន​ទេ​មាន​តែ​ការ​ចាត់ចែង​ផ្លាស់ប្តូរ​ទៅ​តាម​សំណូមពរ​ចាំបាច់​របស់​ការិយាល័យ​ជំនាញ​ហើយ​ការ​កិបកេង​លុយ​​ប្រចាំ​ថ្ងៃ​ទៀត​សោត​គឺ​រឹតតែ​មិន​មាន​ទៀត​ «ផ្ទុយ​ទៅ​វិញ​គាត់​ត្រូវ​ដោះស្រាយ​ផ្គត់ផ្គង់​របប​ហូបចុក​ជន​ជាប់​ឃុំ​មុន​ថវិកា​រដ្ឋ​ផ្តល់​ឲ្យ»​។

លោក​ តារា បន្ត​ថា​ មាន​មន្ត្រី​អសកម្ម​ការងារ​ចំនួន​ ៧ នាក់​ដែល​លោក​បាន​ស្នើ​សុំ​ក្រសួង​មហាផ្ទៃ​​ផ្អាក​ប្រាក់​បៀវត្សរ៍​រួចរាល់​ហើយ​ដូច្នេះ​លោក​មិន​បាន​យក​លុយ​មន្ត្រី​ទាំងនោះ​ទុក​នោះ​ទេ​។

លោក​ ខ្លូត តារា មិន​អាច​ទាក់ទង​បាន​ទេ​កាលពី​ម្សិលមិញ​។ ចំណែក​លោក ឱម យ៉ិនទៀង ប្រធាន​អង្គភាព​ប្រឆាំង​អំពើ​ពុករលួយ​ក៏​មិន​អាច​ទាក់ទង​បាន​ដើម្បី​សាកសួរ​ថា​តើ​ការ​ស៊ើបអង្កេត​លើ​មន្ត្រី​ដែល​រង​បណ្តឹង​នេះ​នឹង​នៅ​តែ​បន្ត​ឬ​យ៉ាង​ណា​នោះ​ទេ។

ប៉ុន្តែ​អ្នកស្រី​ ង៉ែត ឃុន ដែល​ជា​ស្ត្រី​វ័យ​ចំណាស់​ម្នាក់​ជា​សកម្មជន​ដីធ្លី​​នៅ​តំបន់​បឹងកក់​ធ្លាប់​ជាប់​ពន្ធនាគារ​ ២ ​លើក​ក្នុង​អំឡុង​ឆ្នាំ​ ២០១១ និង​ ២០១៤ បាន​ឲ្យ​ដឹង​ថា​ពន្ធនាគារ​ព្រៃស (​ម២) ​បាន​តម្រូវ​ឲ្យ​អ្នក​ជាប់​ឃុំ​បង់​ថ្លៃ​សេវា​នានា​ដើម្បី​បាន​រស់នៅ​ស្រួល។

អ្នកស្រី​ថ្លែង​ថា៖ «ថ្លៃ​កង្ហារ​មួយ​គេ​យក ៦ ម៉ឺន​រៀល ថ្លៃ​ទូរទស្សន៍​មួយ​គេ​យក​ ១០ ម៉ឺន​រៀល។ អ៊ីចឹង​អ្នក​ជាប់​ឃុំ​ស្រាក់​លុយ​គ្នា​ចេញ​ថ្លៃ​ហ្នឹង​។ ឯ​បន្ទប់​អ្នក​ឃុំ​ណា​ជា​អ្នកមាន ឬ​ជា​ជំទាវ​អី​ពួកគេ​បង់​ពី​ ២០០ ​ដល់​ ៥០០ ​ដុល្លារ​អី​ដើម្បី​បាន​រស់នៅ​បន្ទប់​មាន​គ្នា​តិច​ត្រឹម​ ៥ ទៅ​ ៦ នាក់។ យើង​អត់​លុយ​បង់​រស់នៅ​ក្នុង​កន្លែង​​ប្រជ្រៀត​គ្នា​ពី​ ៣០ ទៅ​ ៤០ ​នាក់»។

កាលពី​ខែ​មិថុនា​ប្រធាន​ពន្ធនាគារ​ខេត្ត​កណ្តាល​លោក ចាត ស៊ីនាង ក៏​ត្រូវ​បាន​អង្គភាព​ប្រឆាំង​អំពើ​ពុករលួយ​ផ្សព្វផ្សាយ​នូវ​ការ​ឆ្លើយ​បំភ្លឺ​ដោយ​លោក​បាន​បដិសេធ​រាល់​ការ​ចោទ​ថា​បាន​ប្រព្រឹត្ត​អំពើ​ពុករលួយ​ដោយ​តម្រូវ​ឲ្យ​អ្នក​ជាប់​ឃុំ​បង់​ប្រាក់​ចាប់ពី ៥០ រហូត​ដល់ ៣០០០ ដុល្លារ​ដើម្បី​បាន​រស់នៅ​សុខ​ស្រួល​ជាង​អ្នក​ទោស​ដទៃ​ផង​ដែរ​​។ ទោះ​មាន​ការ​បដិសេធ​ក៏​អង្គការ​សិទ្ធិ​មនុស្ស​ធ្លាប់​បាន​រាយការណ៍​ជា​ហូរហែ​មក​ថា​ការ​រស់​នៅក្នុង​ពន្ធនាគារ​ពិតជា​មាន​ការ​បង់​លុយ​មែន​។

របាយការណ៍​អង្គការ​លីកាដូ​ស្តី​ពី​ «ជីវិត​រស់នៅ​ក្នុង​ពន្ធនាគារ​កម្ពុជា» ដែល​ចេញ​កាលពី​ដើម​ឆ្នាំ ២០១៥ ឲ្យ​ដឹង​​ថា​អ្នក​មិន​មាន​ថវិកា​បង់​ត្រូវ​រស់ក្នុង​ស្ថានភាព​លំបាក​បង្ខំ​ធ្វើការ​មិន​សមរម្យ​ហើយ​ពេល​ខ្លះ​មិន​ត្រូវ​បាន​អនុញ្ញាត​ឲ្យ​ចេញ​ក្រៅ​បន្ទប់​ឃុំឃាំង​ទៀត​ផង។ មាន​សកម្មភាព​កម្សាន្ត​ ឬ​ការ​មាន​សិទ្ធិ​ពិសេស​គឺ​អាច​ទទួល​បាន​ដោយសារ​តែ​ការ​ចំណាយ​លុយ​ប៉ុណ្ណោះ៕

អត្ថបទគួរចាប់អារម្មណ៍